Hindou Oumarou Ibrahim

Si Hindou Oumaro Ibrahim sarong aktibista sa kapalibotan asin geograpo gikan sa Chad. Siya an tagapamayo kan Association of Peul Women and Autochthonous Peoples of Chad (AFPAT) asin nagserbing kapwa-tagapadalagan kan World Indigenous Peoples' Initiative and Pavillion sa COP21, COP22 asin COP23.

Aktibismo asin adbokasiya

Si Ibrahim sarong aktibista sa kapalibotan na nagtatrabaho para sa saiyang banwaan, an Mboraro sa Chad. Siya nag-adal sa kabeserang siyudad kan N'Djamena asin minapuli sana kun bakasyon para sa mga katutubong mga taga-Mbororo, na tradisyonal na mga paraomang nomadiko, nag-aataman asin nagpapakadola nin baka. Durante kan saiyang edukasyon, naaraman niya an mga paagi kun pano siya nagin diskriminado bilang sarong katutubong babae asin man sa mga paagi kan saiyang mga kapareho sa Mbororo na napapalaen sa edukasyonal na mga oportunidad na nakua niya. Kaya kan 1999, siya nagtugdas kan Asosasyon nin mga Indigenous Peul Women and Peoples of Chad (AFPAT), sarong organisasyon na komunidad nasentro sa pagpalakop kan mga katanosan nin mga babae asin kababaihan sa komunidad nin Mboro asin nakaiinspirar nin liderato asin adbokasiya sa proteksyon sa kapalibotan. An organisasyon nag-ako kan lisensya sa pag-operar kan 2005 asin poon kaidto nagpartisipar na sa mga internasyonal na negosasyon sa klima, pagpangataman kan pag-uswag, biodibersidad, asin proteksyon kan kapalibotan.

An saiyang pagkonsentrar sa pagtulod sa kapalibotan naggigikan sa saiyang eksperyensiya mismo kan mga epekto nin pagbago kan klima sa bilog na kinaban sa komunidad nin Mbororo, na nagsasarig sa natural na rekursos para sa saindang kaligtasan asin sa kaligtasan man kan mga hayop na inaataman ninda. Sa laog nin dakol na taon, naeeksperyensiyahan ninda an mga epekto kan pagmara kan Danaw nin Chad; an danaw sarong mahalagang marhay na gikanan nin tubig para sa mga tawo sa Chad, Cameroon, Niger asin Nigeria, asin ngunyan 10% na sana ini kan orihinal na hiwas poon pa kan mga taon nin 1960. Sa sarong nasusurat na testimonya sa Internasyonal na Organisasyon para sa Migrasyon, tinawan doon ni Ibrahim na an saiyang banwaan, asin an mga komunidad nin mga katutubo na arog niya, "direktang mga biktima nin pagbabago sa klima," na napiritan na bayaan an sadiri nindang kadagaan sa paghanap sa mga makakasustenir sa saindang pamumuhay. Sa patotoong iyan, siya nagtaram man manungod sa mga resulta nin pagbabago sa klima, na huli kaiyan nagin kahirak-hirak an mga komunidad nin emigrante.

Si Ibrahim nagsurat dapit sa kahalagahan kan pagmidbid sa mga deretso kan mga katutubo, kaiba an Quartz and the World Economic Forum's Agenda. Sarong partikular na pagmakulog niya iyo an an legal na deretso kan mga katutubo na magsadiri asin pamahalaan an kadagaan na iniistaran ninda. An siring na legal na mga deretso naggagarantiya na an komunidad nin mga katutubo igwa nin legal na ahensiya sapag-uswag kan ekonomiya na tibaad makapahali sa sainda, arog baga kan mga proyekto nin pagmina nin gasolina, pagmina, asin mga planta nin hidropower.

Si Ibrahim nakipagtabangan sa UNESCO asin sa Indigenous Peoples of Africa Coordinating Committee (IPAC) sa sarong proyekto tanganing ma-3D an mapa kan desyertong rehiyon kan Sahel, kun sain apresenteng nag-iistar an 250,000 na Mbororos na nagsasarig sa subsistance farming. Pinagsaro kan teknolohiyang 3D mapping asin an katutubong siyentipikong kaaraman tanganing magkaigwa nin kasangkapan sa pagsustenir kan kapalibotan asin pagtao nin poder sa mga katutubong tingog - partikularmente sa mga babae - tanganing gumibo nin mga desisyon sa pagplano para sa ngapit nin pag-adaptar asin pagliliwat kan klima. Sa sarong interbyu sa BBC's 100 Women project, si Ibrahim nagsabi: "Lambang kultura igwa nin siyensiya. Kaya mahalaga talaga na yaon duman an katutubong boses."

Kan 2016, napili si Ibrahim na magrepresentar an sosyedad sibil sa pagpirma kan historikong Paris Climate Agreement kan Abril 22, 2016. Sa saiyang pahayag sa pagpirma, siya nagsabi: "An pagbago kan klima nadadagdagan an kadukhaan aroaldaw, na napiritan an dakol na bayaan an harong para sa mas marahay na ngapit."

Kan 2019, nagin siyang saro sa 17 katawo para manombrahan bilang parasuportar kan Sustainable Development Goals kan United Nations. An SDG na kompuwesto nin 17 mga katuyohan, na inaprobaran kan 2015, iyo an paagi nin paghihingowa kan United Nations na gibohon na mas marahay an satong kinaban mantang an mga paratulod ninombrahan na tumabang sa pagpalakop nin pakaaram asin pagsiyerto na an mga katuyohan na ini nagigibo sa paagi saindang mga katungdan.