Irik

An irik iyo an praktis nin pag'arit kan parte nin buhok, an iba sa tongod sana kan alimpoporo, an iba pinopormang garo sarong takob kan soro o bagol sa buhok na an natatada na sana iyo an buhok na palibot sa payo sa may kurit kan itaas nin talinga. Ini praktis kan ibang mga simbahan Kristiyano, mga Budhistang monghe asin kan mga padi o deboto sa mga templong Hindu sa pagpahiling asin bilang simbolo nin pagbabanal asin pagsisikwal kan kinabanon na kaaraan.

An ginikanan kan praktis nin pag'irik bakong gayong malinaw asin dai uso kan antigong panahon. Alagad, may tolong porma nin pag'iirik kan ika-7 asin ika-8ng siglo:

An Oryental, na hinihinako' an otoridad ni San Pablong apostol (Gibo 18:18) asin ini inaarit an bilog na payo. Ini naobserbahan sa Subanganon na simbahan, kabali na diyan an Subanganon na Simbahan Ortodoxia asin an Subanganon na Simbahan Katoliko. Kaya kan si Teodoro kan Tarsus, na naguno niya an saiyang adal sa Bisantinong Asya Menor asin igdi nakua niya an siring na irik, siya nagpatalubo nin buhok sa apat na bulan ngane mairikan naman susog sa ugaleng Romano, asin maordenan bilang Arsobispo kan Canterbury ni Santo Papa Vitaliano kan 668.

An Seltiko, an eksatong hitsura iyo an 1.) pag'arit kan buhok, na kabanga sana, hanggan sa kurit poon sa sarong talinga abot sa ibong na talinga, 2.) an pag'arit sa pormang triangulo, an panas sa atubangan asin napasiring sa duwang gilid kan talinga, An Seltikong irik na ini inuusar sa Irlandya asin Gran Britanya asin ini parte kan mga kinaugalean kan mga Kristiyanong Seltiko. Ini ikinakaongis na gayo kan mga kristiyanong kaapil sa kustombreng romano asin sinasabi ninda na an praktis na ini minukna kan si eretikong Simon Magus.

An Romano, ini an inaarit sana iyo an sa may alimpoporo asin pormang talidong na sabi siring sana sa pakadakula nin hostya. Ini sinasabi na nagpoon an praktis ki San Pedrong apostol, asin ini an uso sa Rito Latino kan Simbahan Katoliko. Totoo dai naman obiligado an pag'arit na siring, an praktis kumon pa sa mga Frayle sa Rito Romano, siring kan Pransiskanong Misionero nin Palabra Eternal.