Si Christian Jacinto Oliver, sarong parasurat asin parabareta sa radyo. Tubong Goa, Camarines Sur asin namundag kan Hulyo 15, 2002. Nag-tapos siya nin elementarya sa Lamon Elementary School, asin sekondarya sa Pinaglabanan National High School, kun sain nagi siyang Editor-in-Chief kan The Pinnacle, publikasyon kan nasabing eskwelahan. Nagi man siyang estudyante kan Bicol University asin nag kua nin kurso na Bachelor of Arts in Journalism. Siya dating parasurat asin parabareta kan Budyong Online.

Ngunyan, yaun siya sa Naga City, pinapadagos an saiyang karera bilang sarong parabareta sa Brigada News FM Naga. Siya sarong alagad kan medya na nag kakalap nin mga bareta asin isyu sa nasabing siyudad asin bilog na Camarines Sur. Dawa pa man siya abalado na kan saiyang propesyon bilang alagad kan masa sa paagi kan medya, naipag-sasabay niya man giraray an pag-surat arog kan mga rawitdawit, usipon, asin mga nobela.

Nagin partisipante siya kan ika-11 na taon kan Saringsing National Writers Workshop kan Disyembre 20-22, 2023, na ginanap sa La Caseria, Canaman, Camarines Sur, kun sain hinimay an saiyang panurat na “An mga Nawawarang Kabtang”.

Puon pagka- aki, nagi niya nang pangiturugan an makatao nin inspirasyon sa saiyang komunidad, lalo na sa mga estudyante asin mga manunurat. Nagi niya naman paagi an pagsurat asin medya para matawan nin solusyon an manlain-lain na isyu. Ipinanuga niya na mapadagos siya sa pag-surat sagkod sa dai nadadangog an boses kan mga nasa laylayan.

Publikasyon

An mga panurat ni Oliver, naipublikar man sa man iba-ibang publikasyon arog kan E- Zine, Liwayway Magazine, Brigada News. Ph, We the Pvblic, Budyong Online, asin The Independent Bicol Mag.PH.

An saiyang panurat na “Minsan sa Rooftop”, “Uyayi sa Huling Linggo ng Paghinto”, asin “Dapithapon” naipublikar kan Liwayway Magazine. Ipinublikar man kan TBC Publication sa libro na “Letra Etcetera: Dreams and Goals” an “Talinghaga sa Pangarap ni Ernesto”. Sa E- Zine igwa man siya nin panurat na “Kita Kutang Duwa”, asin “Buradol”. Sa We the Pvblic naipublikar man, an saiyang panurat na “Straight Males Cross Dressing ‘For Fun’?: How Bicol’s Barakong Magayon Pageant affects the LGBTQIA+ Community”. Apwera kan mga naipublikar na, igwa pa siyang mga panurat arog kan "penitensya", "march 20, POV: Beach Resort- Summer", asin "jourNey 101".