Justin Trudeau

Gikan sa Bikol Sentral na Wikipedia, an talingkas na ensiklopedya
Jump to navigation Jump to search
Si Justin Trudeau

Si Justin Pierre James Trudeau MP (namundag Desyembre 25, 1971) sarong pulitikong taga-Kanada asin Primer Ministro-designado kan Kanada.[1][2] An saiyang partido na saiyang pinamamayohan, an Partido Liberal, hustong guminana sa 2015ng eleksyon federal. Sa pagsumpa niya, siya na an ikaduwang pinakahubin na Primer Ministrong matukaw, an pinakahubin iyo si Joe Clark.[3] Siya an matuang aki ni Pierre Trudeau na saro man nangagin ika-15ng Primer Ministro kan nasabing nasyon.[4]

Si Trudeau namundag sa Ottawa asin nag'adal sa Kolehiyo Jean-de-Brebeuf. Nakamit niya an Batsilyer en Artes sa literatura sa Unibersidad McGill asin sa Edukasyon sa Unibersidad nin British Columbia asin ta nailawan siyang enot na gayo kan siya tuminaram sa pagpahumale kan saiyang ama sa pagdapit kaini sa paglubong. Pakatapos pag'adal siya nagtukdo sa Vancouver, nag'adal engineering asin nagpoon magkua nin Masters sa Environmental Geography. Naglataw siya sa atensyon nin publiko sa pagbusol nin mga iba-ibang adbukasiya manta na nagpapel siya sa TV miniseries The Great War kan 2007.


Nagbuntog siyang orog sa pulitika pakagadan kan saiyang ama asin nangagin siyang representante para sa Papineau sa House of Commons kan eleksyon federal kan taon 2008. Kan Septyembre 2009, siya nanombrahan sarong kritiko kan Partido Liberal para sa Youth asin Multiculturalism. Kan Septyembre 2009, nagin naman siyang kritiko para sa Youth, Citizenship asin Immigration. Kan madaog sa eleksyon federal an Partido Liberal kan 2011, asin ta si Michael Ignatierr nagbutas komo lider sa LIberal, an interem na lider na si Bob Rae pignombrahan siyang kritiko para sa Post Secondary Education, Youth and Amateur Sport. Kan 2013, ginana niya an liderato kan Partido Liberal.[5] Sa 2015 eleksyon federal, nadaog niya si Primer Ministro Stephen Harper na iyo an may renda kan Partido Conservative, mala ta hale sa 36 na tukawan, nasikwit kan saiyang partido an 184 tukawan sa House of Commons, bagay na pambihira asin enot pa sanang nangyari ini sa eleksyon sa Kanada na may dakulaon na lukso sa bilang nin ginanang tukawan.[6][7][8]

Buhay personal[liwaton | liwaton an gikanan]

Si Tradeau nanompongan an saiyang maaagom na si Sophie Grégoire kan sinda mga aki pa ta si Sophie kaklase, kagubay asin katood kan saiyang ngohod na tugang si Michel. Nagkasumpongan naman sinda liwat kan Hunyo 2003 kan ini si Grégoire saro nang personalidad sa telebisyon Quebec asin nagin kapwa-kagbusol kan sarong charity ball. Dangan an pag'iriba ninda nagbunga sa pag'ilusyonan, mala ta kan Oktobre 2004 pormal nang magka'ilusyon asin kan Mayo 28, 2005, nagpakarasal sa sarong seremonya Katolika sa simbahan nin Sainte-Madeleine d'Outremont duman sa Montreal.[9] Sinda igwang tolong aki: Xavier (namundag Oktobre 2007), Ella-Grace (Pebrero 2009), asin Hadrien (Pebrero 2014).[10]

Kan Hunyo 2013, duwang bulan pakanangagin siyang pamayo kan Partido Liberal, an mag'agom pinabakal saindang harong sa Côte-des-Neiges sa Montreal asin nagkua nin sarong paarkilahan na harong sa Rockcliffe Park duman sa Ottawa, na iyo an ineerokan ni Trudeau kan an saiyang ama na si Pierre Poon Ministro pa asin duman man nakaestar.



Mga panluwas na takod[liwaton | liwaton an gikanan]

Toltolan[liwaton | liwaton an gikanan]