Eva Hart

Si Eva asin pamilya niya

Pagbalik niya asin ina niya sa Inglatierra (ina niya sa too, nakaitom)

Si Eva Miriam Hart (31 enero 1905 - 14 Pebrero 1996) saro sa nakaligtas kan an RMS Titanic naglubog kan Abril 15, 1912.

Mga enot na taon

Si Hart namundag kan 31 enero 1905 sa Ilford, London, Inglatierra ki Benjamin Hart asin Esther Bloomfield. Aking solo siya. An saiyang ina dati nang nakapangagom asin nagkaigwa nin magkapirang mga aki na nagkagaradan saradit pa. Si Eva nag'adal sa St. Mary's Convent (ngonyan St. Mary's Hare Park) sa Gidea Park, Essex. Kaamayan kan 1912, si Benjamin nakaisip na darahon an saiyang pamilya asin maghubo sa Winnipeg, Manitoba, kun saen an plano niya magbukas nin sarong botika.

Pagsakay sa RMS Titanic

Si Hart pitong taon pa sana kan siya asin saiyang mga magurang nagsangkay sa Titanic komo mga pasaherong ordinaryo kan 10 Abril 1912 sa Southhampton, Inglatierra. Kuta sinda nakalistang magsakay sa bapor na Philadelphia alagad huli sa welga kan sarong union sa Southhampton kan panahon na idto, sinda asin dakul na pasahero sa nasabing bapor, ihinubo na magsakay sa Titanic. Sinasabing grabe an handal asin takot kan saiyang ina asin dai mapaontok, ribaraw an isip kan madangog niyang dakul nagsasarabi na dai nanggad malulubog an Titanic huli sa kadakulaan kaini. Sabi daa kan saiyang ina an mga paabaw-abaw na ini garo sarong paglanghad sa Diyos. Huli kan katakotan na ini, an ina niya naturog sana kun aldaw, kun banggi mata toltol na nakabado.

Si Eva turog kan an Titanic naglamasa sa sarong iceberg alas onse kwarenta nin banggi, petsa katorse kan Abril. An saiyang ama tolos naglaog sa cabin asin inalerto siya asin ina niya, dangan siya pinatos sa tamong saka isinakat duman sa mga kaagan salbabida asin mga baroto. Ikinaag sinda sa barotong pangligtas numerado 14 asin sinabihan si Eva na "magtoltol siya saka magkapot sana sa kamot kan saiyang ina". Iyo na sana idto pakahiling niya sa saiyang ama asin iyo na sana idto an nadangog niyang tinaram kan saiyang ama.

Siya asin an saiyang ina napurot kan bapor na RMS Carpathia saka sinda dinara sa Nweba York kan 18 Abril. An saiyang ama natodas asin kun an bangkay niya nakua man, dai na nabisto.

Pakaabot sa Amerika, siya asin an ina niya nagbalik man tolos sa Reyna Unido asin saiyang ina nag'agom liwat. Si Hart daing ontok na sinusumpong nin bangongot huli kan pangyaring makagiram-giram. Kan magadan an saiyang ina kan 1928 asin siya nag'eedad nang 23, ngani mahale asin mabulong siya kan makuring pabalik-balik na om'om, an ginibo niya buminalik siya sa dagat asin linaom niya an sadiri sa sarong kabin kan bapor asin duman nag'ontok nin apat na aldaw sagkod na mawara an mga bangongot.

Sa saiyang pagkagurang, maigot na tinataboga niya an mga responsible kan pagpalayag kan RMS Titanic huli ta nagpadagat kulang-kulang daa an mga salbabida asin baroto na pwedeng sakayan sa oras nin remalaso.

Mga panluwas na takod

• [1] Kinua 12-2-16. Video YouTube. Istorya ni Eva Hart.
• [2] Kinua 12-2-16. Mail On-line. Surat ni Esther na nasaray.
• [3]New York Times.Nagadan sa edad na 91.