Kumbensyon sa Byolohikal na Dibersidad

Gikan sa Bikol Sentral na Wikipedia, an talingkas na ensiklopedya
Jump to navigation Jump to search

An Kumbensyon sa Byolohikal na Dibersidad (Ingles: Convention on Biological Diversity o CBD) sarong multilateral na kasunduan. An kumbensyon igwa nin tulong panginot na katuyuhan: an konserbasyon kan byolohikong dibersidad (o byodibersidad); an sustenableng paggamit sa mga elemento kaini; asin an patas asin pantay-pantay na paghiras nin mga pakinabang na bunga nin henetikong mga kayamanan. An obheto kaini iyo na patalubuon asin papusugon an nasyunal na mga estratehiya para sa konserbasyon asin sustenableng paggamit nin byolohikong dibersidad, asin ini parating hinihiling bilang panginot na dokumento mapadapit sa sustenableng pag-uswag.

An kumbensyon binuksan para sa pirma sa Earth Summit sa Rio de Janeiro kan 5 Hunyo 1992 asin nagkapwersa kan 29 Disyembre 1993. An Estados Unidos sana an myembrong estado kan UN na dai nagratipika sa kumbensyon.[1] Igwa ini nin duwang pantuwang na kasunduan, an Cartagena Protocol asin an Nagoya Protocol.

An Cartagena Protocol on Biosafety to the Convention on Biological Diversity sarong internasyunal na kasunduan na pinamamahalaan an mga paghiro kan living modified organisms (LMOs) na resulta kan modernong biotechnology hali sa sarong nasyon pasiring sa saro pa. Pig-adoptar ini kan 29 Enero 2000 bilang pantuwang na kasunduan sa CBD asin nagkapwersa kan 11 Setyembre 2003.

An Nagoya Protocol on Access to Genetic Resources and the Fair and Equitable Sharing of Benefits Arising from their Utilization (ABS) to the Convention on Biological Diversity saro pang pantuwang na kasunduan sa CBD. Nagtatao ini nin silag na legal na framework para sa epektibong implementasyon kan saro sa tulong obheto kan CBD: An patas asin pantay-pantay na paghiras nin mga pakinabang na bunga kan paggamit sa henetikong kayamanan. An Nagoya Protocol pig-adoptar kan 29 Oktubre 2010 sa Nagoya, Japan, asin nagkapwersa kan 12 Oktubre 2014.

2010 man an Internasyunal na Taon nin Byodibersidad, asin an Sekretaryat kan CBD an nagin pinakasentro kaini. Kasunod kan sarong rekomendasyon kan mga signataryo kan CBD sa Nagoya, pigdeklara kan UN an 2011 abot 2020 bilang United Nations Decade on Biodiversity kan Disyembre 2010. An Strategic Plan for Biodiversity 2011–2020 kan Kumbensyon, na namukna kan 2010, kaiba an Aichi Biodiversity Targets.

An mga miting kan mga myembro sa kumbensyon midbid bilang mga Conferences of the Parties (COP), na an inot (COP 1) ginibo sa Nasau, Bahamas, kan 1994 asin an pinakahuri (COP 15) ginibo sa Kunming, Tsina.

Susugan[baguhon | baguhon an source]

  1. Jones, Benji (20 May 2021). "Why the US won't join the single most important treaty to protect nature". Vox. Retrieved 3 December 2021.