Subasta

Gikan sa Bikol Sentral na Wikipedia, an talingkas na ensiklopedya
Maglukso sa: paglibotlibot, hanapon
Subastahan nin mga dakop na sira sa Hawaii
Sarong porselanang tibor edad ika-14ng Siglo nabenta kan Christie's sa $28 milyon kan 2005.
Subastahan nin mga baka sa NSW, Australya

An subasta o pagsubasta iyo an proseso nin pagbenta asin pagbakal nin paninda, produkto o serbisyo paagi nin pagtangro kaini sa mga parabakal asin pagbenta kaini sa pinakahalangkaw na tangrong presyo. An pagsubasta sa hayag, asin pataas na tinatangrong presyo iyo an pinakakumon na subasta sa presente. An mga partisipante nagpupusta nin presyo na isi kan gabos asin lambang tangro na presyo dapat mas halangkaw kisa kan naenot hanggan sa punto mayo na nin gusto magpalangkaw pa nin tangro asin an parasubasta duman na ibinibenta sa nagtangrong ultimo na halangkaw. An pagtangrong presyo minsan inaagi sana sa 'hinghing' asin an may hininghing na halangkaw na presyo iyo na an nakakabakal.

An parasubasta napoon sa minimong presyo sagkod na magkainteres an mga parabakal asin magtangro nin harohalangkaw sa pino'nan niyang tangro alagad kun mayo nanggad naggigirong, pwedeng ibaba pa an presyo ngani igwang magtakod. Sa pagsubasta igwa man sinasabing parapala na kakomplot parati kan nagpapasubasta asin siya mayong ibang tuyo kundi magpalangkaw kan presyo orog na sa produkto na pighuhuna pinagaaragawan o pinag'aaraan na gayo. Pwede man an parapala kinua kan parasubasta ngane maseguro mabakal an sarong produkto sa tama asin sa daing luging presyo. An papel kan parapala kwestyonable orog na ta peke man an saiyang partisipasyon.

An binibenta sa subasta pwedeng solo sanang produkto o serbisyo o pinagsararo na magka'aragidan na produkto o magkatarakod-takod na serbisyo na alangan pa man isuway sa pagtangro. An mga produktong sinusubasta bako na sanang mga segunda-manong gamit, o mga pintura, mga maipong artifak, mga gamit sa harong, mga auto, kundi pati naman mga serbisyo arog kan pagsemento nin kun pirang kilometrong tinampo, paghaman nin irigasyon sa oma o pagkapot kan seguridad nin sarong dakulang pagtiripon nin dakul na tawo. Sa gobyerno, obligadong gayo na gabos na patrabaho, pagbakal gamit sa opisina o sa ahensya dapat mag'agi sa subasta asin parati an tangrong presyo isinusumitir sa seradong sobre ngane mayong bentaheng mangyari kan saro. Sa gobyerno, baliktad an pagpresyo; dapat an tagatangro' iyo an may pinakahababang presyo ngane masikwit an kontrata. Totoo dakul an anomaliya sa mga siring na transaksyon sa gobyerno ta kun sa anong paagi nagigibong mapaboran an sarong grupo na bidder.

Mga iba pang sistema nin pagsubasta[liwaton | liwaton an gikanan]

Sa totoo, dakul na klase nin pagsubasta an nauuso sa ibang nasyon An pinakakumon totoo iyo an English auction na pigdiskutir igdi. An saro pa iyo an Dutch Auction na an nagpapasubasta napoon sa halangkaw na presyo pababa sagkod na igwang magtakod sa presyo niya o idtong reserbadong halaga kan produkto nakua na. An saro pa iyo idtong sarabay na natangro nin presyo alagad sa serradong sobre asin lambang saro dai isi kun gurano an pigtangrong presyo kan kakompetensya asin dai na pwedeng maghira nin presyo kun binuksan na an mga bid.

An ibang tipong pagsubasta parati kumbinasyon mansana kan mga nasambit na igdi.

Toltolan[liwaton | liwaton an gikanan]