Karapatan nin kababaihan
An karapatan nin kababaihan iyo an mga karapatan asin diretso na kinamit para sa mga babayi sa bilog na kinaban. Binibilog kan mga ini an tugmadan para sa mga paghiro para sa mga karapatan nin kababaihan kan ika-19 na siglo asin kan peministang mga paghiro kan ika-20 asin ika-21 na siglo. Sa nagkapirang nasyon, an mga karapatan na ini inestablisar o sinusuportaran nin batas, lokal na kaugalian, asin gawi-gawi, mantang sa iba, an mga ini pinapasipara sana asin pinupugulan. Lain an mga ini sa mas mahiwas na nosyon nin karapatan pantawo huli sa mga paghihingako nin likas na historikal asin tradisyunal na pagkiling tumang sa pag-ehersisyo sa mga karapatan nin kababaihan, asin pabor sa mga lalaki.[1]
An mga isyu na parating inaasosyar sa mga nosyon dapit sa mga karapatan nin kababaihan iyo an karapatan sa integridad asin awtonomiya sa hawak, katalingkasan gikan sa sekswal na kadahasan, pagboto, pagkapot nin pampublikong posisyon, paglaog sa legal na mga kontrata, pagkaigwa nin pantay na mga diretso sa batas dapit sa pamilya, pagtrabaho, patas o pantay na sweldo, pagkaigwa nin mga reproduktibong karapatan, pagkaigwa nin pagrurugaring, asin edukasyon.[2]
