Malong

Si parabayle na ipinapahiling an kapa na malong malong, sarong tradisyonal na bayleng Maranao na nagtatampok kan mga gamit kan malong

An malong sarong tradisyonal na Pilipinong pa-rektangulo o baga tubong gubing na itinatapis na may iba-ibang heometriko o disenyong okir. An malong tradisyonal na ginagamit na gubing kan mga lalaki sagkod mga babae kan kadakol na etnikong grupo sa Mindanao asin mga parte kan Arkipelagong Sulu. An mga ini itinatapis sa habayan o daghan asin ipinapairarom an puro, siring man ginagamit nin pahang igwa nin mga burloloy o iba pang materyal asin iba pang tela. Ipinapatos man sa hawak an sobrang tela sa sarong abaga. An mga ini tradisyonal na hinabol, na an mga paulit-ulit na disenyo parati napapalain sa sarong partikular na grupong etniko. Alagad, an modernong malong parati makinaryang panghabol o imported pa ngani, na may mga paulit-ulit na disenyo na nag-aayog sa mga tradisyonal na lokal na disenyo.

Pagladawan

Gibo an mga hinabol na malong kan mga Maranao, Maguindanao, asin T'boli gamit an tradisyonal na paagi. An estilo kan malong nagpapahiling kan ginikanan kan saindan tribo arog baga kan malong landap kan mga Maranao. Sarong pambihirang marhay na mga disenyo asin estilo an ipinapahiling sa kun sain gikan an mga paradisenyo kaini, halimbawa, an malong rawatan na ginigibo kan pipira na sanang parahabol na mga Maranao sa Lanao del Sur, Mindanao. An mga tradisyonal na malong mahal an halaga asin an mga ini ginagamit sana sa mga tiripon asin espesyal na okasyon tanganing ipahiling an sosyal asin ekonomikong kamugtakan kan nagsusulot. Minsan ngani an mga modernong malong gibo sa gapas asin mga tursidong lurex asin an nagkapirang modernong hinabol na malong gibo na baratong klaseng telang rayon tanganing mapababa an gastos sa paghaman kaini asin ipasa sa konsumidor an bilog na halaga nin produksyon. Manlainlain an grado nin tursidong gapas, asin an presyo kan malong napapababa man gamit an hababang klase nin materyal o sa paagi nin sinapoting paghabol resulta an bakong pinong pakagibo kaini.

Gamit

Duwang paagi nin pagsulot nin malong

An malon pwedeng magserbe bilang palda para sa mga lalaki sagkod mga babae, sarong turban, Niqab, Hijab, sarong gubing, tamong, sarong panlipod, kobrekama, hamak, banig sa pamibi, asin iba pang katuyohan. An bagong mamundag pinatos nin malong, asin mantang siya nagdadakula an pidasong ini nin tela nagigin kabtang kan saiyang pan-aroaldaw na buhay. Sa saiyang kagadanan, kinakaagan man siya nin malong. Sa tahaw kan tradisyonal na mga tribo, an malong ginagamit sa pan-aroaldaw na buhay. Dawa sa mga lugar na an mga tawo nagsusulot nin badong pang-Sulnupan, an malong iyo an komun na ginagamit na panturog. An malong ginagamit man sa darakulang kapiyestahan, ini ginagamit ninda sa pagtaong respeto. Duwa an pigrerepresentar sa Museo Ayala: an "malong a andon" sa wala, asin an "malong a landap".

Reperensya

• From the Rainbow's Varied Hue: Textiles of the Southern Philippines. (1998). Edited by Roy W. Hamilton. Fowler Museum of Cultural History, University of California at Los Angeles.