Museo kan Unibersidad kan Nueva Caceres
An Museo kan Unibersidad kan Nueva Caceres napatindog kan Oktubre 1, 1952 sa University of Nueva Caceres komo sarong proyekto kan kagmukna kan unibersidad, si Don Jaime Hernandez. An Unibersidad na ini an ikaduwa pa sanang eskwelahan sa bilog na Filipinas na nakapakaag nin museo. An pinakaenot na curator asin an nagpoon sa pagbilog kan museo iyo si Ignacio Meliton.
Binibilog ini nin duwang dibisyon: an Galleria asin an Archival Library. An mayor na toon nin paghingoa kaini iyo an pagdamot asin pagkolekta nin mga bagay na may halaga sa Arte asin Syensia. Sakop kaini an paghimoyaot na matipon, matimos, mapreserbar, maadalan asin mai-kaag sa esksibit an anoman na mga obheto na may kamanongdanan sa historya o kultura, asin siring man mga bagay na may aestitiko o syantipikong halaga.
Binanga sa apat na pitak an Museo- an Sentral na Galleria, an Archival Library, an Seksyon Filipiniana, asin an Hernandez Memorabilia.
An Sentral na Galleria pinaheheling sa mga retrato an ebolusyon kaini hale sa sadit na eskwelahan na inapod Nueva Caceres Colleges kan 1948 hanggan na ini magdakula asin magin sarong tunay na unibersidad kan 1954 sagkod sa panahon na presente.
An pitak Filipiniana linalaman nin mga artifak asin mga relikya dapit sa agi-agi kan Filipinas. Ini man nababanga sa apat na seksyon: Soanoy na Filipinas, Panahon nin Kastila, Panahon nin Amerikano asin Panahon kan Talingkas na Filipinas.
An Archival Library sarong archivo na sinasaray igdi an mga materiales asin mga dokumento bunga nin pag'aadal, orog na idtong dapit sa istorya kan Kabikolan, kan saiyang kultura asin kan mga sinurat kan mga Bikolano. Sa kabtang na ini masambit na an pinaka-enot na curator kaini, si Ignacio Meliton iyo an naglapigot na gayo na matipon asin mati'mos an mga artifak asin mga kasuratan na bikolnon.
An Hernandez Memorabilia katiponan kan mga personal na rugaring, mga sinurat asin mga libro kan kagmukna kan Unibersidad, si Don Jaime Hernandez, na nataong ilaw kan saiyang pambihirang kahamanan sa buhay, sarong tawo na an saiyang buhay asin paghihingoa sarong panalmingan nin napapalaen na klaseng liderato asin serbisyo.
An Museo makukua sa ika-3ng eskalon kan AMS Building, bukas alas 9 abot alas dose nin aga (Lunes sagkod Sabado) asin ala una abot ala singko y media kun hapon ( Lunes hanggan Biyernes). Libre man an pagbisita asin pagbasa.
Mga Panluwas na Takod[baguhon | baguhon an source]
- Istorya kan Museo kan Unibersidad- [1][permanent dead link]
Toltolan[baguhon | baguhon an source]
- Istorya Kan Kabikolan. Jaime T. Malanyaon. AMS Press. 1991. 568 p.