Leonardo Padura Fuentes

Si Leonardo Padura

Si Leonardo de la Caridad Padura Fuentes (namundag Oktobre 10, 1955) sarong Kubanong nobelista asin peryodista. Puon kan 2007, Siya an saro mas bantogan na parasurat na Kubano sa lebel internasyonal. Sa saiyang tubong tataramon na Espanyol, asin sa Ingles saka sa iba pa man na tataramon, siya parati inaapod sa halipot niyang ngaran, Leonardo Padura. Siya nagsurat nang mga screenplays, duwang libro nin mga halipot na osipon, asin serye nin nobelang detektib na pinalis na sa 10 tataramon. Kan 2012, si Padura nagawadan kan premyong National Prize for Literature, an literaryong nasyonal na premyo kan Kuba asin pinakamahalaga. Kan 2015, siya napremyohan kan Premio Principe de Asturias de las Letras nin Espanya, saro sa pinakamahalagang premyo literaryo sa nagtataram-espanyol na rona', asin konsideradong Premyo Nobel nin Iberamerikano.

Buhay asin karera

Si Padura, na ipinangaki sa Havana, nagkuang degree sa Latin Amerikanong literatura sa Unibersidad nin Havana. Kan 1980 siya naglataw na gayo bilang sarong peryodistang imbestigador sa sarong magasin na literaryo na an apod Caimán Barbudo, sarong pusogan na publikasyon na sagkod ngonyan pigpupublikar pa. Siya namidbid bilang parasaysay asin parasurat nin mga screenplay asin partikular detektib na nobela.

Sinurat niya enot na halipot na nobela pag'ultan nin 1983 asin 1984. Tituladong Fiebre de caballos (Horse Fever), ini istorya nin pagkamoot. Durante kan sunod na anom na taon, pasige siyang pagtrabaho bilang peryodista, na nagsusurat dapit sa mga bagay na kultural asin historikal. Alagad, sa mga panahon na ini siya nagpopoon nang magsurat kan enot niyang nobela nagtatampok an pulis na si Mario Conde. Kan ini pigsusurat niya, saiyang nagamiawan na importanteng gayo pala an eksperensya niya bilang peryodista sa pagpatalubo bilang parasurat. Enot, nagtao saiya digdi nin bago nanggad na eksperensya manongod kan lugar, asin ikaduwa, nagsangle ini saiya kan estilo sa pagsurat niya kan primerong libro.

Kan 2013, an Pransya piggawadan siya kan pangaran na Chevalier sa Ordre des Arts et des Lettres.

Si Padura nag'eerok pa asin nagsusurat pa sa sadiri niyang syudad nin Havana.

"Sa saro niyang saysay tituladong 'I would like to be Paul Auster,' si Padura nagreklamo na dai man logod siya pagparahapoton kan manongod sa politika sa saiyang nasyon asin ano ta siya sige pa nag'eerok sa lugar niya. Alagad iyo ini an kinamumugtakan niya: siya hinihiling na pinakamahusay na parasurat sa Kuba, sarong nasyon na an saiyang mahuhusay na mga parasurat namolde kan dai pa nag'abot pamomoon ni Castro. Siya an natao nin bihirang agihan=-na-dalan sa sarong saradong sosyedad, sarong prosa na libre sa propaganda (totoo dai libre sa pagbantay kan mga awtoridad). Sa pag'okupar sa sadit alagad kritikal asin importanteng espasyo sa Kuba, si Padura nagigin sarong interesanteng persona sa mga paramasid sa Cuba asin nakakaintrega sa mga estudyante nin kultural asin literaryong hiro-hiro sa isla nin Kuba."

Bibliograpiya

Mga Libro

• Padura, Leonardo (1988). Fiebre de caballos. Havana: Editorial Letras Cubana. 
• Pasado perfecto, 1991 ("Havana Blue", 2007).
• Máscaras, 1997 ("Havana Red", 2005).
• Paisaje de otoño, 1998 ("Havana Black", 2006).
• Vientos de cuaresma, 2001 ("Havana Gold", 2008).
• La novela de mi vida, 2002.
• Adiós Hemingway, 2005.
• La neblina del ayer, 2005 ("Havana Fever", 2009).
• El hombre que amaba a los perros, 2009 (The Man Who Loved Dogs, 2014).
• La cola de la serpiente, 2011.
• "Regreso a Ítaca" (Return to Itaca, 2016)
• Herejes, 2013 ("Heretics", 2017).
• La transparencia del tiempo, 2018.
• Como polvo en el viento ("Like Dust in the Wind, 2020)
• Personas decentes, 2022.

Kritikal na mga pag'adal asin rebyu kan mga obra ni Padura

• Anderson, Jon Lee (October 21, 2013). "Private eyes : a crime novelist navigates Cuba's shifting reality". Letter from Havana. The New Yorker. Vol. 89 no. 33. pp. 60–71. 
• "How to Write from Mantilla, or the Small Heresies of Leonardo Padura," chapter 5 in Yvon Grenier, Culture and the Cuban State, Participation, Recognition, and Dissonance under Communism (Lexington Books, 2017).