Olay kan paragamit:Jose B. Avila
PARA SAIMO
Madiklom ang palibot, nagbubulos an uran An tagdo kaini maogmang minamasdan Dawa patos ako nin labi-labing kamunduan Ta harayo ka saku, dai kita nagkakahilingan
minaturo an luha kun ika narurumduman Ta dinadaog ako kan grabeng kapungawan kun nuarin ka mabwelta, dai ko maisihan Alagad hahalaton taka astang ako magadan
Tunay kong pagkamoot para saimo sana Dai nanggad kayang ipanao sa iba Maski na ngani ika nagduduwa-duwa An abang puso ko saimo sana nakatagama
Dawa na pagkaminuotan ta madiklom na ngonyan Naglalaom ako sa liwat na pagsirang kan saldang Na matao nin liwanag sa satuyang pagkamoot Na liwat tang papapusugon sa mga aldaw na maabot
- NOY -
PAGMATI NA ISINURAT
Pagmati na isinurat kan pluma Kasabay sa tagdo kan mapait na luha Na minadungan man sa bulos kan uran Sa malipot asin madiklom na kapalibutan
An mga letra asin tataramon minahali sa daghan Dara kan pagmati na gikan sa kamunduan Kadakol an dai maisurat na mga kahaputan Dai man maisihan an mga kasimbagan
Luhang minahugas sa dugo kan pusong linugadan Namamati an lanit na dara kan kapungawan Totoong pagkamoot na kinawatan sana Idudusay liwat saimo kun ika mabwelta
kulog-boot na masakit isurat sa papel Pagmati kan pusong may lugad... masimpil Dai kayang iilaburar kan tinta kan pluma An pagpadangat na tunay na kinawatan, kamunduan an dara....
- NOY ---Noy 02:48, 26 Enero 2012 (UTC)
BITUON
Muklat an matang nakaturuhok sa mga bituon Minamati dagos an mapreskong tugpa kan ambon Hararom an isip sa paghuhurop-hurop Kasabay sa malipot na huyop kan paros
Sa mga bituon binibilog an saiyang mga pangiturugan Makahaw-as sa pagtios, buhay masumpayan Maglakaw sa tamang direksyon kan dalan nin buhay Progreso kan sadiri sa maarabot na aldaw
Sa sinasapong pagtios, bituon an panlinga Sa kulog-boot sa mga bituon minaluha Bituon an kaulay kun daing madumanan Bituon an tambal sa pung-aw asin kamunduan
Bituon ka sa saiyang abang puso Na ngonyan sa diklom ka nagtatago-tago Naglalaom siyang pakatapos kan uran bituon kan saiyang buhay liwat na matatanaw
- NOY-
NAMUMUOT
Masiram ang pagmati kun igwa ki nagpapadaba Namumuot saimo asin naglilinga-linga Gabos na aldaw interong magaya-gaya An saimong puso nagkukurukanta
Sa lambang oras bako kang purunguton Dai nagmumurusdot, perming nakahuyom Anas positibo an saimong kaisipan Kun dai ka medbed, ika ngangaralasan
An tawong namumuot, mahiwas an pag-isip Maray pating umintindi sa mga pagtaraid Inspirado asin perming mahigos sa trabaho Maogma an aldaw dawa dai ki sentabo
sinisiguro na an namumutan dai nagugutom Kun nag-uuran sa padaba nagduduhol tulos nin pandong Perming kinukugos tanganing dai liputon Alagad mas madahom kun ginigibo mo iyan sa sadiri mong agom...
- NOY -
DUYAN
Madahom mati-mation an saimong turutabyon Kadungan an tuno kan magayon na kansyon Mga mata ko dai mapugol an pagpirong Hinahapihap kan paros an sakuyang luong
Sa saimo buhay ko magaya-gaya Lingaw ko an gabos kong problema Katuwang ka sa sakung paglinga-linga Kadamay-damay taka sa sakuyang pagluha
Ikakamundo ko kun ika mawawara Maluha ako kun sa kinaban ika mapapara An presensiya mo an sakuyan kaogmahan Dakulang parte ka sa aba kong buhay
Ika an duyan ko sa mga kaogmahan Ika an duyan ko sa sakuyang kamunduan Ika an duyan ko kun mayong madudumanan Ika an duyan ko sa sakuyang kagadanan
- NOY -
REBELDE
Permi na sanang pugol-pugol an badil ko Maghapon sa kalalakaw daing pundo Paglatag kan diklom, nawawara an anino Sa lipot kan banggi, armas an kakugos ko
Dai na natatakot na saaga magadan Sa hilaw na buhay, dai nang pakiaram Pagsakit, gutom, lipot asin kagat kan mga namok Dai na lamang namamati ta haloy nang tuod
Kabaing nin musika an lambang purutukan An talsik kan dugo, kolor na kan kapalibutan Sa parong kan pulbura ako nasisiraman Hanap kong katuninungan, kun ako magagadan
Ini an sakuyang abnormal na buhay Paghanap nin katalingkasan, simbag kagadanan Dai pa nasasabutan an ipinapakipaglaban Dai sigurado kun pasain an sakuyang dalan
- NOY -