Pantomina
An Pantomina o Sinalampati sarong soanoy na bayle sa Kabikolan na inaarog an mga hiro' nin mga salampating nagsisigáyan. Sarong bayle ini nin pag'iilusyon asin pagkamoot. Sarong ritmo nin bayle nagpapahiling kan maigot na paglapag kan namomoot sa saiyang namomo'tan. Mayo pa an mga Kastila, ini inapod nang sayaw "sinalampati". An bayleng ini parati ginigibo sa mga kasalan asin mga importanteng okasyon. An pantomina pwedeng
An enganyo sa pagbayle kaini kaagid kan curach, sarong bayle na popular sa Kabisayaan.[1] Sinasabi man na an bayleng ini naagid sa mga pagsisigay kan lalong sa gonâ. An mga batay igdi simple asin liwatliwat sana ngarig an mga parabayle madaling makasunod na daing pawot. Ini "...binabayle sa entrecuatro. Yaon diyan an paso kun saen an magkatampad namartsa pasiring sa bidang sa tyempong 2/4. Dangan an engano na binabayle sa istilong valse (waltz) sa tyempong 3/4 pero may sadiring paginterpretar. An sigáy (mga pag'iilusyon kan lalong), an layug (an paglupad ngane matawan reparo, na inaapod man pagsarimbay), an sarisid (an paglakaw palibot-libot kan lalong sa gonâ), asin an bukod o lapag (an paglamag kan lalong), gabos ini mga hiro kan sarong lalong na nag'iilusyon bago magmanada sa gonâ." [2]
Sa mga kapiyestahan, an pantomina sarong sayaw na itinatampok, siring kan Pantomina sa Tinampo kan Syudad nin Sorsogon[3] asin an Pantomina Catanduanes na sayaw man sa publikong lugar kun piyesta o may espesyal na okasyon.[4] Sa mga kasalan, an bagong kasal, an mga ninong asin ngane mga sadiring-tawo kan kinasal, pipagbayle kan pantomina sa tuyong makatipon nin pondo para sa kinasal na matogdas pa sana nin sadiring pagharongon. Orawang nagbabayle kan pantomina, an mga bisita natadik nin papel na kwarta, o sobreng may laog na papel nakasurat an kantidad, sa bado kan mga nagbabarayle. An kostumbre iyo na an mga kaglalaki asin mga imbitado kaini dapat magtadik sa nobya asin an sa kagbabae dapat magtadik sa nobyo. [5]
Sa lumang kaugalean, tinitipon an gabos na itinadik, nakaluhod an lalake sa atubangan kan nakatukaw na saiyang naagom asin idinuduhol an natipon, nagtataram "Agom, gawada tabi asin saraya an satuyang nanapolan."
Mga panluwas na takod
[baguhon | baguhon an source]- Paliwanag kan bayleng Pantomina Archived 2021-04-21 at the Wayback Machine.
- Pantominang Cantanduanes Archived 2015-11-19 at the Wayback Machine.
- Video, pantomina sa Estados Unidos
- Video, pantomina sa Italya
- Video, togtog pantomina sa Pilar, Sorsogon
- Video, togtog sa SM Mega Trade Hall, Mandaluyong]
Toltolan
[baguhon | baguhon an source]- ↑ Tito Genova Valiente. [https://www.bicolmail.net/single-post/2018/06/14/fieldnotes-losing-and-youtubing-the-pantomina FIELDNOTES: Losing and “YouTubing” the Pantomina] Bicol Mail
- ↑ Placides, Estrella. Phd. Lorenzana, Maria Chatita. Tolledo, Leticia. Pantomina Catanduanes. October 2009. 41 p. Sarong manuskrito dapit sa sayaw pantomina.
- ↑ Sorsogon bags world record for 'Pantomina sa Tinampo' dance Philippine National Agency
- ↑ ‘Happy Island’ marks Catandungan festival, holds ‘Padadyaw sa Tinampo’Bicol Mail
- ↑ http://bikolandia.com/the-pantomina-de-sorsogon-form-and-meaning/ Archived 2014-09-21 at the Wayback Machine. Kinua 07-12-14
