Enrique Dupuy de Lôme
Si Enrique Dupuy de Lôme[1](1851–1904) sarong embahador Espanyol na nadestino sa Estados Unidos. Sa inapod na Surat De Lôme na sinurat niya kan Desyembre 1897, saiyang pigtuya'-tuya' si Presidente William McKinley, piglamuda' an mga polisya kaini asin sinabing si Mckinley sarong maluyang presidente na hanap sana man an omaw kan publiko. Sinabi niya pa sa surat na anoman na negosasyon sa mga rebeldeng Kubano mayong padudumanan. An surat nabagat kan mga rebeldeng Kubano. Kan Pebrero 9, 1898 bigla nagluwas an surat sa mga Amerikanong peryodiko. Sinasabing saro pa ini sa nakatolod kan pagputok kan Espanyol-Amerikanong Gera.[2]
Kaamayan kan buhay
[baguhon | baguhon an source]Namundag sa Valencia, Espanya, si Enrique Dupuy de Lôme gikan sa pamilyang may dugong Pranses na nagbanwa na sa Espanya. Pakatapos niya kan saiyang adal sa abogasya sa Unibersidad nin Madrid kan 1872 si Dupuy de Lôme naglaog sa trabahong diplomatiko. Sa mga masurunod na mga taon kaini siya nagkapot nin iba-ibang pwesto sa manlaenlaen na lugar arog kan Hapon, Belhika, Uruguay, Argentina, Estados Unidos, Alemanya, asin Italya. Taon 1892 siya natokahan na Ministro Espanyol sa Estados Unidos.
