Conrado de Quiros

Gikan sa Bikol Sentral na Wikipedia, an talingkas na ensiklopedya
Conrado S. de Quiros
Kamundagan(1951-05-27)27 Mayo 1951
Manila, Philippines
Kagadanan6 Nobyembre 2023(2023-11-06) (edad 72)
TrabahoPeryodista, kolumnista, parasurat

Si Conrado de Quiros, "Quering" apod saiya mga kagurubay niya igdi sa Naga, (27 Mayo 1951 – 6 Nobyembre 2023) sarong Filipinong peryodista, kolumnista asin parasurat. Sa mga dekada na siya nagsusurat, nabantog siya komo sarong paramasid sa politika nin Filipinas na mapanas, mahaldat asin hararom kun makakomento, asin dakul an nag'aantabay sa saiyang kolum na "There's the Rub", regular nagluluwas, enot sa Philippine Daily Globe (1987) dangan saiyang ilinipat sa Philippine Daily Inquirer (1991).

Sabi ni Butuyan "An semana dai dapat mag'agi na dai kita magtaong umaw sa sarong parasurat na hararom nanggad nakaimpluwensya sa dakulon na mga parabasa sa panahon tang ini, na nagtalikod na sa kinaban. Poon 1987 abot 2014, si Conrado de Quiros nagsurat nin opinion kolum tituladong “There’s The Rub” na nagtaong inspirasyon, nakakasugot, nakaka'urag, nakataong linga asin tinutuya' mga tawo, an gobyerno, an nasyon asin an uniberso..... kan si de Quiros nagsusurat sa Inquirer, siya nakakapaluwas nin mga opinion nin apat na surunod na aldaw sa laog nin semana.... na dai ko kaya, saro sana nasusurat ko sa laog nin semana." tinaram pa ni Joel Ruiz Butuyan, kagsurat kan kolum na Flea Market of Ideas sa peryodikong Philippine Daily Inquirer.[1]

Buhay/Edukasyon[baguhon | baguhon an source]

Si Conrado S. de Quiros namundag kan 27 Mayo, 1951 sa Manila, alagad nagdakula sa Siyudad nin Naga asin nagklase nin sekundarya sa Ateneo de Naga. Naggradwar sa haiskul na siya an valedictorian, kan Ateneo Batch '68.[2][3]

Siya nag'entra sa Ateneo de Manila University (AdeMU) sa full schnolarship ta palibhasa siya an valedictorian kan haiskul. Siya "pinapondo" pagklase sa Unibersidad na ini ta deklarado siyang radikal na aktibista. Dai na siya nagbalik sa kolehiyo na taposon an pagklase. Pakatapos kan inapod na People Power siya nagin peryodista sa Manila Chronicle, hasta naalok siyang magtrabaho sa Philippine Daily Globe kan 1987.[4]

An pamilya niya dati nagerestar igdi sa kalye Dimasalang sa Siyudad nin Naga asin arapodan saiya kan saiyang mga kagurubay asin mga amigo, "Quering". Mala ta sinasasbi niya an "first language " niya Bicol asin an hometown niya mayong iba kundi an syudad nin Naga.[5]

Karera[baguhon | baguhon an source]

Si De Quiros nagpoon kan saiyang kolum na There’s the Rub kan 1987 sa Philippine Daily Globe alagad kan 1991, saiyang ilinipat sa Philippine Daily Inquirer. Kan 2014 siya nagpahingalo sa pagsurat gibo sa rason medikal.[6] An saiyang mga editoryal direktahan kun makatuyaw asin may sima' sa saiyang mga pinapatamaan. Mala ta kan nagkomento siya dapit sa pagkapresidente ni dating Presidente Gloria Macapagal sinabi niya na an "tunay na kamugtakan kan nasyon"...pinano-pano niya an espasyo sa saiyang kolum nin anas sanang "Hello, Garci...", na sarong padaprig kan eskandalong nagputok kan reeleksyon ni Macapagal kan 2004.[7] Sa pagsurat niya sa kolum kun ano daa an malalaoman sa Administrasyon kan karibal ni Arroyo na si Ferando Poe, Jr., imbes may mga sinambit siya, iwinalat niya an saiyang kolumm na mayo nanggad ni anong naguhit, na nagpapamate siya na mayo man ngani magigibo an administrasyon Poe ta dinaog na sa pagdaya kan kalaban.[8]

Si De Quiros nagsurat magkapirang libro kabali an Dead Aim: How Marcos Ambushed Philippine Democracy, na nagtrato kan diktaduryang Marcos; Tongues on Fire, an kadamotan kan saiyang mga platika; asin Flowers from the Rubble saka Dance of the Dunces, katiriponan kan saiyang mga sinurat sa kolum sa peryodiko.[7]

Si De Quiros nagadan kan 6 Nobyembre 2023, sa edad na 72.[6] An saiyang pagkagadan pigpatotohanan kan saiyang tugang na si Paul kan banggi mansana.[9]

Mga piling sinurat[baguhon | baguhon an source]

  • Flowers from the Rubble: Essays on Life, Death and Remembering (1990)[6]
  • Dance of the Dunces (1991)[6]
  • Dead Aim: How Marcos Ambushed Philippine Democracy (1997)[6]
  • Tongues on Fire (2007)[6]
  • The February Revolution: Three Views [10]
  • The Bird-Catcher was a Poet: The Life and Passion of Eduardo A. Makabenta Sr.,[11]

An duwang sa hurihan sinurat niya katuwang an ibang mga parasurat.

Mga Pasib[baguhon | baguhon an source]

  • Best Column, Catholic Mass Media Awards (1993)[12]
  • Rotary Journalism Award for Print (1999)[13]
  • Best Opinion Piece, Society of Publishers in Asia Editorial Excellence Award (2003)[14]
  • Hall of Fame Award for Opinion Writers, Rotary Club of Manila (2004)[15]


Hilnga man[baguhon | baguhon an source]


Toltolan[baguhon | baguhon an source]

  1. ↑ https://opinion.inquirer.net/167967/conrado-de-quiros-a-homage. Kinua 2023-11-11.
  2. ↑ Ateneo de Naga Graduation Yearbook: TRIUMPH '68, p. 85. Kinua 2023-11-08.
  3. ↑ Valedictorian.[1] Kinua 2023-11-11
  4. ↑ https://www.facebook.com/groups/474761559234629/. Kinua 2023-11-12.
  5. ↑ https://opinion.inquirer.net/167967/conrado-de-quiros-a-homage. Kinua 2023-11-11.
  6. ↑ 6.0 6.1 6.2 6.3 6.4 6.5 "Longtime PDI columnist Conrado de Quiros has died – brother". Philippine Daily Inquirer. 6 November 2023. 
  7. ↑ 7.0 7.1 "Journalist Conrado de Quiros passes away". ABS-CBN. 6 November 2023. 
  8. ↑ "Veteran journalist Conrado de Quiros dies at 72". PhilstarLife. 7 November 2023. 
  9. ↑ "Veteran journalist Conrado de Quiros dies". Rappler. 6 November 2023. 
  10. ↑ [2] Kinua 2023-11-11
  11. ↑ [3] Kinua 2023-11-11
  12. ↑ [4] Kinua 2023-11-11.
  13. ↑ [5] Kinua 2023-11-11.
  14. ↑ [6] Kinua 2023-11-11.
  15. ↑ [7] Kinua 2023-11-11.

Plantilya:Metro Manila Newspapers

Kinua sa "https://bcl.wikipedia.org/w/index.php?title=Conrado_de_Quiros&oldid=266356"