Salvio Fortuno

Gikan sa Bikol Sentral na Wikipedia, an talingkas na ensiklopedya
Nagresibi kan Gawad Hiyangta (Ika-tolo, nakanarangha na bado)

Si Salvio Balera Fortuno (namundag, Enero 11, 1945) sarong pulitiko asin dating broadkaster. Siya ngonyan an presenteng Kongresista kan ika-5ng Distrito kan probinsya nin Camarines Sur.[1]

Edukasyon[baguhon | baguhon an source]

Si Fortuno namundag sa Nabua, Camarines Sur asin nagklase kan saiyang elementarya sa Nabua Central Pilot School, kan sekundarya sa Ateneo de Naga (ngonyan, Ateneo de Naga University). Nagkua siya kan saiyang kurso sa kolehiyo sa University of Nueva Caceres, igdi sa Siyudad nin Naga.

Pamilya[baguhon | baguhon an source]

Si Fortuno an naagom iyo si Jocelyn Faustino (kinasal Abril 29, 1970), sarong maestra, asin igwa sindang pitong aki na saro sana igdi an lalaki. An agom niyang si Jocelyn iyo ngonyan an nagtutukaw na Kongresista kan Ika-5 distrito kan probinsya nin Camarines Sur.[2]

Karera[baguhon | baguhon an source]

Si Fortuno nagpoon kan saiyang karera komo radio announcer dangan nagin Assistant General Manager kan Filipinas Broadcasting Network, Inc., Regional Manager sa istasyon nin radyo na DZGE-DWEB (Naga City) asin kan DWRC (Legazpi City). Dangan nagin siyang direktor sa Hunta Direktiba kan Filipinas Broadcasting Network, Inc.. Nagin pa man siyang Chairman sa Hunta kan mga Direktor sa Camarines Sur Electric Cooperative, Inc. (CASURECO, Inc.).

Dangan siya nagtapsok na sa pulitika. Mala ta siya nagin myembro kan Provincial Board kan probinsya nin Camarines Sur, sunod nagin Bise-Gobernador kan nasabing probinsya, asin nangagin man Acting Governor (1999-2001) igdi. An karera niya sa pulitika napadagos ta ginana niya sa eleksyon an katongdan bilang Kongresista sa dating Ika-4 na Distrito (2010-2013) kan probinsya nin Camarines Sur, asin kan an probinsya nagin lima nang distrito, siya nagin Kongresista sa Ika-5ng Distrito kaini (2016-2018).

Mga Naginibohan[baguhon | baguhon an source]

Siya an autor kan inaapod na "Fortuno Law" kun saen an siisay man na elihidong opisyal sa gobyerno, dawa presidente paibaba, pwede nang magsumpa sa sarong kapitan nin sarong barangay saen man igdi sa laog kan Filipinas sa pagtukaw sa saiyang pwesto.(RA No. 10755).[3]

Siya malinaw na nagkokontra sa nakasangat na Reproductive Health Bill sa Kongreso na naghahalat nin desisyon. [4]

Si Fortuno may mga minamantener na mga iskolar sa pagpaadal na nag'aabot nang tolong ribo.

Mga Gawad[baguhon | baguhon an source]

  • Gawad Hiyangta, para sa Serbisyo sa banwaan. Ginawad kan Sumaro Bikolnon. (2016)
  • Outstanding Provincial Board Member, Ginawad kan Gobyerno Probinsyal nin Camarines Sur.
  • Outstanding National Leader, Ginawad kan Vice-Governors' League of the Philippines.

Toltolan[baguhon | baguhon an source]

  1. [1] Archived 2019-05-13 at the Wayback Machine. House of Representatives, 17th Congress. Kinua 26-01-17
  2. Ini an Totoo. Ernie Verdadero. Bicol Mail, Abril 14, 2020. Kinua 2-06-2022
  3. [2] FORTUNO LAW. Kinua 26-01-17
  4. [3] Bicol Mail Editorial. Kinua 26-01-17