National Register of Historic Places
An Rehistro Nasyonal kan mga Historikong Lugar kan Estados Unidos iyo idtong lista kan gobyerno federal nin Estados Unidos na hayag sinasakop an mga distrito, mga sityo, edipisyo, estruktura, asin mga bagay na maninigong masaray asin mati'mos o mamantener na an mga ini dai magkawarara, magkararaot, asin makaag sa marhay na kamugtakan. Kun an sarong pagrorogaring o propyedad nakalista sa Rehistro Nasyonal o yaon man sa laog kan Distrito Historiko, ini pwede maka'awod nin insentibo sa buhis batay sa ginagasto sa pagpreserbar kan nasambit na bagay o estruktura.
An pagkaaprobar kan Akto nin Preserbasyon Historiko Nasyonal kan 1966 nagtogdas kan Rehistro Nasyonal asin an proseso kaini sa pagdugang kan arinman na propyedad. Sa lampas sarong milyon na rogaring sa Rehistro Nasyonal, an 80,000 kaini nakalista indibidwal. An natatada mga nakakaambag na mga rekursos sa laog kan distrito historiko. Taon-taon mga 30,000 na pagrorogaring an nadadagdag sa Rehistro Nasyonal, parte man kan distrito o indibidwal na nakatala.
