Manuel Severino Hofileña Ancestral House.

An Manuel Severino Hofileña Ancestral House o, An "Lumang Harong ni Manuel Severino Hofileña" sarong lumang harong na pigdeklarang heritage house kan National Historical Institute huli ta ini sarong magayon asin grandeng representasyon kan arkitekturang nagpaparomdom kan panahon na kolonya pa an Filipinas kan mga Espanyol. Pigdeklarang heritage house ini kan Abril 6, 1993.

An nasabing harong makukua sa Nu. 14 sa Kalye Cinco de Noviembre sa syudad kan Silay, Negros Occidental, Filipinas.

An luwas kan harong daing gayo nagtataong tanda kun ano an mga yaon sa laog. Alagad, sa paglaog igdi, mahihiling tolos na an harong na ini repositoryo kan dunong asin talento kan mga maestrong pintor na filipino; natitipon man igdi an mga lumang rebulto nin mga santo kan Simbahan Katoliko, mga antigong gamit arog kan mangko, plato, baso, mga pitsel asin kun ano-ano pang nakotkot na mga artifak hale asin gibo sa Antigong Tsina, durante kan dinastiyang Ming, mga materyal na gamit asin kasangkapan nadukayan sa sarong nalubog na galyon nin Kastila arog kan gapong kaka'gan nin arak asin barel na may gripo sarayan man nin arak, sarong kasangkapan sa wood etching asin mga muebles sa estilo asin desenyong Kastila asin europeo arog kan tukawan nin prayle, katreng may poste sa pagsangat nin kubong, aparador na may salming na pinto, platera asin lamesang an mga bitis niya inukit. Igdi mahihiling an sarong wood engraving machine na posible iyo na sana an igwa kaini sa Filipinas.

Igwa man ini nin tipon kan mga pinakasaradit na mga munyeka, na siring kan mga tipasi nin bagas an tamanyo, hale pa sa iba-ibang parte kan kinaban asin kun mamaanan, dapat gumamit nin lente!

Kulang na sanang sabihon na an mga pinturang saray igdi naghahalagang minilyon arog kan mga obra ni Jose Rizal, Juan Luna, Fernando Amorsolo, Felix Hidalgo, Ben Cabrera, Ang Kiukok asin ni Vicente Manansala. Sabi kan tagalekturang guide, an pinturamg saditsadit mansana ngane ni F. Amorsolo nagkakahalaga nang aboton limang milyon na pesos. Si Ramon Hofileña, an tagamana kan harong na ini na dati pagsasadiri kan ilustradong Manuel Severino Hofileña, sarong Kastilang hasendero, nakatipon man igdi nin mga pinturang obra kan mga bantugan na pintor na dayuhan arog ki Van Gogh.

Mismo an harong mahiwas, may mga ventanilla ngane an duros luwas laog sana asin sa dakulang sala may sarong Rachals na piyano haleng Alemanya na nag'eedad na haros duwang gatos na taon paliwanag kan tagabantay asin guide. Gibo sa matagas na kahoy (barayong), an hagyan na naliko pasakat elegante asin an mga tokod sa barandilya maarteng husto.

Totoo ini tinogdok kan taon 1934, panahon nin administrasyon kolonyal kan mga Amerikano, pero an arkitektura asin estilo nin pakahaman nagpaparomdom kan arkitektura Espanyol asin europeo.