Koteka

Gikan sa Bikol Sentral na Wikipedia, an talingkas na ensiklopedya
Maglukso sa: paglibotlibot, hanapon
An koteka
Iba-ibang klaseng koteka naka-displey sa Ripley's Believe It or Not Odditorium, Nweba York

An koteka, horim, o sarong kan putoy iyo an su'lotan o sarongan kumbaga sa ikinabuhay kan lalake ngane an putoy dai makagat kan insekto o mataya' sa helang sa anoman na mga maraot na elemento. Ini uso asin praktis kan etnikong tribung Danai kan New Guinea An paggamit kaini bako man sa pagtahob kan kasosopgan ta an tribu mayo man nin siring na pagsasaboot. An mga antropolgo totoo nagtutubod na bako sana ini ginagamit huli sa siring na rason kundi may seremonyal asin sosyal na kadahelanan sa pag'usar kaini.

An koteka parati gibo sa karakas kan pinaalang na kalabasa (o kapamilya kan tinanom na ini) o an sarongan gibo hale sa lubid o balagon nin tinanom piglinig asin sino-sirikmat na magpormang sarong asin an laba o pakadakula susog sa binoboot na hitsura. Ini may sa'long na nakatakod asin linilibot sa bayag. Igwa pang sa'long na nalibot sa habayan ngane dai maghulog an koteka. Uso man ining gamiton kan mga tribung Yali na nagbabanwa sa Papua, Indonesia asin kan mga Tiom. An koteka soro-sulot nakatingag asin nakatakod sa itaas kan hawak.

Sa Aprika asin sa ibang parte kan dagang Amerika habagatan igwa pa man nag'uusar nin koteka. An ibang mga aborigine sa Australya nagsusulot nin buskay na koteka na pinopinturahan pa. Sa ibang parte kan Amerikang habagatan may mga pakalay na jade o ibang pasamnong gapo mismo sa putoy o bayag kun saen an mga ini itinutusok sa kublit. Alagad an siring bilang sana temporaryong paggamit sa mga ritwal na seremonya.

Nakapisong sa koteka

Paghale kan pagsulot nin koteka[liwaton | liwaton an gikanan]

An gobyerno kan Indonesia kan mga taon 1971-1972 nagbunsod kan kampanya ("Operasyon Koteka") na maalok asin maagyat an mga taga Papua na magpondo na sa paggamit kan koteka ta bakong susog sa modernong gawe. Naghakot nin mga sarawal asin mga polo pinanao sa mga tribu. Alagad, an mga tribu dai nagkuyog sa ginugusto kan gobyerno. Palibhasa mayong mga sabon asin dai tood sa paglaba kan mga siring na gubing, nagkakaigwa sana sinda nin mga helang sa kublit. Masabi pa, may nag'orosip na ginamit sana si mga sarawal na kupya kan mga lalake saka idtong mga polo nagin mga bag o kaka'gan kan mga babae..[1]

Dai na pinadagos an kampanya kan gobyerno. Pero sa mga opisina, an pagbadobado na sa moderno obligado asin siring man sa mga aki na nagkaklase. Totoo, sa simbahan tinugot pa an pagsulot kan koteka.


Panturistang sarong[liwaton | liwaton an gikanan]

Ngonyan na modernong panahon, an mga tagaPapua, New Guinea naggigiribong mga koteka na may mga pintura pa, may mga samno asin kuritkurit na pagayon sa tuyong ipabakal sa mga turista.

Mga panluwas na takod[liwaton | liwaton an gikanan]


Toltolan[liwaton | liwaton an gikanan]