Sa Pinagdodolotan
SA PINAGDODOLOTAN[baguhon | baguhon an source]
- Plumang nakakaptan, dai ka mag-ontok
- gamita na rikas asin kosog
- ika an magdara nin sakuyang dolot
- ki D. Eustaquiong pili kong katood.
- Pakaliniga an gabos mong gira
- mani mga letrang maka-ogma baya'
- pangatamanan mong daing pagkapara'
- dai man nin ogsong, asin daing sala'.
- Enot mong gibohon magpakumbaba ka
- sa pagdodolotan kon minaatubang na
- an biyong paggalang iyong ipakita
- saka mo gamiton an pagtaratara.
- Sa mga gira mong nani-tataramon
- an kaliwanagan dai paglingawon
- nama' tuyawan ka, saka kon hapoton
- nin saimong tuyo, ini an sabihon.
- Ako an sinugong magdara nin atang
- nin si'mong katood na namomootan
- sabihon ko pa daw na saiyang ngaran!
- dai na, ta talastas mong daan.
- Aso kamong duwa idto sa Colegio
- na naghihinonod, pinagmama'wot mo
- an totoong buhay ni San Eustaquio
- pintakasi asin kasangay mong Santo.
- Nanuga' saimong mahaman kaiyan
- su panuga' niya bakong kaputikan
- ta minsan nagtios nin dakulang pagal
- puka asin sakit, inotob giraray.
Paliwanag[baguhon | baguhon an source]
An rawitdawit na ini sinasabi ni Maria Lilia Realubit[1] na tinokda' ni Mariano Perfecto asin pinalagda' sa Kalendariong Bikol. Iginuhit sa modernong pakasurat.
Toltolan[baguhon | baguhon an source]
- ↑ Realubit, Marioa Lilia F. Mariano Perfecto: Writer, Translator and Publisher, sarong artikulo nagluwas sa Katipon Gawad Bonifacio sa Panitikan, pinalagda' kan NCCA, 1998