Sipngang Pamukaw, Paimbong
- Malipoton an kabanggihon sa rukarok nin kapagalan,
- garo baga nalulula an sakong kahaisan,
- nin huli ta nagkakaramhol na sa kahuhurop,
- ta uya baga si init, dae nang gayo napapak-it.
- Matubod daw an madinudang pakrit,
- ta baya lulunhagan nin maigot na pagsingha?
- Aw dae man baya pagkilhaga an kupot na kamot,
- Minalinga kaiyan kun minsan sa hurulnakang kulapos.
- Makangisihon man daw hilingon an batad na kuyakot,
- sa lipot kan nagsusungaw na kahimsaan,
- bagang sugok na lapaon, minatiprak kun saen,
- ta sa paghuna sadire niya an tukawang lukot,
- na binanigan kan mga diyaryog luma,
- ta naghuhuna kamo, siya turog?
- Oy, dae man baya pagsinghalan an hugak!
- Ta tibaad sa kahigosan kaini minasipnga
- an makusog na pamukaw sa matang sagin turog.
- Paolia baya, ta huhusayon ta an kinutkutan,
- Hilnga an kubal sa palad nin mahugak:
- Kinurumulan na kan bagwis na alipayon,
- ta an paus-os prente, naglupad nin palik-ad,
- sa paghiling niya baya an daghan an pansalong rakdag.
- Nagtuturo na an likidong bunghay sa ginhawa,
- Sabay sa paglukot kan panyolito, an kulangot dukot.
- Makulog man an payo, mainit an mata,
- Kalinturadong parupagulong, nalingaw kan imbong!