UP Ibalon
An UP Ibalon sarong kaayonan nin mga estudyanteng Bikolano sa Unibersidad kan Pilipinas, sa kampus Diliman. Ini tinogdas kan taon 1974. Nag’aako ini nin mga kaapil mga estudyanteng nasususog an saindang ginikanan sa Ronang Bikol, Filipinas. An ngaran kan organisasyon gikan sa terminong Ibalon na iyo an soanoy na pangaran kan Bicol, sarong rona’ sa habagatan kan Manila, islang Luzon. Nasasabing ini an lugar pinangyarihan kan mga istoryang napalaman sa epikong Ibalong.
Kamundagan[baguhon | baguhon an source]
An nagporoon kaini asin nagpatindog iyo an tolong estudyante na base sa Manila asin kagpitong (17) estudyante na nakabase man sa probinsya. Sinda an nagmukna asin naghaman kan konstitusyon kaini kan Desyembre 1, 1974 diyan sa Parks and Wildlife Nature Center , Quezon City.. An UP Ibalon mawot na magtolod kan tolong obhetibo: an katibayan sa pag’aadal, liderato, asin hararom na kagamiawan sa mga bagay na bikolnon, orog na an saiyang kultura, agi-agi, asin pagka-bikolnon. Namundag sa panahon na ley militar na pinadadanay ni Pres. Ferdinand Marcos, an kasararoan nagin instrumento sa pagpukaw nin paggamiaw sa pulitika asin sa pagmakulog asin pagreparo kan mga nangyayari sa sosyedad. Orog pa, nakisaro an kaburunyogan sa komunidad kan UP sa saiyang pagkikitusay na dai makontrol ni Pres. Marcos an unibersidad asin maalagaan an saiyang katalingakasan pag’abot sa pulitika asin akademya bilang ini an nangengenot na unibersidad kan estado.
Totoo, an mga kagmuknang myembro kaini, arog ki Apolonio Baylon (kagtogdas na pamayo) asin arog man ki Floro Balce, mga kaapil na sa mas dakulang mga hiron na piglalaban an kama’wotan na malungkas an banwaan sa ley militar na pinagimponer ni Pres. Marcos, asin malabanan an mga inhustisya nagdadanay sa sosyedad. An ibang mga kaayon ngane naagihan na an makulong kan mga elementong militar ni Marcos huli sa maisog nindang paninindogan. Alagad, kadaklan kan mga myembro bakong makuring agit-agitan pag’abot sa pulitika asin mas aktibo sa mga aktibidad na kultural asin sa mga proyektong para sa hubin.
Sa laog nin 30 taon nin buhay kaini, an UP Ibalon mabibilang an dakul na alumni niya na mga marhay na an mga bugtak sa lantad nin negosyo asin sa mga iba-ibang propesyon. Warak sa bilog na kinaban, si dating mga kaapil kan UP Ibalon nagburunyog sinda kan Pebrero 2008 .sa pagbilog kan inapod na UP Ibalon Bicol . An sentro nin administrasyon nakabase sa siyudad nin Naga, ini nagtatabang na gayo sa mga estudyanteng haiskul na makalaog sa Unibersidad kan Pilipinas. Ngonyan an kasararoan nagdadakula nang komunidad sa Web. An websayt tinotonggo na madara an manlaenlaen na bareta, mga opinion, asin mga impormasyon sa maabot kaini sa internet. An namomoon kaini asin nag’aataman kan websayt iyo si Andy Gimpaya, M.D., sarong posikit sa kompyuter asin doktor sa medisina sa siyudad kan Naga, Filipinas asin gradwadong UP. Katuwang niya man si Augusto F. Mesia, M.D., sarong anatomic asin clinical pathologist na nakabase sa Nweba York asin iba pa man mga aktibo sa kaburunyogan arog halimbawa ki Dr. Josephine Robredo-Bundoc, sarong espesyalista sa Rehabilitation Medicine, haling UP-PGH na namomoon sa pagdara nin mga misyon sa Bicol para sa mga daing sukat na may mga magabat na kahelangan.
An UP Ibalon Bicol pig’aagyat an saiyang mga kaapil, mga taga’anduyog asin mga amigo na makihiras sa komunidad, sa katuyohan magantad an kamugtakan kan tawo, siisay man siya, ano man kolor niya, anoman pagtubod niya sa pulitka o sa relihiyon.