Labahan ni Magdalena
An Labahan ni Magdalena (Ingles, Magdalene Laundries o, Magdalene Asylum) , sarong institusyon na nagbutwa asin naglakop kan ika-18 abot ika-20ng siglo na soboot pailihan kan mga "nagkasalang mga babae", na boot sabihon mga babaeng nalisya' sa toltol na dalan nin mabining pagkababae, o sa sarong pagtaram idtong mga babeng "mahiro" o "bayaran" sa pagtaong kaogmahan sa laman, o mga babaeng yaon sa pampaman. Alagad daa kadaklan kan mga babaeng sinusubol o nalaog igdi sa mga "labahan ni Magdalena" mga idtong mga nabadosan na mayong mga agom asin parati pinirit na isubol sa mga institusyon na arog kaini kan mga nanonongdan sa Simbahan o kan mga kapamilya sa pagtago kan "kasosopgan" na nabados daing agom. Kadaklan kaining mga pailihan na labahan mga institusyon na pinapadalagan garo mansanang mga penitentsyarong haros oriponon an mga babae na mayong tandan asin garo bilang kastigo sainda. An sobrang higot na palakaw sa laog kan institusyon labis pa asin mas makuri sa mga nangyayari sa mga presohan. An siring na kamugtakan sarungat sa pagtubod asin paghuna na ini ginigibo sa pagreporma sa mga babae bako sa pagpasakit sainda sa mga hinuhuna na mga kasa'lan. Ini sa katotohanan na an mga lalake sa sosyedad dai man pigtrato nin siring sa parehong mga kasa'lan o "krimen" na magkaigwa nin aki na ilehitimo. An mga siring na labahan na parati pinapadalagan nin mga madre kan simbahan katoliko romano naglakop sa Europa, Norte Amerika abot sagkod sa ika-19 asin ika-20ng siglo, an ultimo kaini pigsarahan sana kan taon 1996. An institusyon sinasabing ipigngaran sa pigurang biblikal na si Magdalena na pirang siglong piglaladawan na sarong repormadong pampam.[1][2]
Mga panluwas na takod[baguhon | baguhon an source]
- [1] Magdalene survivor: sarong pagbuyagyag.
