Jesus Antonio Carpio

Si Jesus Antonio Matamorosa Carpio (Oktobre 25, 1931 - Mayo 26, 2010) sarong Bikolanong abogado, parasurat, komentarista sa radyo, maestro, dating soldados. Siya nagin direktor kan National Bureau of Investigation (1986-1989).

Pamilya

Si Carpio kan Mayo 4, 1954, naagom si Bernardita Zalazar y Alcantara (1933-1994) na tubong syudad nin Lucena. An pagsasaro ninda nagbunga nin 14 aki, tolong babae asin onseng lalake. An duwa kaini nagin mga padi, na iyo si Padre Juan Pablo asin si Msgr. Jose Roberto; an apat nagin mga abogado na iyo sinda Jose Maria, Jesus Antonio, Jr., Jesus Fernando asin Juan Luis. An sarong aki niyang babae na si Dr. Maria Victoria asin an agom kaini (Dr. Christopher C. Bernido) iyo an mga Filipinong 2010 Ramon Magsaysay Awardee huli sa mga pambihirang kagibohan ninda sa pagtokdo' kan syensia sa minukna nindang Research Center for Theoretical Physics sa Bohol.

Kan Marso 10, 1994, an saiyang pamilya nagawadan nin onra ta minidbid na "Model Filipino Family", sa lindong kan Angkan Awards na pig-amaan kan World Family Institute, Inc. asin an paggawad kan award ginibo sa Heroes Hall, Malacanang Palace. An agom niyang si Bernardita saro man na "Gintong Ina Awardee".

Edukasyon asin Karera

Si Carpio nagkua kan duwang taon kan saiyang abogasya sa UP College of Law asin tinapos niya sa San Beda College of Law. Kan nagkua siya kan Bar Exam kan 1962, siya naglugar ika-14.

Si Carpio kan mga enot na taon nagin sarong Army Lieutenant dangan Kapitan asin siya aktibong nagkampanya laban sa Hukbalahap mga taon 1950-60.

Kan abogado na siya, nagpraktis siya sa syudad kan Naga kun saen nagkaag siya kan saiyang opisina. Sarong tawo na de prinsipyo asin nagpapahalagang gayo sa hustisya asin derecho nin sarong tawo, siya nagtindog para sa mga naaapi asin sa mga biktima nin mga pag'aabuso orog na kan militar.

Kan pigdeklara an Ley Militar kan Septyembre 21, 1972, siya an saro sa mga taga-Nagang ikinulong tolos huli sa hayag niyang oposisyon sa diktadura ni Pres. Ferdinand Marcos. Bilang parasurat asin komentarista, malinaw asin hayag an pagkontra niya sa administrasyon ni Marcos. Kairiba niya an ibang pang peryodista arog ki Abogado Luis General, Jr., Abogado Alfredo Tria, Ramon Tolaram asbp. Sinda ikinonkon sa Kampo Canuto sa Pili.

Alagad, kan siya pinaluwas na sa preso dai man nagluya an boot niyang maglaban sa diktadura asin magsurog sa mga kinakalaboso sa soboot mga krimen pero huli lamang ta nag'kokontra sa administrasyon. Siya an nagin regional coordinator kan Free Legal Assistance Group (FLAG), sarong kaayonan na minukna ni Abogado asin dating Senador Jose Diokno asin nagsusurog y nagtataong libreng asistensya legal sa mga kinakasuhan asin kinakarsel dahel lamang sa saindang pagkontra asin dai pag'oyon sa palakaw pulitika kan yaon sa poder.

Naduwahan pa pagkulong saiya kan Hulyo 1981, kaiba an lider sibiko na si Grace Vinzons Magana kan Camarines Norte ta siya kasurog bilang Chairman kan Kilusang Mamamayan para sa Tunay na Demokrasya (KMTD) kan mangyari an Daet Masaker kan Hunyo 14, 1981 kun saen apat na pobreng paraoma-demostrador binaradil asin nagkagaradan, 50 an nagkaererido, na an kaggibo iyo an mga elemento kan si dating Konstabularyo nakabase sa Camarines Norte. An mga ini parte ngane kan si labing 3,000 na paraoma haleng Basud ta mademostrar sa sentro nin Daet sa pagdenunsya kan si pekeng eleksyon nasyonal ginibo kan taon na idto.

Pakaluwas niya sa kulongan padagos man giraray an pagtabang niya sa mga may kasong iniipit kan administrasyon ni Marcos bilang pamayo kan FLAG-Bicol. Kan magputok an People Power Revolution asin makatukaw na si Corazon Aquino bilang presidente, siya kinua ni Aquino asin pignombrahan direktor kan National Bureau of Investigation. Igdi nagtolong taon siyang serbisyo asin pighingoa niyang mabalik an naraot na kredibilidad kan ahensya.

Sa pamamayo niya, dakul an repormang nakaag asin napasunod sa ahensya ngane ini magin katubodtubod asin totoo sa saiyang mandato. Mala ta sa tolong taon niyang pagkapot, darakula asin mga prominenteng mga kaso an tolostolos naresolberan kan ahensya: si Garchiterona Land Scam, si pag-ambus asin pagngata' na gadanon si namamayo kan PUP na si Dr. Nemesio Prudente, si pagkidnap asin pagmurder ki Rolando Olalia, Chairman kan Kilusang Mayo Uno (KMU), si ambus-paggadan ki Alkalde Jose C. Payumo, Jr. kan Dinaluphian, Bataan, asin si paglikidar kan si dating alkalde kan Amadeo, Cavite, si Jeremias Villanueva kadamay an saiyang personal na bantay, si Pat. Virgilio Lascano.

Pagbutas niya bilang direktor kan NBI, siya nagbalik sa Naga sa pagpraktis kan saiyang abogasya, pagsurat nin mga artikulo sa mga magasin asin peryodikong lokal asin pagtaram sa radyo bilang komentarista. Mala ta, kairiba niya sa programa sa radyo LV sinda Luis General, Jr. asin si Alfredo Tria, duwa niyang kaugos na gayong amigo, sa pagkomentaryo asin pagdenunsya kan mga kaabusohan kan gobyerno. Sindang tolo nabansagan na "Trio los Panchos".

Pinalagda' na libro nin mga rawitdawit

Bako sanang maray na orador kundi maray na magsurat, si Carpio igwang pinaluwas na libro nin mga sonnet asin prosa, “Viva la Virgen!” Verses & Poems & a Pinch of Prose (1995). Ini katiponan kan mga sinurat niyang mga rawitdawit asin saysay manongod kan saiyang naginibo, paghihingoa asin pakikitusay sa buhay sa serbisyo para sa Dios na Kagurangnan asin para sa kapwa. Igdi man saiyang hinayag an lipotok na pagkamoot niya sa saiyang agom si Edith (Bernardita) asin natatala' sa saiyang mga rawitdawit an pagkaDiosnon niya asin an pagkadeboto niya ki Inang Birhen Penafrancia.

Si Carpio nagadan sa edad na 78 huli sa helang na Parkinson's disease asin ilinubong igdi sa syudad nin Naga.

Mga panluwas na takod

• Mga naginibohan ni Jesus Antonio Carpio
• Editoryal sa pagkagadan ni Abogado Tony Carpio
• abcstarsinc.org]