J. Allen Hynek

Gikan sa Bikol Sentral na Wikipedia, an talingkas na ensiklopedya
Maglukso sa: paglibotlibot, hanapon
Josef Allen Hynek
Allen Hynek.jpg
Kamundagan (1910-05-01)Mayo 1, 1910
Chicago, Illinois
Kagadanan Abril 27, 1986(1986-04-27) (edad 75)
Scottsdale, Arizona
Trabaho
Agom Mimi Curtis
Mga aki
  • Scott
  • Roxane
  • Joel
  • Paul
  • Ross

Si Josef Allen Hynek (Mayo 1, 1910 – Abril 27, 1986) sarong astronomo, propesor, asin ufologo. Siya mas naroromdoman kan saiyang mga pagsusukit dapit sa mga UFO. Si Hynek nagin konsultahan kan mga pag'aadal manongod sa UFO na ginibo kan U.S. Air Force sa tolong sunod-sunod na proyekto: enot sa inapod na Project Sign (1947–1949), sunod sa Project Grudge (1949–1952), asin sa Project Blue Book (1952–1969).

Enot na mga taon[liwaton | liwaton an gikanan]

Si Hynek namundag sa Chicago sa mga magurang na tseko. Kan 1931, si Hynek nagkamit nin B.S. sa University of Chicago. Kan 1935, nakumpleto niya an saiyang Ph.D. sa astrophysics sa Yerkes Observatory. Siya nagbali sa Department of Physics and Astronomy sa Ohio State University kan 1936. Siya nag'adal nin espesyalisasyon kan inapod na stellar evolution asin kan pagbisto kan mga spectroscopic binary stars.

Atitud dapit sa UFO[liwaton | liwaton an gikanan]

Kan mayo na siya katakod sa pag'aadal na ginibo kan gobyerno, siya nagsadiring magkondukta nin mga pagsusukit igdi, na binilog niya an inapod na "Close Encounter" classification system kun saen inaagi sa maingat na analisis sayantipiko an anoman na mga report o sumbong dapit sa UFO, asin orog na an mga gira kan agi nin mga UFO.

Kan enot an saiyang pagtubod an mga nakaabot na mga report o nahihiling kan mga testigo anas sana man paghuna-huna asin mga imahinasyon o sala sana man na pagbisto kan bagay na naglalayog. An mga soboot nagkakahiriling na mga naglalayog na mga bagay sa ayre pwede mansanang mga eroplano, mga balon o mga pang-espasyong palayog kan gobyerno.

Kaya kan mga enot na taon na siya imbwelto sa mga proyekto kan gobyerno, siya masasabing sayod na parapahimutik. Sabi niya kadaklan kan mga pangyayaring UFO masasabi mansana bilang mga penomenong may simpleng paliwanag asin ta sa saiyang libro pigpublikar kan 1977, siya ganado sa pagtao kan siring na pagpahimutik ta orog na an Air Force daa iyo man an piglalaom na isasabi niya.

Paghira nin pagtubod[liwaton | liwaton an gikanan]

An opinion ni Hynek luwayluway na naghira. Paka'eksamen niya kan ginatos na mga report dapit sa UFO sa pirang dekada, na kaiba na diyan an mga pig'usip kan mga matutubdan na mga testigo arog kan mga astronomo, mga piloto, mga pulis, asin mga militar, nakaabot siya sa pagtubod na magkapirang mga report may tunay na ebidensyang sa pagkatotoo kan pigsusumbong na mga pambihirang nahihiling.

Saro pang pag'isog kan saiyang opinion iyo nangyari kan siya nagkondukta nin impormal na pag-ino'ino sa kapwa niya mga astronomo kan mga taon 1950. Sa 44 mga astronomong hinapot niya, lima (sobra 11 porsyento) nagtuga' na sinda nakahiling mga obheto sa espasyo na mayo pwedeng ipaliwanag susog sa syensia. An mga astronomong ini bakong lakop na pighiras ninda an saindang mga nadukayan sa espasyo huli ta takot na sinda pagsudyaon o pagkodesyahan o ma-raot an saindang reputasyon o mga karera. Maliban daa ki Clyde Tombaugh, na siya an nakadukay kan planetang Pluto, ta ini sayod na pigpahayag an saiyang mga na'siripan sa hiwas kan kalangitan na mga bagay naglalayog na daing paliwanag kun ano baga ini. Saka sa paghiling ni Hynek mas matutubodan an mga tinataram kan mga astronomong ini ta may toltol na adal asin hararom na dunong sa mga bagay na sinasambit ninda na saindang nasisiripan sa kalangitan. Si Hynek man medyo suya asin nariribaraw kan mga atitud na arogante asin pasimpleng pagsikwal kan mga report ta sarado man an isip kan mga ini daa asin mayo man nataong seryosong pag'ogid sa report dapit sa UFO.

Amay na ebidensya kan paghihira ni Hynek sa opinion niya, nagluwas sa saiyang artikulong sinurat kan 1953 sa isyu kan Abril 1953 kan Journal of the Optical Society of America titulado "Unusual Aerial Phenomena," na igdi napalaman an masabing mapanas na binutsan na tataramon niya:

"...Pangtutuya' o pang'iinsulto bakong parte kan metodo sayantipiko asin an publiko dapat dai pagtukdoan na an mga ini tamang proseso. An padagos na pagbulos nin mga report, orog na kan dakul na mga nakamasid na personang mayong rason na mahambog, naghahagad nin pag'uusisa bilang responsibildad asin obligasyon sa parte kan syensia. Ano (daa) igwa lamang tondag sa mga report na ini na maninigo ta'wan nin toltol na atensyon kan mga sayantipiko? O, kun mayo man, bako daw obligasyon na dapat magtaram na sa publiko bako sa mga tataramon na nantutuya' kundi sa seryosong paagi sa pag'otob na dai mawara an tiwala kan publiko sa syensia asin sa mga sayantipiko?"

Pagbirik sa panindogan[liwaton | liwaton an gikanan]

Kan an proyektong Blue Book sinara na, saka lang si Hynek hayag-hayag nang nagsabi na dai pwedeng pagpahimutikan an katotoanan kan UFO asin may solido asin tunay na mga ebidensya na nangyayari talagang nahihiling ini sa kalangitan asin may mga girang nawawalat na mayong ibang konklusyon kundi totoo an mga ini.

Kagadanan[liwaton | liwaton an gikanan]

Kan Abril 27, 1986, si Hynek nagadan huli sa tumor sa hutok. Nagadan siya sa Memorial Hospital sa Scottsdale, Arizona. Edad niya 75. May nawalat siyang agom si Mimi, asin limang aki na iyo sinda Scott, Roxane, Joel, Paul, asin Ross, saka sarong makuapo.


Toltolan[liwaton | liwaton an gikanan]








I