Patricio Janer

Si Patricio Martinez Janer (Hunyo 19, 1882 - Mayo 15, 1965) sarong Bikolanong parasurat asin mediko. Daing gayo aram kun siya namundag sa Juban o sa Siyudad nin Sorsogon alagad siya sa haros bilog na buhay nag'estar sa Matnog, Sorsogon.

Siya nagsurat mga rawitdawit, prosa, saysay asin mga nobela asin mga zarzuela. Susog ki Dr. Maria Lilia Realubit, si Janer nagsurat nin sobra sa 100 na halipot na osipon, mga 62 na saysay, tolong halabang osipon o nobela, asin mga rawitdawit. Ini napublikar sa Sanghiran nin Bikol (1927-1931), Bikolnon asin Bikolana mga magasin asin iba pang mga publikasyon pigpapaluwas sa Siyudad nin Naga kan kaidtong mga panahon.

Si Janer sa mga artikulong sinurat niya, maigot na nagaandorog sa lenggwaheng Bikol asin husto na sana an paghingowa na ini magtalubo asin magrambong sa literatura kaini.

Akademyang bikol

Saro siya sa kagmukna' kan Akademyang Bikol, kasararoan nin mga parasurat, mga nagtotolod kan pag'gantad kan tataramon na Bikol.

Saindang pig'organisar an organisasyon literaryong ini kan Mayo 21, 1955 na an mga iba pang kagtugdas iyo sinda: Antonio Salazar, Luis Dato, Monico Imperial, Padre Vicente Madrigal, Padre Rafael Quimpo, Padre Jose Ofrasio asin si Ignacio Meliton. Si Meliton an nagin Presidente asin si Janer an Bise-presidente.

Susog pa ki Realubit, si Janer halawig na nagtrabaho komo health officer sa Juban, Sorsogon.

Ginunuan

• Maria Lilia F. Realubit. Bikols of the Philippines. AMS Press. City of Naga. 1983.
• Patricio M. Janer. Bikolnon Biography Series. AdeN University Press. 2020.