Sampan

An sampan(Chinese: 舢舨; pinyin: shānbǎn; Pe̍h-ōe-jī: sam-pán) sarong klaseng barotong Intsik na halakbang an salog asin an laba kani pwedeng umabot sa 4.5 m (14.8 piye). Kadaklan kan sampan igwang tapangko (atop) asin parati ginagamit na nganing estaran. Parati ini nakadestino sa mga interior na salog asin danaw. Dai bagay ini ilawod ta bako man na gayong purusog. Ini ginagamit sa pagsisira asin bilang transportasyon sa mga naghahanggilid na mga banwa sa kosa.

An tataramon na "sampan" hale sa orihinal na Kantones na kataga para sa "baroto", 三板 (sam pan), na an literal na kahulogan "tolong tabla" ta an kasko kaini minalakbang gibo kan an sarong tabla sa tahaw dinudukot sa duwang tabla magkaibong. Inuusar pa an tataramon na ini sa palibot kan Hong Kong ta ini an deskripsyon kan mga Intsik duman sa mga halakbang na baroto ginagamit ninda sa pagpapasakay sa mga turista duman sa palibot kan Aberdeen Harbour. Ini daa nakakaagid sa barotong inaapod na "scow" o "punt" sa Amerika.

An sampan sinasagwanan na pwede saro sanang sagwan o magka'ibong, o tokon an gamit ngane mag'isog. Alagad, an gamit na sa Hong Kong makinang de motor ngarig marikas an andar.

Sinasabing an mga sampan uso pang maray bako sana sa Hong Kong kundi sa rural na lugar sa Sur-subangan kan Asya, orog na sa Malaysia, Indonesya, Bangladesh asin sa Byetnam.

Igdi sa ronang Bikol, sa syudad kan Naga, kan mga enot pang panahon nin pagsakay ki Ina (apod kan mga Bikolano sa Inang Penafrancia) an sakayan kan rebulto ni Ina inaapod na sampan (ngonyan inaapod nang pagoda) ta mga Intsik an nagpapagibo kan sakayan sa paghatod kan Penafranciang imahen pabalik sa hinalean na Santuario na naagi sa salog kan Naga.

Mga panluwas na takod

"Cranks with Planks presents Sampans -n- Yulohs" (may mga sinapi' sa G.R.G. Worcester's Junks and Sampans of the Yangtse.)

Toltolan

Tradisyonal na (hongtou) sampan kan Shanghai, Tsina
May layag na sampan nagbalik hale sa pagsisira (Java, Indonesia)
Sadit na sampan ginagamit pang sakayan pasahero sa mga oro-isla kan Hong Kong