Pancho Piano
Si Pancho Mistula Piano (nmdg: Septyembre 22, 1954) sarong Bikolanong pintor asin artista biswal. Poon pa kan 1986, igwa na siyang sobra sa 150ng mga pinintura asin mga stained glass design na obra; kadakulan kaini pigkontrata kan mga paroko asin mga munisipyo sa Camarines Sur, Albay, Catanduanes, Masbate, Sorsogon, asin sa Metro Manila.
Namundag siya sa sarong ordinaryong pamilya sa Mongogon, Lagonoy, Camarines Sur. An saiyang dunong asin talento sa pagpintura iyo an nag-gantad saiya sa saiyang pag-adal malâ ta huli kaini nakatapos siya sa kursong BS, major sa Economics sa Unibersidad kan Nueva Caceres (1978). Nagpoon siya bilang graphics illustrator asin pintor para sa mga publikasyon na lokal.
An mga enot niya eksibit naglaladawan kan mahayahay na mga tanawon sa saiyang tinubuan na probinsya, an kultura asin historya kaini asin an relihiyosong tradisyon kan mga kahimanwa niya. Ini napahiling niya sa duwang enot niyang solong eksibit igdi sa siyudad nin Naga (1977, 1981). Tagob nin talento, an mga pinintura niya nagdakop kan pagrereparo asin pagkaara kan sarong bantogan na pintor asin edukador sa arte asin sarong abstractionist na si Jose Joya. Igdi siya nakakua nin dakulang oportunidad mapararom an saiyang adal sa pagpipintura ta kan 1984, si Joya inampon siyang magin iskolar sa College of Fine Arts, Unibersidad kan Pilipinas kan taon 1984. An mga taon niya sa UP nagbunga nin mga mahusay na pintura na gamit niya watercolor asin pastel. Sinasabi niya na dakula man an impluensya saiya kan Artista Nasyonal na si Carlos "Botong" Francisco asin si Vicente Manansala.[2]
An saiyang pag-adal igdi nagbukas pa nin dakul na pintoan para siya matais an saiyang kanoodan sa arte biswal. Mala ta pinadara siya sa Alemanya kan Unibersidad na ini sa pag'adal sa leather artmaking kan 1985. sunod nakaadal siya sa Hapon nin mural painting sa Tokamachi City (1985-86) asin stained glass designing sa Palau (1990).
Mga panluwas na takod
[baguhon | baguhon an source]- Websayt opisyal ni Pancho Piano Archived 2010-10-22 at the Wayback Machine.
- Daily Inquirer: Native Son's touch: Pancho Piano's "Hapros" Archived 2009-10-15 at the Wayback Machine..
Mga pinintura niya[3]
[baguhon | baguhon an source]Toltolan
[baguhon | baguhon an source]- ↑ Retrato sinapi sa websayt niya
- ↑ http://www.panchopiano.com/biography.htm[permanent dead link]
- ↑ Mga pintura sinapi' sa websayt niya
