Pensumil

An Planta kan Pensumil, Inc.

An Peñafrancia Sugar Mill, Inc. (PENSUMIL) iyo an solong molinohan asukar (asukarera) sa Rehiyon Bikol. Ini namumugtak sa Himaao, Pili, Camarines Sur. An presenteng Manager kan kompanya iyo si Mr. Senen N. Goleta. An presenteng presidente kan kompanya iyo si Atty. Wiliam T. Enrile.

An asukarera dati pagsasadiri kan Bicol Sugar Development Corporation (BISUDECO) alagad kan naglulugi na, kinapotan kan Asset Privatization Trust (APT) sa pagseguro dai matunaw an assets kaining sugar mill na nakaprenda man ngani sa Philippine National Bank huli sa dakulang utang.

Kan an Bicol Agro-Industrial Corporation (BAPCI) nag'alok na bakalon ini, an APT nag'uyon asin kan Oktobre 30, 1992 nahaman an barakalan. Sa irarom kan trade name kaini na Penafrancia Sugar Mill (PENSUMIL), pinadagos an operasyon nin paggigibong asukar kan kompanya.

An mga tawong sa likod kan BAPCI pakapoon iyo sinda Arsobispo Leonardo Legazpi, William T. Enrile, Arsenio N. de Guzman, Lazaro asin Mariano Cu asin iba pang mga prominenteng tawo sa Camarines Sur.

An mga dating empleyado na organisado sa sarong unyon nagkaso laban sa APT sa pagsingil igdi nin mga back wages, asin kun ano-anong kompensasyon alagad sa pinal na desisyon kan Korte Suprema sa kasong G.R. No. 160073, (Abundio Barayoga and BISUDECO-PHILSUCOR Corfarm Woprkers, Petitioners vs. APT, Respondent) nagbaba kan desiyon petsado Okt. 24, 2005 na mayong tamang rason na itao sainda an kahagaran na magbayad sainda an APT.

An mga tubohan na kinukuan nin tubo sa pagmolino yaon mansana sa paralibot kan probinsya nin Camarines Sur: Pili, Ocampo, Tigaon, Baao, Bato, Iriga City, Naga City, asin iba pa.