Tanga

Gikan sa Bikol Sentral na Wikipedia, an talingkas na ensiklopedya
Maglukso sa: paglibotlibot, hanapon
Langaton, sarong klaseng tanga

An tanga mga insektong sosyal sa lindong kan pamilya Formicidae, asin kairiba an mga "magpirinsan" na kutakti asin alimbubusog, ini sakop kan order na Hymenoptera. An mga tanga daa naggikan sa mga kaapo-apoi kaini na garo hitsurang kutakti sa peryodo Cretacecus, mga 99 milyon nang taon nakaagi, asin duminakul sa manlaenlaen na hitsura kan magturunga na an mga tinanom na namumurak. Igwa ining 22,000 na species alagad an natawan pa sanang klasipikasyon nagbibilang 12,500 na species. An mga tanga nabibistong gayo sa tikong antenna kaini, asin an may buko-bukong estruktura na nataong porma sa habayan kaini. Sa saindang paglibotlibot, nasususog ninda an saindang pig'agihan na huli sa sustansyang kemikal na inaapod pheromone na saindang napaparong. Ini kinukupsit kan tanga sa pagtanda kan linalakawan ninda asin paagi na dai na sinda magbalikbalik sa saindang nadumanan na. [1]

An mga tanga nabilog nin mga kolonya na minsan binibilang sana nin pirang dosenang indibidwal nag'eestar sa mga natural na mga bungag o guang o sa mga dakula nanggad na mga kolonyang hustong organisado nang gayo, linalaklakan an mahiwas na teritoryo asin naggbibilang nin minilyon na indibidwal. An darakulang mga kolonya nin tanga inaapod nang mga super-organismo ta an mga tanga naghihiro bilang bunyog na entidad, sararo na nagtratrabaho sa pagsuporta sa kolonya. An mga darakulang kolonya parati binibilog nin mga babaeng mayong pakpak, baog, na an mga ini sarong grupo nin mga "trabahador", o mga "soldados" o mga grupong may sadyang toka na gigibohon. Sa mga kolonya, igwa man nin mga lalakeng sukat pwedeng manbados inaapod sa Ingles na "drone" asin magkapira man na mga babae na inaapod na "reyna". Huli ta organisadong gayo an kolonya kan mga tanga, ini barabaranga an gibohon: igwang mga myembro na may toka na magpakilaban sana sa mga kaiwal, igwa an trabaho an pag'asikaso sa pagbantay sa mga sugok na pinapahimsa asin nagigin mga oripon na parahanap nin kakanon asin pagsaray nin siring. [2]

An mga tanga daa haros nakolonisar an gabos nang kadagaan kan kinaban. An mga lugar sanang kulang nin mga tanga iyo an Antarctica asin magkapirang mga hararayong mga isla na haros daing mabuhay na insekto. An mga tanga natalubo sa haros gabos na ekosistema asin pwedeng 15-25% kan biomass nin kahahayupan. An saindang matryumpong pagbuhay sa manlaenlaen na kamugtakan nin kapalibutan huli sa saindang organisasyon sosyal asin sa abilidad nindang maghira kan estaran, magdisponer rekursos asin magsinurog-surogan kun may kaiwal.


Toltolan[liwaton | liwaton an gikanan]