Stanislav Dospevski

Si Stanislav Dospevski (Bulgarian: Станислав Доспевски) iyo an pangaran inasumir ni Zafir Zograf (Зафир Зограф), aki ni Dimitar Zograf asin sobrino kan pamosong Bulgarong icon asin pintor nin mga mural na si Zahari Zograf. Siya sarong maunabihan na representatibo kan Samokov artistic school asin saro sa mga importante asin lataw na gayong mga pintor kan inapod na Bulgarian Revival. Si Dospevski iyo an saro sa mga enot na Bulgarong nakakua nin pormal na adal sa pagpinta.

Biograpiya

Si Stanislav Dospevski namundag kan 3 Desyembre 1823 sa Samokov. Nagpoon siya pagtais kan saiyang talento sa sadiring banwaan nin Samokov, dangan pinadagos niya saiyang edukasyon sa Plovdiv. Sa hubin pang maray na edad nagtatabang na siya sa ama niya kan mga pagpinturang mga imahe para sa simbahan nin Plovdiv sa Sveta Nedelya (St Nedelya), kaya nakakua siya nin amay na eksperensya sa arte. Kan 1850 si Dospevski nagpasiring Moscow, kun saen ipinadagos niya saiyang pag'adal sa Moscow School of Painting, Sculpture and Architecture, asin ngapit poon 1853 sundo' 1856 siya nag'adal sa Imperial Academy of Arts sa St Petersburg duman sa klase ni Fyodor Bruni.

Pagbalik niya sa Bulgariya sinu'lot niya an pangaran na Dospevski asin nagin tagapagpoon kan sekular asin realistikong pagpintura sa Bulgarong arte. Siya nag'estar sa Pazardzhik asin Samokov, pero pasige pagpintura niya sa Plovdiv. Durante kan Ruso-Turkiyang Gera nin 1877–1878 siya inaresto kan Ottoman na gobyerno. Siya nagadan sa laog nin preso sa Istanbul kan 6 Enero 1878.

Saro sa eskwelahan nin elementarya sa Samokov, NU “Stanislav Dospevski”, pigdadara an pangaran niya sa pag'onra saiya. An makuapo sa tuhod ni Stanislav Dospevski iyo an taga-palis na si Neli Dospevska.