Francisco Reyes

Gikan sa Bikol Sentral na Wikipedia, an talingkas na ensiklopedya
Ladawan:Obispo francisco reyes.tif
Si Obispo Francisco Reyes[1]

Si Obispo Francisco Sales Reyes (Enero 30, 1876 - Desyembre 13, 1937) iyo an ika-30 Obispo kan diocesis kan Caceres (1925-1937). Namundag sa Naga, (ngonyan siyudad nin Naga) Camarines Sur, siya sarong pading sekular na nag'adal sagkod nakatapos sa Seminario Conciliar de Nueva Caceres. Siya an ikaduwang Filipino asin ikaduwang Bikolano na nagin obispo sa Simbahan Katoliko Romano sunod ki Obispo Jorge Barlin.

Mga enot na panahon[baguhon | baguhon an source]

An mga magurang niya iyo sinda Cristino Reyes asin Higino Alicante. [2] Pobre sana an mga magurang kaya kan siya hubin pa nagtatabang siya sa paghanapbuhay komo sarong parasingil sa Gutierrez Hermanos, sarong kompanya na an mga may sadiri mga Espanyol.


Karera[baguhon | baguhon an source]

Pakatapos sa halipot na panahon na siya nagtokdo sa seminario, siya natokahan na kura paroko sa Irosin, dangan sa Sorsogon asin pakatapos sa Albay Viejo. Sa mga toka niyang ini, siya nagpahiling nin kabanalan, simpleng pamumuhay asin odok sa boot na paglingkod asin pag-ako kan mga responsibilidad. Orog na sa Albay kun saen naglalakop an Protestanismo, siya mahigos na padi na nataong inspirasyon sa mga katoliko. Huli sa toltol na pag'otob sa katongdan, sa magian na disposiyon sa pakitrato asin simple asin banal na pamumuhay, asin metikulosong pagreparo kan mga kasibotan sa saiyang paroko an papel niya sa Simbahan nagin matagom. Mala ta kan Hulyo 7, 1920, si Obispo McGinley pignombrahan siyang vicario general. Kan nahubo sa diocesis kan Monterey-Fresno sa Estados Unidos si McGinley, siya an natokang administrador apostoliko (Hulyo, 1924) kan mabakante an pwesto sa Caceres. Mala ta pakalihis nin sarong taon, siya na an ginibong obispo sa Caceres.

Yaon sa turno niya na nagdakul an mga nagpapadi na mga seminarista, nagdugang an ingreso sa kaban kan Simbahan asin dakul na inaataman na mga gibong-herak, sa pagmato sa mga nagtitios asin dukha.[3]

Kan Marso 16, 1930, si Obispo Reyes nagsongko sa Roma para sa saiyang pagbisita ad limina sa Santo Papa asin nagbalik siya sa saiyang obispado kan bulan na Oktobre. Kan Pebrero 3-7, 1937 iyo an natongod na grabeng sibot nangyari sa Manila ta iyo an nagin lugar na tiponan kan inapod na XXXIII International Eucharistic Congress asin an mga obispo nadamay na maray sa dakulang trabaho sa pag'andam asin pagpalakaw kan nasabing kongreso. Si Obispo Reyes natongod man na naghehelang na asin maluya na an hawak. Maski siring, dispwesto siya na gibohon an saiyang katongdan asin napabayaan niya an saiyang hawak na magroro'.

Kan Desyembre 13, 1937 siya naotsan ginhawa. Pakatapos nin limang aldaw na paghotad sa laog kan palasyo nin obispado, siya ilinubong sa walang parte mismo kan tangkaan sa simbahan kan Katedral Metropolitan.


Personal[baguhon | baguhon an source]

Sa saiyang karera bilang obispo, sinasabi ni Domingo Abella sa saiyang libro (Bikol Annals) na sobrang boot niya mala ta medyo apektado an pag'admistrar sa obispado, bakong estrikto sa saiyang sakop na kapadian asin huli gayod sa saiyang pagkamatinaong-ganan, dakul siyang pautang sa mga nag-aprobetsa na mayo man intensyon magbayad. Maski siring, an imahe niya iyo an bilang sarong serioso sa trabaho, mahigos, asin haros garo ama sa saiyang mga seminarista na inapod niyang "la niña mis ojos". Sa mga laicos sa dioceses, siya simpleng "Padre Kikoy" asin sa mga sakop niyang padi, inaapod niyang "Noy."


Mga panluwas na takod[baguhon | baguhon an source]

Ginunoan[baguhon | baguhon an source]

  • Abella, Domingo. Bikol Annals, p. 221-26. 1954.Manila. Philippines.

Toltolan[baguhon | baguhon an source]

  1. Retrato sinapi sa Official Penafrancia Souvenir Program , Sept. 20-21 1941, p.9
  2. Abella, Domingo. Bikol Annals. 1954. p.222.
  3. Abella, domingo. bikol annals. 1954. p. 223.