Jump to content

The Beatles

Baguhon an mga link
Gikan sa Bikol Sentral na Wikipedia, an talingkas na ensiklopedya
An mga kaapil sa The Beatles, may mga buhok haralambo asin nagsusulot puting polo, mga itom na Amerikana.


An The Beatles sarong rock band na Ingles tinogdas sa Liverpool, Inglatierra kan taon 1960 alagad an banda nagkasuruway-suway kan 1969. An pinakakagmukna kaini iyo sinda John Lennon, Paul McCartney, George Harrison asin Ringo Starr. An grupo musikal na ini hiniling na iyo an pinakalataw asin pinakamaimpluensyang pag'iriba sa lantad nin musika sa mga dekadang idto sagkod ngunyan. Gikan sa istilong skiffle, beat, asin rock'n'roll, an saindang tanog naging halo nin classical music asin traditional pop na naging simbolo kan mga katubodan nin kadaklan nin mga baby boomers sa dekadang sesenta.

Sa Lennon asin McCartney, an duwang nangengenot na mga songwriter kan grupo, asin an grupo nag'ekspiremento sa iba-ibang istilo asin klase nin musika asin sinda nagin idolo kan counterculture na nagbutwa kan mga taon 1960.[1][2] Hale sa dating titulo na The Quarrymen, pinunan ninda an saindang karera sa mga club sa Liverpool asin sa Hamburg, Alemanya sa taon nin 1960, kaibanan an saindang dating bass player na si Stuart Sutcliffe. Puon sa puntong ini, nagbago sa pag-ultanan kan mga paratugtog nin drumkit an grupo, puon kina Pete Best sagkod na mahanap ninda si nasikatan ninda na si Ringo Starr kadtong 1962. Pinakusog ni Brian Epstein sa taon nin 1961 an saindang reputasyon sa lantad nin musikang Inglatierra, mantang si George Martin naman an nagparebolusyonar sa aspetong produksiyon kan grupong ini. Pumirma sinda sa EMI tas nakua ninda an inot nindang kapangganahan, na inaapod "Love Me Do," (1962). Napalukso sinda sa pagigin bantog sa paagi kan Beatlemania, sarong unibersal na uso sa mga daragita kan Anglosphere na nagpaimpluensya kan saindang karera paluwas Inglatierra pa-Amerika.

Sa puntong 1964, naging bistado an banda sa entabladong internasyonal. Dai tinutuyong pinauswag ninda an kulturang pop kan Britanya, sa paaging maging pinakalataw na promotor kan British Invasion of the United States, pangyayari na nagpadara nin mga istilong musikal na Inglatierra pa-Estados Unidos. Bilang simbag kan saindang mga tagahanga, pinaluwas kan grupo an inot nindang pasaling A Hard Day's Night sa taong 1964. Sa pagmawot kan mga miyembro, nagkonsentrar an banda sa estudyo para maipahiwas an saindang katalingkasan sa paglalang kan saindang tugtog. Sa panahong ini, ipinaluwas ninda an saindang mga pinakakonsiderar na mga obra maestra, arog kan Rubber Soul, Revolver, Sgt. Pepper's Lonely Heart's Club Band, Magical Mystery Tour, The Beatles (White Album), Yellow Submarine, Abbey Road asin Let It Be. Ining mga pinakaimpluwensiyang mga kapangganahan an nagpalangkaw kan paggamit nin mga drogang pang-aling-aling, nagpaisi kan espirituwalidadang Sirangan, asin nagtabang sa pag-iba kan lantad nin musika sa mga dekadang idto.

Ginikanan

[baguhon | baguhon an source]

1956-1963: Pormasyon

[baguhon | baguhon an source]

Sa panahong Hulyo 6, 1956, nagkamidbidan an kinseng anyos na John Lennon, miyembro kan skiffle band na an The Quarrymen, asin paratugtog nin bass na si Paul McCartney sa rineserbang simbahan sa Woolton, Liverpool. Nagsagibo sindang nagkapirang tugtog sagkod sa maging permanenteng kaibanan kan The Quarrymen si McCartney. Opisyalang nagkarawat si McCartney bilang sarong bassist asin an The Quarrymen sa bulan nin Oktobreng 1956. Kadtong Pebrerong 1958, inimbitar ni McCartney an saiyang barkadang si George Harrison sa saro nindang pagsagibo. Naipabilib kan kinseng anyos na si Harrison an saiyang kakayahan gumitara kay Lennon, dawa akion pa an edad sa pananaw niya si Harrison. Pagkalipas kan sarong bulan, naghirilingan ulit an tolo, sa taas naman kan sarong Liverpudlian bus. Nagtugtog si Harrison kaibanan an banda nin instrumental kan tugtog na "Raunchy." Poon kaidto, nagin lead guitarist kan banda si George Harrison.

Sa panahong Enerong 1959, nang humarali na an huring kabanda ni Lennon, pinunan niya an saiyang adal sa Liverpool College of Art. Habang nag-aadal si Lennon sa saiyang kolehiyo, umimbitar siyang mga biristo niya sa banda, arog kina Stuart Sutcliffe, sarong pintor sa klaseng arte niya. Sa parehong panahon, nagdurukotan an tolo, na inaarapod an sadiring "Johnny and the Moondogs" na si Lennon, McCartney, asin Harrison. Nuarin man may paratugtog sindang drumkit, nagturugtog sindang mga kantang halos kapareho sa rock'n'roll. Kan Enerong 1960, nagin sulimenteng bassist kan banda si Stuart Sutcliffe. Nagproponer an Sutcliffe na paliton an ngaran kan banda nin Beatals, bilang pag-omaw kay Buddy Holly and The Crickets. Pirang bulan sindang naggamit kani sagkod sa Mayo, binago nindang magin Silver Beetles, habang nagtutogtog kay Johnny Gentle sa Eskosya. Sa Hulyo, iniba ninda ulit an pangaran na magin Silver Beatles, sagkod na magin sinda The Beatles.

Amay na pasundayag asin popularidad

[baguhon | baguhon an source]

Si Allan Williams, an pansamantalang namamahala kan The Beatles, nagreserbang istaran kan banda sa Hamburg, Alemanya. Nirekrut ninda si Pete Best, sarong temporaryong tagatugtog nin drums, kan Agostong 1960. Kan nakakontrata an banda kay Bruno Koschmider, kagsadiri nin sarong club sa Hamburg, luminarga an grupo pa-Hamburg sa minasunodang apat na aldaw.

Kinumberte ni Koschmider an kadaklang parteng erotiko kan distritong Reeperbahn sa St. Pauli na maging mapag-istimar sa lantad nin makabagong musika, kun sain ikinaag niya an The Beatles sa Indra Club. Sinarado niya an Indra Club huli sa reklamong ribok, kaya linipat niya an banda sa Kaiserkeller Club nin Oktobre. Kan naaraman niyang nagtuturogtog sinda sa karibal nindang Top Ten Club, nagpataw si Koschmider nin paising palayas sa banda asin nagreklamo sa awtoridad sa menor na edad ni Harrison. Prineparar an pagdeportar ni Harrison sa huring kabtang kan Nobyembre. Sa minasunodang semana, rineklamo ulit ni Koschmider an duwa na si McCartney asin Lennon sa katanosang pagsulo nin kondom sa laog kan Bambi Kino, si pigistaran ninda. Dai nahaloyan an pagdeportar pagkatapos. Buminalik si Lennon sa Liverpool kan Nobyembre mantang umistar si Sutcliffe sa Hamburg sagkod sa Pebrero kaibanan an saiyang nobyang Aleman si Astrid Kirchherr, an pinakaenot na retratista kan The Beatles.

Sa duwang taon, nagin permanenteng residente an The Beatles sa Hamburg, na ginagamit an drogang pang-aling-aling na an Preludin. Sa taon 1961, an saindaing ikaduwang pag-iriba sa Hamburg, binulog ni Kircherr an buhok ni Harrison sa istilong "exi" existential, na inadaptar kan ibang miyembro. Sa huri, naghale si Sutcliffe sa banda tanganing matungkasan niya an saiyang adal sa Alemanya. Kinontrata kan produsyer na si Bert Kaempfert an banda sagkod Hunyong 1962, kun sain man naarikila an banda ni Tony Sheridan, sarong Inglatierrang gitarista, sa ngaran kan Polydor Records nin sarong taon. Sa single ni Sheridan na "My Bonnie," nairekord kan Hunyo 1961 asin pinaluwas nin apat na bulan, minidbid sinda sa titulong "Tony Sheridan & The Beat Brothers," na nakaabot nin 32 sa Musikchart kan taon na yan.

Pagkatapos kan pag-istar ninda sa Hamburg, nag-ako an grupo nin kabantogan sa sainding ginikanan sa Liverpool, kahilera kan Merseybeat movement. Alagad, nalangkag sinda kan paorootrong patugtog. Kadtong Nobyembreng 1961, namiridbid an mga miyembro kay lokal na kagsadiri nin record shop asin prodyuser na si Brian Epstein sa Cavern Club, saro sa rutinang lugar na tinuturogtogan ninda.

Enot na pagrekord sa EMI

[baguhon | baguhon an source]

Sa masunod na pirang bulan, si Epstein an nainombrahang namamahala kan banda kan Enerong 1962. Sa bilog kan taong 1962, prioridad i-talingkas an banda sa kontrata ni Kaempfert ni Epstein. Nag-olay an duwang partido asin sinda nag-abot sa resolusyong maamay na luwas kan grupo karibay sa huring sulimente na pagrekord sa Hamburg. Pag-abot nindang Hamburg Airport kan Abril, nasalubong an banda nin baretang madisganar hale kay Kirchherr na gadan na si Sutcliffe huli sa brain hemorrhage. Pinunan ni Epstein an negosasyon sa kadaklan nin mga record labels para sa bagong kontrata. Nakipag-olay si Epstein nin maamay na pagpaluwas sa kontrata kan Polydor, kapalit sa pagrekord nin mga backing track kay Tony Sheridan. Pakatapos kan sarong audisyon kan Bagong Taon, sinikwal kan Decca Records an The Beatles, nagsasabi na linuluma na an mga grupong nakabase sa gitara. Alagad, pakahilis nin tolong bulan, pinirma kan prodyuser na si George Martin an banda sa label na Parlophone kan EMI.

An enot na sesyon nin pagrekord nangyari sa EMI Recording Studios sa London kadtong Hunyo 6, 1962. Nagreklamo si Martin sa presenteng paratambol na si Pete Best, na sinusuherir na ribayon siya. Sa kabangaan kan Agosto, rinibay si Best ni Ringo Starr, na naghale sa Rory Storm and the Hurricanes para lang akuon an posisyon. Kan Septyembre 4, nakarekord an The Beatles nin 'Love Me Do,' alagad nangarkila ulit an Martin nin bagong paratambol na si Andy White para sa pantolong sesyon sa masunod na semana. Nagbunga sa pigtutukoy na mga semana sa estudyong EMI an mga kantang "Love Me Do", "Please Please Me", asin "P.S, I Love You."

Sa primero, pinili ni Martin an bersyong "Love Me Do" na nagtatambol an Starr, alagad sa kasunodang produksiyon, nagtutogtog siyang pandereta. Pinaluwas kan inot na kabtang kan Oktobre, nakaabot nin dise syete an "Love Me Do" sa tsart kan Record Retailer. Paglipas nin sarong bulan, naimidbid an banda sa telebisyon sa paagi kan rehiyonal na pangaroaldaw na programang People and Places. Nagpalataw si Martin na padalion an tempo kan kantang "Please Please Me," kaya, kan huring kabtang kan Nobyembre, nahula kan prodyuser an saindang enot na kaganahan sa saindang banwaan.

Kan Disyembreng 1962, natapos na kan grupo an saindang pasundayag sa Star-Club kaiba an kabuoang pag-istar sa Hamburg. Kan 1963, nagkasararo an mga miyembro sa kasunduang magkanta kada-album, lalong lalo na kay Starr, na dawa limitado an sakop kan boses, na magkanta nin dawa saro lang na numero musikal. Sarong simbiotikong kasurugan sa pagsurat nin kanta an naabot ni Lennon-McCartney. Huli sa pakikipagtabangan kan duwa, naolang an kakayahang magkanta nin pangenot na boses si Harrison. Tanganing mapakarhay an saindang pampublikong imahe, inenkaminar ni Epstein na gibohon an saindang mga pahirohiro propesyunal.

1963-1966: Beatlemania asin pankinaban na mga pasundayag

[baguhon | baguhon an source]

Kan Pebrero 11, 1963, nagrekord an The Beatles nin sampulong kanta sa sarong sesyon sa estudyo para sa saindang debut LP, an "Please Please Me." Ining album nadagdagan kan saindang mga nakaging singles. Kinunsiderar ni Martin na i-rekord nin presente an saindang mga pasundayag sa Cavern Club, alagad kinulang daa an mga akustika kan edipisyo sa pagrekord. Kaya, nag-"arog" nalang siya nin mga namamatian kan presenteng pasundayag na album sa sarong padagos na sesyon sa Abbey Road Studios. Pagkatapos kan matamtam na "Love Me Do", an single "Please Please Me" nakaabot sa kadaklan na tsart sa Britanya nin numero uno, maliban sa Record Retailer na numero dos an abot.

Pinaluwas kan 1963, enot sa onseng mapangganang mga album sa Britanya an "Please Please Me". An pantolong single kan banda, "From Me To You", na nagluwas nin Abril, an nagpoon kan mabantog na labing pitong mga singles sa Britanya. Pinaluwas kan Agosto, nakamit kan "She Loves You" an pinakamarikas na benta sa Britanya, na sa sarong bulan, tolong-kapat sagkod sa sarong milyon an naprodyuser na kopya. Ini an enot nindang single na makaabot nin milyong kopya asin nagdanay kan posisyong pinakamarikas na benta sagkod sa 1978.

Ining kabantogan an nag-akit nin pagkalantad kan The Beatles sa medya, kun sain nalampasan kan banda an mga piglalaoman kan mga musikero kan panahon na idto. Tolong beses kan enot na kabtang nin taong 1963, pinasyar kan The Beatles an Britanya: an enot, apatang bulang pasyar kan Pebrero, asin an tolong bulang pasyar kan Marso sagkod Hunyo. Kan Oktobre 13, nagtugtog an banda sa pinakamabantog na programang bodabil sa intirong kinaban kan Britanya na an Sunday Night at the London Palladium. Ining paluwas nakaabot nin 15 milyong paradalan. Saro sa mga nasyonal na diario muninukna an ngarang 'Beatlemania' tanganing mailadawan an pambihirang kadklan nagkukurumpol na deboto kan banda. Siring man an penomena na nangyari kina Roy Orbison kan saiyang pasyar poon Mayo sagkod Hunyo.

Sa huring Oktobre, luminarga an The Beatles pa-Suwesya para sa saindang liman bulang pasyar. Pagbalik ninda sa Britanya, nasalubong sinda nin dakulang mangriribok na kadklan mantang naguuran sa Heathrow Airport. Mga 50 abot 100 na periodista asin retraistra man an nangkukurumpol duman, enot sa sanggatosang insidente. Kan minasunodang aldaw, pinunan nanaman ninda an saindang panapat na palibot kan Britanya. Nin panahong huring Nobyembre, nagpoon an lokal na mga pulis maggamit nin bomba pampugol kan padaliang pagkusog kan Beatlemania. Kan Nobyember 4, nagpasunayag sinda sa Royal Variety Performance sa Prince of Wales Theatre sa enotan ni Queen Mother asin Princess Margaret.

Nagdanay an Please Please Me sa numero uno kan Record Retailer sa laog nin trientang semana na pinalitan kan saro nanaman nindang mapangganang na an With The Beatles kan 22 Nobyembre. Halos 270,000 na kopyang plaka naggibo, asin naka-abot nin kabangang milyon sa sarong semana.

Binaligtaran kan EMI an iskedyul nin pagluwas nin album na With The Beatles na dapat nagpahuri sa single na "I Want To Hold Your Hand." Nakua an atensyon kan peryodista na si William Mann kan The Times, na pig-omaw niya sa sarong komentaryo. Nagdakul an kabantogan kan The Beatles sa saindang banwaan sa dyaryong sinurat ni Mann. An With The Beatles an nagin panduwang pinakamabentang album sa kasaysayan nin Britanya. Sa pag-surat nin inaapod na sleeve notes kan album, kinaag ni Tony Barrow, an an mabantog na alyas na an 'fabulous foursome', na inadaptar kan medya na an 'Fab Four'.

Enot na pagbisita sa Estados Unidos asin an British Invasion

[baguhon | baguhon an source]

An Amerikanong filial kan EMI, an Capitol Records, an nagluway kan pagluwas kan Beatles sa banwaang iyan.

Mga album

[baguhon | baguhon an source]

Mga pasali

[baguhon | baguhon an source]

Mga panluwas na takod

[baguhon | baguhon an source]


Toltolan

[baguhon | baguhon an source]
  1. ↑ [1]www.allmusic.com.Kinua 09-09-17
  2. ↑ [2]genius.com. Kinua 09-09-17
Kinua sa "https://bcl.wikipedia.org/w/index.php?title=The_Beatles&oldid=290303"