George W. Bush
Si George Walker Bush (namundag 6 Hulyo 1946) nagserbi komo ika-43 na Presidente kan Estados Unidos poon 2001 abot 2009. Siya an ika-48 Gobernador kan Texas poon 1995 sagkod 2000 bago siya nagin Presidente kan magsumpa kan Enero 20, 2001.
Si Bush iyo an pinaka-matuang aki kan ika-41 Presidente kan Estados Unidos na iyo si George H. W. Bush. An saiyang ina iyo si Barbara Bush. Kan maka-gradwar sa Yale University, si Bush nagtrabaho sa negosyo sa asayti kan saiyang pamilya. Inagom niya si Laura Welch kan 1977 asin nagdalagan kuta para Representante sa Kongreso kan Estados Unidos alagad dai nakalusot. Kan 1994, nadaog niya sa eleksyon para Gobernador kan Texas si Ann Richards. Si Bush nagkandidato sa irarom kan bandera kan Partido Republikano kan taon 2000 para presidente asin ginana niya an botong elektoral alagad nadaog sa botong popular kan si Bise-Presidente Al Gore.
Walong bulan pa sana sa saiyang pagtukaw, kan Setyembre 11, 2001, an teroristang pag-atake sa Estados Unidos mangirhat na nangyari. Huli kaini, nagbungsod si Bush nin lakopan asin pangkinaban na Paglaban sa Terorismo, dangan pigboot an pagsakyada sa Afganistan kan taon mansanang iyan, asin an pagsakyada pa sa Irak kan taon 2003.
Dagdag pa sa mga isyu sa seguridad nasyonal, ipigtolod ni Bush an polisya sa ekonomiya, pag'ataman sa salud, asin an reporma sa seguridad sosyal. Nagpirma siya na magin ley an pagtaras sa mga buhis, an No Child Left Behind Act, asin an ley sa pagtaong benepisyo para sa mga maedad na dapit sa pagbakal bulong. An saiyang termino nag-ukag na gayo nin debate manongod sa imigrasyon asin seguridad sosyal.
Si Bush guminana sa saiyang re-eleksyon laban sa kandidato kan Partido Demokrata na si John Kerry kan 2004 na nakua niya an 50.7% kan "botong popular" baing sa kalaban niyang 48.3%. Paka-eleksyon, naglolobo na an mga tuyaw sa saiyang administrasyon. Kan 2005, an saiyang administrasyon natuyawan na maray sa pagkapot kan probleman bunga kan si Bagyong Katrina. Kan Desyembre 2007, nakalaog an Estados Unidos sa dai pighuhunang recession (pagkupos kan aktibidad ekonomika) na sinasabing iyo an ikaduwang pinakahaloy na nakita poon kan Ika-2 Gerang Pangkinaban. Resulta kaini, napiritan an saiyang administrasyon na direktang kapotan asin pagbo'tan an ekonomiya, na nagpapasar nin mga ley sa pagbuhat asin pagpakusog kan naglulupog na ekonomiya.
Sinasabi na si Bush popular man sa kalawigan kan enot niyang termino pagka-Presidente. An saiyang popularidad nagsolnop na gayo kan patapos na si ika-duwa niyang terminong pagtukaw.
Kaamayi kan buhay
[baguhon | baguhon an source]Si Bush namundag sa New Haven. Connecticut kan Hulyo 6, 1946 sa mag'agom na sinda George Hubert Walter Bush asin Barbara Pierce. Pinadakula siya sa Midsland asin sa Houston, Texas kasararo niya an apat niyang tugang na sinda Jeb, Neil, Marvin asin Dorothy. An lolohon niya na si Prescott Bush, nagin Senador kan Estados Unidos na gikan Connecticut. An ama niya, si George Hubert Walter Bush, nagserbi komo Presidente kan Estados Unidos kan 1989 abot 1993. Si Bush ika-4 man na kapinsanan lima karayo ki Franklin Pierce, na Presidente kan 1853 abot 1857.
