Valentin de los Santos

Gikan sa Bikol Sentral na Wikipedia, an talingkas na ensiklopedya
Jump to navigation Jump to search


Si Valentin de los Santos (c. -ngdn. 1967) iyo an katogdas asin lider kan partido pulitikang inapod na Lapiang Malaya na minukna niya kan mga taon 1940. An mga kaapil igdi gikan sa mga kasaraditan gikan sa Habagatan Luzon, o sa bandang Kabikolan. An saiyang partido pigtotolod an tunay na hustisya, tunay na pagkaparantay asin tunay na katalingkasan. An partido niya alagad pigtutubod an pagkamit kan mga siring na kamawotan sa Ikaduwang Pagdatong ni Hesukristo asin nagsasarig na gayo sa mga pagpangadye asin sa mga surusu'lot na mga darupi' o anting-anting. An partido niya may salak na praktis sa relihiyon arog kan pagpamibi asin pagkomunikar sa inapod nindang 'Bathala', asin sa mga heroe nasyonal arog ki Jose Rizal.[1]

Si del los Santos namundag sa Gainza, Camarines Sur.

Kan eleksyon presidensyal 1957 an partido niya nagpartisipar asin an nagdalagan na kandidato para presidente iyo si Valentin de los Santos asin sa pagkaBise Presidente iyo si Restituto Fresto. Pareho sinda nadaog kan kandidato na sa Carlos P. Garcia asin Diosdado Macapagal, na mayo pang nakuang 0.50% kan boto. An iba man na kaapil nagkandidato sa eleksyon senado kan taon na idto alagad an pinakalataw na kandidato kaini nagkamit sanang 8,915 na boto o ika-41 sa lista sa walong posisyon na pigralabanan.

Alagad, siya daing pagluyang-boot maski nadaog ta pag'eleksyon 1961 kun saen guminana si Diosdado Macapagal, siya kandidato man para presidente, asin siring man kan 1965 kun saen an guminanang kandidato para presidente iyo si Ferdinand Marcos. Kadaklan kan publiko paghiling saiya may diperensya sa payo.

Kan Mayo 21, 1967, an grupo nagmartsa pasiring kuta sa Palasyo Malankanyang ta pirit huhuroton na si Ferdinand Marcos magbaba sa pwesto ta mayo man daa natatawan solusyon an pagtios, pagkawarang daga kan mga dukha asin an pag'aapi kan mga Amerikano na tinutugot kan presidente na mangyari.. Armado sana nin mga sundang, may mga anting-anting saklay sa liog, an grupo na nagbibilang mga 400 na indibidwal asin nakabadong uniporme na asul may kapang pula-giyaw an kolor, sinda nagmartsa pasiring sa Palasyo Malakanyang. An Konstabularyo binagat sinda sa Taft Avenue, armado nin mga M-16 na badil. An grupo dinaluso' an nagbabagat sainda asin sinda pinagpa-asak'asakan. Sinasabing 33 an natigpo asin 47 an nalugadan o erido sa mga myembro kan kulto. An mga dai naano, kabali si de los Santos, pinag'aresto sa kargong sedisyon, alagad si de los Santos idiniretso sa Ospital Mental ta may pagkalapong daa. Igwang mga report na nagadan sa laog kan ospital ta pigbaranog, alagad, an mga suportador nagsasabi na buhay siya asin nagadan na toninong sa edad na 80 sa Nueva Vizcaya.[2][3][4]



Toltolan[liwaton | liwaton an gikanan]

  1. [1] The Bizarre Life and Ugly Death of the Man who Challenged Marcos. Kinua 20-01-17
  2. [2]Philippines:A Bothered Archipelago. Kinua 20-01-17.
  3. [3] The Bizarre Life and Ugly Death of the Man who Challenged Marcos. Kinua 20-01-17
  4. [4] MOMENTS IN PHILIPPINE HISTORY : VALENTIN DE LOS SANTOS AND THE LAPIANG MALAYA MASSACRE. Kinua 20-01-17.