Gregorio Honasan

Gikan sa Bikol Sentral na Wikipedia, an talingkas na ensiklopedya
Jump to navigation Jump to search

Si Gregorio Ballesteros Honasan II (namundag Marso 14, 1948), na bisto man sa arapodan na Gringo Honasan, sarong dating tauhan sa militar sa Filipinjas alagad nagin aktibo sa pulitika. Siya nagpapel na gayo sa 1986 EDSA Revolution na iyo an pangyayaring nagbungkaras asin nagrumpag kan diktadura ninsi Presidente Ferdinand Marcos. Siya namoon man sa magkapirang pagngata' na itumba an administrasyon ni Corazon Aquino. Si Presidente Fidel Ramos pigduholan siya nin indulto kan taon 1992. Naglaog siya sa pulitika asin nagin senador kan 1995 abot 2004, asin ta liwat nagdalagan sa parehong katongdan asin nakaluwas na magsirbe poon 2007.

Si Honasan nagdadalagan ngonyan para bise presidente sa eleksyon presidensyal 2016 kan Filipinas.

Pamilya[liwaton | liwaton an gikanan]

Siya namundag sa Siyudad nin Baguio sa mga Bikolano niyang mga magurang na sinda Koronel Romeo Honasan asin Alice Ballesteros, sarong maestra. An napangagom niya iyo si Jane Umali kan Pagsanjan, Laguna, sarong medical technologist sa bokasyon asin sarong interior designer sa pag'adal. Igwa sinda nin limang aki asin apat na mako-apo.[1]

Edukasyon[liwaton | liwaton an gikanan]

Siya nag-adal elementarya sa San Beda College sa Manila kun saen siya pirming yaon sa honor list mala ta hale sa grado 4 isinakat tolos sa grado 6. Dangan siya pinaadal sa Dominicxan School sa Taipei, Taiwan. Kan magtapos siya sa Don Bosco High School sa Mandaluyong, siya may onra man giraray. Sa Unibersidad kan Pilipinas, nagkua siya nin Ekonomiks dangan naglipat sa Philippine Military Academy kun saen naggraduar siya komo "Class Baron", kagresibi kan pinakahalangkaw na leadership award. Kan 1981 siya nagkua nin Master's Degree sa Business Management sa Asian Institute of Management. Digdi nakua niya an dakulang onra naman huli sa tesis masteral na ginibo niya.[2]

Buhay militar asin mga Pag'onrang Iginawad[liwaton | liwaton an gikanan]

An saiyang inagihan bilang sarong soldados makolor man asin tunay na nasapag sa mga laban kun saen nataya an saiyang buhay. Nag'agi siya sa mga enkwentro sa kahiwasan kan Filipinas, sa Luzon, Visaya asin Mindanao asin huli kaini nagawaran mga medalya, mga pasib, mga dekorasyon asin mga pagmidbid kan saiyang kaisogan sa aksyon: tolong Distinguished Conduct Stars, Gold Cross Medals, Wounded Personnel Medals pangyari kan pagtapsok niya sa mga kombat. Kan 1985 binisto siya komo saro sa Ten Outstanding Young Men (TOYM) kan Philippine Jaycees. Kan 1986, daing ariano na nagpapel bilang saro sa nangengenot na lider kan RAM (Reform the Armed Forces Movement) nagtolod kan EDSA Revolution sa paglitik asin pagpawarang suporta sa gobyerno militar itinindog ni Presidente Marcos. Siya man nagawaran kan Presidential Commendation Medal for Government Service ni Presidente Corazon C. Aquino.

Serbisyo sa gobyerno[liwaton | liwaton an gikanan]

Kan siya nagin senador kan 1995, masabi na siya nanggad an pinakaenot na kandidatong tunay na independienteng nagdalagan mayo nag'apil sa arinman na partido pulitikal asin guminana sa sarong eleksyon nasyunal. Naelehir siya liwat kan 2001, asin naotro ini kan taon 2007. Kan eleksyon 2013, guminana asin nakaluwas siya liwat bilang senador, alagad nagdalagan siya sa irarom kan partidong UNA (United Nationalist Alliance) asin nasikwit niya an ika-12ng pwesto sa mga nanggarana.[3]. Si Honasan nagtukaw na nin tolong termino bilang senador sa laog nin mag'18 taon, sundo' 2016.

Sa sibot niya sa Senado, siya nag'ama asin katuwang nag'ama nin mga importanteng akta, arog kan Clean Air Act of 1999, Clean Water Act, National Security Policy, Disaster Risk Reduction Management Act of 2009, Solid Waste Management Act of 2000, asin kan Comprehensive Agrarian Reform Program Extension with Reforms Law (CARPER). Saiya man pinagbusol an Freedom of Information Act na nakapasar na ngane sa Senado, an National Mapping and Resource Authority Law asin an Land Use Act. Si Senador Honasan nagproponer man kan inapod na Mini-Marshall Plan for Mindanao ngane mapalukso an pag'uswag sa ekonomiya, katoninongan asin kabisayan, asin pagkaburonyog pulitika sa Mindanao. Pighihiling na ini makakabulong na gayo asin masumpo' kan siniglo nang siriplingan asin terorismo sa rona na ini.

Sa ika-16 na Kongreso, si Senador Honasan nagin naman Chairperson kan Senate Committees on Agrarian Reform, Public Order and Dangerous Drugs, asin Public Information and Mass Media. Siring man, nagtukaw bilang pamayo kan tolong oversight committee, an Congressional Oversight Committees on Agrarian Reform and Dangerous Drugs, asin kan Joint Oversight Committee on the Human Security Act. Siya Vice-Chairperson of the Senate Committees on Local Government, Civil Service and Government Reorganization, Health and Demography, National Defense and Security, Public Works, Rules, and Amateur Sports Competitiveness asin kaapil sa 19 mayor asin permanenteng mga komite asin sa 10ng oversight committee.

Mga panluwas na takod[liwaton | liwaton an gikanan]

  • [1] Interbyu ki Gringo Honasan. Kinua 22-09-15.
  • [2]Resulta kan 2013 eleksyon. Kinua 22-09-15.
  • [3] Opisyal na Resulta kan 2013 Eleksyon para Senador Pinaluwas kan COMELEC. Kinua 22-09-15.

Toltolan[liwaton | liwaton an gikanan]