Wikipedia:Mga panyayari sa ngonyan/Archive

Gikan sa Bikol Sentral na Wikipedia, an talingkas na ensiklopedya
Maglukso sa: paglibotlibot, hanapon

Mga laog

Sarong Rusong Iskolar Naghula na an Amerika Magsisiriblagan[liwaton an gikanan]

Si Igot Panarin, sarong profesor sa akdemya kan Ministry of Foreign Affairs kan Rusya, nagpahayag sa peryodikong Izvestia kan Lunes (Nob. 24) na an Estados Unidos masiriblag sa anom na rona bunga kan krisis pinansyal na sinasapo kaini ngonyan na panahon. Sabi niya, huli kan pagkapo'ngot kan mga Amerikano sa nangyayaring krisis, an Amerika magkakabaranga' sa anom na rona'- an Pacific, an Habagatan, an Kosang Atlantik, an mga Tangang Estado, an mga Amihanan na Estado. Asin an Alaska, pwede nang gabringon kan Rusya huli kan kaluyahan na kaini. [1]


Babae Nagpapadara Hubang Retrato Niya Sa Mga Menor de Edad[liwaton an gikanan]

Si Kimberly Arigot, sarong ina, 40 anyos, kan Syracuse, Utah, nagaatubang sa kaso na pakiki-sex sa mga menor-de-edad na mga lalaki pakatapos magparapadara siya nin mga retrato paagi nin selpon kun saen siya hubang entero, sa mga lalaking nageedad pa sanang 15 sagkod 18. Ini an pig-osip kan MyFOXUtah.com kan Martes, Nob. 25. [2]


Estudyante Naghugot, Nagpadalan pa sa Internet[liwaton an gikanan]

Sarong estudyante sa kolehiyo, si Abe Biggs, kan FORT LAUDERDALE, Florida, naghugot kan Nob. 21 sa atubangan nin webcam na pigtakod niya sa Justin.tv na nadalan nin rinibong tawo. Huna kan ibang nagdadalan nagsusuba sana siya. Pigsosodo'sodo' pa siya kan iba na ipasige an paghugot. Pakalihis 12 oras, mangirhat na nadalan na may pulis nang uminabot ta ipigreport kan iba . Idto palan totoo si paghugot niya. [3]


Huna Tumor Yaon sa Hutok, Idto Palan Olod[liwaton an gikanan]

Sarong babae na tagaPheonix, Arizona, si Rosemary Alvarez, nagpa-opera sa hutok kan Nob. 19, ta pighuna may tumor asin pigparakulogan na siyang payo. Kan binuksan an hutok niya ni Dr. Peter Nakaji, olod an nakua, buhay na buhay. Sabi kan mga doktor nakua daa ini sa maati na kamot o dai luto na marhay na pagkakan.[4] [5]


Tolong Akusado sa Pagbomba sa Bali Inutasan Na Nin Buhay[liwaton an gikanan]

Tolong militanteng Moslem na pigsahotan mga kaayon sa Jeema Islamiyah asin akusado sa pagbomba sa sarong resort sa Bali, Indonesia (Okt. 12, 2002) an pinutlan na nin buhay kan Sabado (Nob. 8) paagi nin firing squad. Sa pagbombang idto, 202 katawo an nagkagaradan, kadaklan mga dayong turista.

An tolo, sinda Imam Samudra, Amrozi Nurhasyim asin an saiyang tugang na si Ali Ghufron dai lamang nin pagssolsol asin ogma pa sa ginibo ninda ta sinda daa maluwas mga martir, asin soboot kinakastigo ninda an Amerika sa mga kasalan na ginigibo kaini sa Afghanistan asin sa ibang lugar. [6].


Dikit Na an Mga Doktor Ta Nagdurulag[liwaton an gikanan]

Kulang nang maray an mga doktor sa Irak gibo kan kariribokan igdi. Ngonyan an gobyerno pigtetentaran an mga doktor na magbaralik na asin tinatangroan sinda nin halangkawon na pasweldo asin may higot na proteksyon ngani lang mahipnoan an makuring pangangaipo sa mga ospital sa Irak. Si Dr. Hamza Abdullah Salah, Hepe kan Mayor na Ospital sa Baghdad, nagsabi na siya dai nakahale-hale ta igdi na siya naggurang asin dai niya matios an makaherak na kamugtakan sa saiyang nasyon. Kadaklan kan si mga doktor nagpasiriring sa Syria, Jordan asin an iba sa rona kan mga Kurdo. [7]


Mga Embargadong Harong Nagdadakul[liwaton an gikanan]

Bilang kan mga harong na pighuhulogan sa utang asin nagkakaerembargo nagdadakul sa United Kingdom asin tuminaas na gayo, mala ta sa ika-2ng quarter kan taon na ini 11,054 an na-embargo o 71% an itinaas kun ikumpara sa parehong periodo kasu sarong taon. Ini pinagbareta kan Financial Services Authority sa sinabing nasyon. Siring man, an presyo kan mga harong nagpaparababa resulta kaini. Iyo ini an ibinareta sa BBC News ngonyan na Okt. 28. [8]


Amerika Homot Makipag-olay Sa Taliban[liwaton an gikanan]

An Estados Unidos naghohomot o nagpaplano na makipag-olay sa Taliban, grupong Islam na dati iyo an naggogobernar sa Afghanistan, sa paglaom na mainaan an naglalangkaw na violencia sa Afghanistan asin Pakistan, lakdang na dai nanggad pag'isipon kan enot na mga bulan. Ini an bareta na nagluwas pa sana kan Okt. 28 sa Foxnews. [9]


Mga Kriminal Ginagamit An Sarong Websayt Pag-ikit NIn Detalye Kan Credit Card[liwaton an gikanan]

An pulis sa Inglatierra katuwang an FBI kan Amerika, nagsakyada sa mga opisina kan grupo nagpapalataw nin websayt sa internet, an Darkmarket. Sinasabi man na an websayt na ini nalalaogan sana kan mga myembro kun saen nagriribayan sindang impormasyon manongod sa pagha'bon kan mga sekretong detalye kan mga credit card na saindang naiikit sa publiko. An websayt tolong taon nang nakalantad sa internet asin 60 katao an nasikop na imbwelto sa krimen. Ini an pigbareta kan BBC ngonyan na Okt. 17 lang. [10]


Asayti kan Iraki Isusubasta[liwaton an gikanan]

Ipigbareta kan NPR ngonyan na aldaw (Okt. 5) na an gobyerno kan Iraki isusubasta an pagkapot kan negosyo kan saindang asayti sa laog kan bulan na ini (Oktobre) asin labing tolong dosenang mga darakulang kumpanya sa asayti an nakalinya na magbali sa subastang ini. [11]


Dakulaon na Orig Iyo na Logod an Kagdaog[liwaton an gikanan]

Sarong dakulaon na orig na nagsalampay sa harong ni Caroline Hayes, 63, kan Uki, New South Wales, Australia an ibinareta kan Sept. 23 (Martes), na nagin nang maray agresibo asin habo na ngani paluwason an amo niyang si Hayes kun ini makasilyas sa kasilyasan sa natad. Binabagat siya, saka kinakagat asin itinotolod pa siya palaog. Kan inaalaw niya gamit an samhod, kinaragat saka pinurutol sana ini kan abusadong orig. Pigsumbong niya sa pulis na lokal, alagad dai nakayang dakopon. Ipinagbahala sa Rural Lands Protection Board an pagdakop kaini, na nangako dai man bubunoon ining orig.


Marriott Hotel Sa Pakistan Pinaboag: 53 an Gadan[liwaton an gikanan]

Sarong trak na pano-pano nin bomba na pigtataya nagaabot 1,300 na libra an tagom an pinaboag sa atubangan kan otel na Marriott igdi sa Islamadad, kapital kan Pakistan. An limang-eskalon na otel enterong narogba' asin an grabing pagboag nagresulta sa 53 katawo an nagadan asin kuminalot sa daga nin rarom na 24 pie na may buka na 59ng pie. An pagpaboag pigsasahotan gibo kan kan Taliban o kan al-Kaida. Nangyari ini kan alas otso nin banggi kan nakaaging Sabado (Sept. 21). Sa magna nagadan, nakadamay pa an embahador na Checo asin duwang Amerikano. Sabi ni Primer Ministro kan Pakistan si Yousuf Raza Gilani, "Gusto nindang marongkab an demokrasya asin ratakan an samong ekonomiya." [12]


Asayti Naghuhuros Na An Presyo Paibaba[liwaton an gikanan]

Kun kan Hulyo an presyo kan asayti uminabot sa makahangog na $147 an bareles, ngonyan daa an presyo nagbabaro-balintong na paibaba, sabi ni Daniel Yergin, chairman kan Cambridge Energy Research Associates. Ngonyan an presyo kan asayti naghuros na sa $92 an bareles. Duwa an rason tinao niya kun ano ta siring: enot, huli daa sa krisis pinansyal na minamate ngonyan. Ikaduwa, huli sa malomlom na bista kan pankinaban na ekonomiya. Ini an pahayag ngonyan na Sep. 17 kan NPR, sarong media na parabareta.[13]


King Jong II kan North Korea Pighuhuna Na-Stroke[liwaton an gikanan]

Si King Jong II, lider asin pamayo kan North Korea pigsasabi kan mga opisyales sa US Intellegence na posibleng na-stroke huli kan pangyari na dai nagtunga asin dai nagpahiling sa ika-60 anibersaryo kan pagkatogdas kan North Korea kan Martes (Sept. 9), saro sa pinaka-importanteng maray na okasyon sa nasyon na iyan. An huringhuding na ini naglalakop huli ta daing toltol na bareta makua sa opisyal na pamahayag kan gobyernong Koreano.

Pigsasabi-sabi kan mga paramasid na an posibleng kagsalida saiya iyo an aki niyang matua si Kim Jong Nam, 37, na inooyonan kan Tsina o an tugang-sa-ama niyang si Kim Jong Cheol, 27, na kinakampihan man kan mga lideres sa laog kan nasyon. [14]


Mga Tubo Itinutusok Sa Mga Pasyente Minsan Dai Man Kaipuhan[liwaton an gikanan]

Nadukayan na tolo sa sampolong pasyente sa mga ospital tinutusokan nin mga tubo na dai man talaga kaipuhan, ini an higot na patanid kan mga parmasyutiko sa Britanya. An tubo, na cannula an apod, uginagamit orog na kun dai makakakan an pasyente, daing malay an pasyente o ngani madali an pagpabulos nin anoman na likidong bulong na pinpaagi sa mga ugat.

An siring na praktis, na tusok sanang tusok dawa dai kaipuhan, itinatambara an pasyente sa mga posibleng impeksyon asin pagbilog kan nagdadalahay na dugo sa hawak. An magkapira ngani daa, susog sa adal ninda, tinutusokan pero dai man ginamit na aktwal. Iyo ini an mga nadiskubre kan mga kag-adal sa bagay na ini na nakabase sa Aberdeen's Robert Gordon University. An saindang report pigpresentar sa British Pharmaceuticasl Conference duman sa Manchester, osip ini kan BBC News ngonyan na Sept. 8. [15]


Zardari, An Balo ni Benazir Bhutto, Nabotohan Presidente Kan Pakistan[liwaton an gikanan]

Sa eleksyon para sa presidente, si Asi Ali Zardari iyo an nakaluwas na presidente kan Pakistan. Siya an balo ni Benazir Bhutto, si dating Primer Ministro na inasasinar. Siya nakua an 481ng boto sa natataya na 702 maski ngani kaipuhan mansana an 352 na boto ngani siya makaluwas. Nalampaso niyang husto si duwa niyang kalaban sa eleksyon, si Saeeduz Zaman Siddiqui, dating hokom, asin si Mushahid Hussain Sayed, na suportado kan partido ni Musharraf, an PML-Q. Matukaw siya sa pagkapresidente aatubangon an kadakul-dakul na problema sa ekonomiya, asin an problema sa paghinimbang kan mga pwersa sa saiyang nasyon arog kan pagtimpla kan paki-trato sa Amerika, paki-trato sa Army asin sa pagsumpo kan nagdadakulang insurgencia nin mga agit-agitan na Moslem. [16]


Bagyong Gustav Malamasa Sa Gulf Coast Kan Estados Unidos[liwaton an gikanan]

An bagyong Gustav na sinasabing sobrang kusog asin agid sa bagyo-ogis tinatayang mahumbal sa Lousiana, USA sa kaamayan kan Lunes (Sep. 1)orog na sa New Orleans na tinutubod igdi maagi an "mata" kan bagyo. Iyo ini an osip kan mga meteorologo kan CNN. An alkalde kan New Orleans si Ray Nagin nagpatanid na gayo na an mga residente dai na maghalat na aboton pa kan bagyo asin magdurulag na sa lugar na aagihan kan bagyo. An bagyong Gustav nasa Categpory 3 asin may pwersang 115 milya por hora. Tinayang an Katrinang bagyo kaidto pareho an kategorya asin nagkawsa nin grabeng baha asin nakagadan nin 1,800 katawo. [17]


Rusya Nagdeklarang Binibisto Kaini An Abkhazia asin South Ossetia Mga Independienteng Nasyon[liwaton an gikanan]

An Presidente kan Rusya si Dmitry Medvedev nagsabi na binibisto ninda an pagka-independiente kan Abkhazia asin South Ossetia asin ta an desisyon kani dai na mahihira. An duwang probinsyang ini naglitik sa Georgia asin habo magin parte kan nasyon na ini. An Abkhzia may populasyon na labing 250,000 asin an South Ossetia may populasyon na labing 70,000. Liwat sinasakop kuta kan Georgia an South Ossetia alagad an Rusya linusob logod an teritoryo kan Georgia sa pagsurog sa rebeldeng probinsya.Iyo ini asn pigbareta kan BBC News kan Agosto 31 manta na an mga miembro kan European Commission (EU) nagtiripon sa pagbilog nin burogkos na tindog sa ginibo kan Rusya. [18]


Resulta Kan 2008 Beijing Summer Olympics[liwaton an gikanan]

Nagsara na an 2008 Summer Olympics kan Agosto 24 na piggibo sa Beijing, China. An resulta nagluwas na an Estados Unidos an may pinakadakul na nasikwit na medalya (110), sunod Tsina (100), ikatolo Rusya (72), ikaapat Britanya (47), ikalima an Australia (46), asin an Alemanya an ika-anom (41)sa 203 na nasyon na nagbali sa internasyonal na karawat na ini. An Pilipinas dakulang boklo an nakua. [19]


Madali Nang Magsatagolipdan An Habong Ipahiling[liwaton an gikanan]

An mga parasukit sa Unibersidad kan California sa Berkeey, na pinamayohan ni Xiang Zhang, nakahaman nin sarong materyal na nagpapatiko sa direksyon kan ilaw, asin kunbaga na-ontol sa obheto, asin kun ini itaklob sa anoman na bagay, an tinahoban saka an itinaklob, dai mahihiling.

Iyo ini an pinagreport kan FoxNews na ginuno kani an pambihirang bareta sa Sunday Times Online kan Agosto 11 (Lunes). An materyal na ini inaapod na "meta-materials," asin ini hinaman na artipisyal ta mayo ini sa natural na estado, saro na kalidad kani iyo an pagkontrol kan direksyon kan ilaw na matiko ini asin mapa-ontol sa obheto resulta na matago ini sa paghiling. Anopaman, an adal na ini, na pinundohan kan militar, dakulaon an implikasyon sa teknolohiya nin giyera ta ngapit pwede na tagoon an darakulang bagay arog kan tangke, mga armas o mga eroplano sa kalaban. [20]


Aktres Na Si Shorhreh Aghdashloo Habo Nang Magbalik Iran[liwaton an gikanan]

Si Shorhreh Aghdashloo, 56, sarong aktres namundag sa Iran, habo na nanggad magbalik pa sa Iran. Sabi niya kun umule siya, an gobyerno kan Iran hihingutuhan na gayo an saiyang pagka-aktress sa Amerika asin pwede siyang ipiton huli sa trabaho niya igdi. Iyo ini an pahayag niya sa Starpulse Entertainment News Blog kan Agosto 11. Naghale an pamilya niya sa Iran kadto pang beinte anyos nakaagi sa pagdulag sa pang-iipit kan gobyerno. Sabi pa niya, suya daa saiya mga Iraning Moslem sa pagsikat niya sa Amerika alagad pigdadaralan man siya sa mga pirated na mga CDs ta duman daa pigpapalusot sana ini sa black market ta bawal ngani an mga perlikulang dai sunod sa pagboboot kan gobyernong islam. [21]


Georgia asin Rusya Nagpupulgan Huli Sa Pagsusuway Kan South Ossetia[liwaton an gikanan]

Tbilisi, Georgia- Mga bomba tinanyog na husto an kapitolyo kan Geogia (Tbilisi)kan Sabado (Agosto 9) kan an mga eroplano kan Ruso nagsakyada sa ere kan nasyon na ini. Sinabi kan Secretario kan National Security Council kan Georgia na si Alexander Lomaia na binubomba kan Ruso an mga estruktura ekonomiko kan nasyon sa tuyong mapilay ini.

Pinag-osip kan CNN na dakulon an nagkuriyat na mga gadan sa South Ossetia kan an Ruso nagpadara man nin mga tropa kan Byernes sa probinsyang ini sa pagsurog ta an Georgia kan Huwebes naglaog igdi sa paglapag sa mga seperatistang pwersa kan nasabing probinsya.

An South Ossetia habo makisaro asin magpasakop sa nasyon na Georgia asin gusto magdeklara nin katalingkasan na kasaro niya an North Ossetia na ini, alagad, parte kan Rusya. An Rusya kinakampihan an mga separatistang mga taga-South Ossetia. [22]


Presyo kan Gasolina Naghuros sa $ 3.88 an Galon[liwaton an gikanan]

An presyo kan gasolina (unleaded) sa Amerika huminuros sa $3.88 an galon hale sa kalangkawing presyo na $4.11 an galon kan nakaaging Hulyo 11. Ini gibo kan naghuros man an presyo kan asayti sa pangkinaban na merkado hale sa kataasing presyo na $147 an bareles pasiring sa hababang presyo na $120 an bareles. Ini an inireport kan federal na Energy Information Administration kan Lunes (Agosto 3, hale sa saindang paglibot kan mga gasolinahan sa pag-adal kan naglalakaw na mga presyo sa tingi.



Paraaling Nakikisex sa 14-anyos na Tugang kan Saiyang Inaaling[liwaton an gikanan]

Sarong paraaling, si Anette Martinez, 25 anyos an edad, kan Las Cruces, North Mexico (E.U.) nadiskubre na nakikipag-sex sa 14-anyos na aki, tugang kan duwang saradit pang aki na saiyang pigaaling. Nagtuga si Martinez sa mga pulis na lampas nang 40 beses siya naki-sex sa 14-anyos asin sabi niya namomotan niya ini.

Naaraman an pambihirang insidente kan an 14-anyos nagduman sa harong ni Martinez kan ini naaanggotan kan ina niya. Isinabi ni Martinez sa ina kaini an saindang relasyon. Nakakarsel si Martinez sa piyansang 5000 na dolyar, sa kasong 4th-degree felony [23]


Mga Bomba Pinaboag sa India, 40 gadan, 114 Nagkarulugadan[liwaton an gikanan]

Kan Domingo (Hulyo 20), nasa makuring alerto an mga sentro kan India gibo kan 17ng bomba an pinaboag kan Sabado sa iba-ibang parte kan sentro nin Ahmedabad. Apat na polo (40) an nagadan, 114 an na-erido. Mga patrolya kan pulis asin army naglilibot sa mga kalye ngani makalma an mga tawo. Sinasabing mga militanteng Muslim an kaggibo sa intensyon na magpalaad nin iriwal sa pag-ultan kan mga Hindu asin mga Muslim. Ini mayo pa ngani 24 oras an pangyari sa sunod -sunod man na paboag kan siyam na bomba duman sa Bangalore, kun saen duwa katawo an nagadan, anom na-erido.

Pakatapos kan insidente, sarong grupo nin mga militanteng Muslim, an Harkal-ul-Jihad al-Islam (HUJI) an nagpabalangibog na sinda an kag-gibo kan pagbobomba, an CNN-IBN nag-osip.[24]


Duwang Ayam Natukdoan Maki-Sex sa Babae, Binawe sa Paragamit na Kagsadiri[liwaton an gikanan]

Duwang ayam, saro Labrador, saro saralak-na-kasta, an binawe sa pagsasadiri ni Diane Sue Whalen, 54, taga-Tulsa County, Oklahoma City, ta an mga ayam niyang ini tinukduoan niya na magbabaw saiya sa paki-sex. Ini an pahayag kan tagataram na si Barbara Williamson.

An duwang ayam, pangaran Lucky saka Buddy, dadarahon sa sanctuario kan Best Friends Animals Society sa Kanab, Utah ta irayo na padagos sa babaeng ini. An aking lalaki mansana niya an nakadiskubre kan labis 150 mga tapes na nagpapadalan kan iba-ibang aktong kahayupan kan saiyang ina sa paki-sex sa mga ayam.

Si Whalen saka an lalaking si Roy Seifried, 55, akusado ngonyan sa krimen na pagkakasala sa Katalagahan sa pambihirang insidenteng ini. Si Seifried iyo an nagvideo kan mga marigsok na akto. [25]



Si Sen. Bayh o an Dating Senador na si Nunn Pwedeng Iyong Bise ni Obama[liwaton an gikanan]

An mga Demokrata pigpipilian sa duwang ini, si Sen. Evan Bayh kan Indiana o an dating senador kan Georgia si Sam Nunn an posibleng magin kandidato para bise-presidente ni Obama. An duwang ini mas maeksperensya ki Obama dapit sa foreign poicy issues, asin iyo an mahipno kan saiyang kakulangan sa bagay na ini, ta iyong gayo daa ini an pigpaparaliwat-liwat ni John McCain, saiyang karibal sa eleksyon sa Nobyembre, na dai pa daa siya luto na magtukaw komo sarong presidente.[26]


Iran Maisog Na Naghoma' Na Pupulpugon Niya An Israel, Mga Base Kan Amerika[liwaton an gikanan]

Kun sinda atakihon kan Estados Unidos asin kan Israel, mabalos an Iran asin rurunoton niya an Israel saka 32 kan base militar kan Amerika, ini an maisog na tinaram kasu-Sabado (Hulyo 12) ni Mojtaba Zolnour, sarong senior na opisyal kan Iran. Kaya kan Iran na bagaton an bulos nin asayti abot sa 30% kan suplay sa kinaban asin magresulta sa pag-olaptik kan presyo kaini sa $250 an bareles. Sa ngonyan an presyo kan asayti nagaabot nang lampas $140 an bareles. [27], [28]


Ama Ginadan sa Ti'lok Aking Babae Huli Ta Gustong Suwayan Agom[liwaton an gikanan]

An taga-Atlanta, Georgia na si Chaudhry Rashid, may pandog sa tuhod, nag-atubang kan Lunes (Hulyo 7) sa sala ni Chief Judge Daphne Walker kan Clayton County Magistrate Court, huli sa sinangat na kaso saiya sa pagti-lok asta magdan, kan saiyang aking babae, 25 anyos na an ngaran Sandeela Kanwal, sa rason na ini makuring disonra an dinara sa pamilya ta boot dibursyohan an saiyang agom. Si Rashid, dugong Pakistani, matoninong nakaduko manta na binabasa saiya an kargong murder na ikinaso saiya. [29]


Siisay Man Presidente Sa Estados Unidos, Madakul Pang Harong Mareremate[liwaton an gikanan]

An mga nagaadal kan problema sa industriya nin paghaharong sa Amerika nagtutubod na mataas pa an mga nareremateng mga harong na binakal sa paagi nin pagutang. Dakul nang mga harong sa Estados Unidos an nagkaka-irimbargo huli ta dai na kayang barayadan kan kag-utang, asin an problemang ini maro'ro' pa dawa siisay man an magluwas na presidente, si Demokratang Obama o si Republikanong MacCain man. Huli sa grabi an inflation rate, an interes sa pagkasangra sa utang kan mga harong nagpaparalangkaw y minsan mas halangkaw pa an bayadan kisa sa halaga kan harong na binabayadan pa. [30]


Bados Ginadan Saka Pirit Hinolbot An Binabados Ta gustong Masadiri[liwaton an gikanan]

Pinag-report kan pulis nin Kenniwick, Washington na sarong bados nagngangaran Araceli Camacho Gomez, edad 27 asin taga-Pasco, Wahington, an pigparasaksak saka sini'si' an tulak ta kinua an aki sa laog.

An nasahotan na iyo an kaggibo kan makagiram-giram na krimen iyo si Phiengchai Sisouvanh Synhavong, edad 23, na nag-apod sa 911 asin nagsabi na nangaki siya asin an omboy nasa peligrong magadan. Nasusog an nag-apod sa sarong parking lot na may kilik na omboy, an kalabaan kan pusod kaini nagkakalay pa. [31]


Pacquiao Dinokdok Na Husto Lalawgon Ni Diaz- Lampog Sa Ika-9 Na Hurnada[liwaton an gikanan]

Sa laban sa Mandalay Bay Events Center sa Las Vegas kan Sabadong banggi(Hunyo28), pinahiling naman ni Pacquiao an pambihirang talento sa boksing. Si Diaz, na dakula an hawak, sobrang nabanog ni Pacquaio mala ta sa ika-3 pa sanang hurnada biyo nang nagbuburulos an dugo sa pandok. Sa ika-9 na hurnada, napalogmok ni Pacquiao si Diaz. Sabi ni Diaz sobra daa kayang marikas maghiro si Pacquaio asin haros dai niya maisihan kun saen naghaharale an nagtatarama saiya. Nagresibi nin 788 na suntok si Diaz sa ibinalos niya ki Pacquiao na 463 na suntok. Narabsing ni Pacquiao saiya an World Boxing Council na titulo sa world lightweight division. [32]


Aki Duwang Taon Nabuhay Sana Sa Bahog Ikos[liwaton an gikanan]

Pinag-osip kan pulis sa Sacramento, California kasuHuwebes (Hunyo 26) na may sarong aki na nageedad duwang taon nabuhay ta pigparakakan sana an bahog na para sa ikos. Anom nang aldaw nagadan an ina niyang si Lisa Gonzales, 36, duman sa harong ninda asin mayo nin nakakaaram kan pangyari kun dai pa binisita kan sarong social worker. An ina sinasabi na may natnat nang helang. Pigiisipan kan mga optoridad kun pwede ipa-ataman sa mga kapinsanan an aki na aram sana sa pangaran na Noah. [33]


An Ferry na MV Princess NagLaob, Dakul Pighunang Gadan[liwaton an gikanan]

Kan Sabado, pinag-osip kan mga otoridad na an MV Princess of Stars, sarong ferry pagsasadiri kan Sulpicio Lines, naglaob harani sa Isla kan Sibuyan, Pilipinas, asin tinatakotan na ginatos an nagadan. An ferry may darang pasahero nagaabot walong gatos, naghale sa Manila paisirng kuta Cebu kan Biyernes (Hunyo 20) kan an bagyong "Frank" yaon pa sana sa signal no. 1 alagad sa katahawan kan dagat an bagyo buminirik asin kuminusog na maray.

Sa ngonyan (Hunyo 23) pinag-osip kan commandant kan Philippine Coast Guard na may nakua naman na 28 katawo na nakaligtas sa paglubog kan ferry, kaya 32 pa sana gabos an determinadong buhay asin 700 labi an nawawara pa. An iba nagsasabi tibaad natatakloban kan si naglaob na ferry. [34]


Mga Motorista Nagdadarayo Sa Mga Banwang Mehiko Huli Sa Baratong Gasolina[liwaton an gikanan]

Apesar grabi an baradilan garadanan sa mga banwaan sa Mehiko bunga kan ilegal na negosyo sa druga, mga Amerikanong motorista daing-takot nabalyo pa sa mga kadolon na banwa kan Mehiko makabakal sana nin baratong gasolina. Sa Tijuana, Mehiko, kadolon na banwaan kan estadong California, halawigon an pila nin mga motorista hale pang ibong kan Estados Unidos. Kun minsan naabot sa iriwal, surontokan asin murudahan huli sa haloy na paghalat sa pila.

An presyo kan gasolina sa Mehiko naabot sanang $2.80 an gallon (.70 cents an litro) manta sa San Francisco asin Los Angeles kan California nagpapakol na sa $4.00-4.50 an gallon (sobra $1.06 an litro). Kaya an iba nagsasabi na makaka-ademohan sinda nin abot $100 kun makarga sinda lambang duwang semana sa laog kan Mehiko. [35]


Alkalde Isnaji kan Sulu Damay sa Pagkidnap ki Ces Drilon asin Kan Saiyang Kairiba[liwaton an gikanan]

Si Isnaji, alkalde kan Indanan, Sulu, sinangatan nin kaso komo saro sa kidnapper na nagdukot sa grupo ni Ces Drilon, TV reporter kan ABS-CBN. An pamilya ni Ces Drilon nagsduhol nin limang (5) milyon ki Isnaji sa harong niya mismo alagad sabi kan pulis an tolong milyon kaini binulsa ni Isnaji asin 2 milyon sana an nakaabot sa aktwal na nagdurukot ka Drilon.

Si Isnaji myembro kan MNLF asin kumpirmado ni Nur Misuari, pamayo kani, na aram si Isnaji sa bansag na "Larin-larin," na iyo an nababangit kan si mga nagdurukot asin basado sa intellegence kan pulis, iyo soboot an lider kan si kidnap gang. Sabi ni PNP Police Chief Avelino Razon si Isnaji an personal na nagresibi kan kwarta.

Alagad, sabi ni Justice Secretary Gonzales ngonyan na Biyernes (Hunyo 20) igwa pang pigduhol sa mga kidnapper nin 15 milyon, dara kan si Negros Air Express Company, kumpaniya na sadiri kan mga Lopez, duman sa Orchids Hotel sa Zamboanga City. [36]


Mga Estyudante Sa Haiskul Nagkasurundo Na Magbarados Durungan[liwaton an gikanan]

Pigsisiyasat kan sarong syudad sa Massachusetts an soboot sarong "kasundoan" nin mga estudyante sa haiskul kan Glouscester High School igdi sa Boston na nagkaoroyon magpabarados na sarabay. Ini nareparo kan an klinika sa eskwelahan nag-osip na nagdoble an mga tinedyer na nagpapahiling kun sinda bados, asin an iba pa daa garo mundo pa logod kan maisihan na dai sinda bados.

An iba ngani kan mga babae kag-anom (16) an edad asin igwa pang mas hababa igdi. Sa Massachusetts, ilegal an pakikisex sa sarong hubin na an edad kulang pa sa 16. An mga opisyal kan syudad nareparo kan Huwebes (Hunyo 19) na an mga lalake na kadamay sa trampang ini may mga edad lampas 20, an saro dai ngani nin sadiring harong, asin an iba mga estudyante mansana sa haiskul na idto. [37]


Iran Binaweng Deposito sa Mga Bangko Sa Europea Nag'abot $75 Bilyon[liwaton an gikanan]

An Iran hinolbot an depositong nagaabot $75 bilyon sa mga bangko sa Europea sa kahandalan na mapugol ini huli sa mga patakot kan Amerika asin kan European Union na sapawan mga padusa an nasyon na ini kun dai pa magkuyog na ontokon an saiyang mga aktibidad nuklear sa paggibo nin bomba.

Parte kan hinolbot na deposito pinaribay na nin bulawan, an iba ikinaag sa stocks asin an iba ibinalyo sa mga bangko igdi sa Asya. Ini an osip ni Mohsen Talaie, an deputy foregin minister kan Iran. Kan Sabado (Hunyo 14) hayag na nagsayuma an Iran sa pag-ontok kan pagpayaman kan uranium, bagay na maresulta sa kakayahan kan nasyon na ini sa paggibo nin bomba nuklear. [38]


Presyo kan Asayti Suminakat na sa $140 an Bareles[liwaton an gikanan]

Sa dai pighunahuna, an presyo kan sarong bareles na asayti suminakat na sa $140, primero sa istorya kan produktong ini. Nangyari naman ini huli sa pigbareta na luminuya an manufacturing kan Nweba York nin ikaapat na beses ngonyan na Hunyo, na nagresulta sa paghuros kan halaga nin dolyar. Ini an pahayag kan Lunes (Hunyo 16) ni Miked Wittner, sarong analyst sa enerhiya kan Societe General.

Ini apesar na an Saudi Arabia, an nasyon na exporter nin pinakadakul na asayti, nag-anunsyo na tataasan niya an produksyon sa asayti nin 9.7 milyon na bareles sa aldaw poon sa Hulyo.


[39]


Mga Kompyuter Sa Kongreso Kan Estados Unidos Pinaglalaogan Kan Mga Insik[liwaton an gikanan]

An mga kompyuter gamit sa laog kan Kongreso kan Amerika pig-hahack daa kan gobyernong Insik ta boot makaholbot nin impormasyon dapit sa mga disidenteng Insik nageestar sa Amerika, ini an inosip kasu Myerkoles nakaagi (Hunyo11) ni Frank Wolf, representante (Republikano) kan estado nin Virginia. Iyo man ini an pigbuyagyag ni Chris Smith, saro man na Represetante gikan New Jersey.

An duwang opisyales na ini kaya nagmomonitor kan mga paglapas asin pagtimak-timak kan Tsina kan mga deretsong pantawo kan saiyang mga namamanwaan asin makusog nindang pigdedenunsya an gobyerno kan Tsina huli sa rekord na ini.

An mga nakompromisong kompyuter igwa kaya nin napapalaman na impormasyon manongod sa mga naeestaran asin iba pang personal na detalye kan mga Insik na disidente asin ini gusto masusugan kan gobyernong Insik, na iyo an People's Republic of China.

An Pentagon man nagbuyagyag na aro-aldaw, labis 300 na milyon an mga atake na sinasapo kan sandang mahiwas na kompyuter network, kaya husto na sana an pagsagang kaini na dai malaog an saindang mga kompyuter kan mga hacker. [40]


Phoenix lander Nagharok nang Ati sa Planetang Mars[liwaton an gikanan]

An pinahugpa na pansapwat ati sa kadagaan kan Mars kan Phoenix (satelyeteng pinadara kan Amerika sa orbit kan Mars) nakakaros na nin sampol na ati sa kapatagan kan planetang nasabi. An Phoenix pinagbunsad pasiring sa Mars kan Mayo 25. An mga sayantipiko sobra nang ukag huli ta may kadukot sa "dagang Mars" nin maputing bagay na pighuna ninda naalang na asin kan an yelo duman nagtunaw na.

An sampol na "dagang Mars" ipapaagi sa analisis ngani na matantya kun gurano kadakul kan tubig sa planeta asin kun anong mga mineral an madudukayan duman. [41]


Akusadong Kagboot Kan 9/11 Na Pag-atake Sa Amerika Oke Lang Daa Kun Ipagadan Siya[liwaton an gikanan]

Si Khalid Sheikh Mohammed, sarong Pakistaning myembro kan Al Kaida, nagsabi na gusto siya magin martir asin kaogmahan lang niya kun ipagadan siya. Ini an ipinahayag niya kan Huwebes (Hunyo 5) sa atubangan kan Guantanamo war crimes court. Nagrorokyaw pa siya nin omaw ki Allah manta na pigtataboga niya an Amerika sa pagsakyada daa kaini sa Afghanistan asin iraq, asin sa pagtugot nin same-sex na aragoman. [42]


Israel Mapipiritan Runoton an Mga Sitio Nuklear Kan Iran[liwaton an gikanan]

Kun dai mahurot nanggad an Iran na magpondo na sa paggibo nin bomba nuklear, an Israel mapipiritan na runoton kaini an mga sitio nuklear kan Iran, sabi kan Biyernes (Hunyo 6)kan sarong kabuhan ni Primer Ministro Ehud Olmert. An Israel igwang nakaabang na mga bomba nuklear na pangandam kontra sa saiyang mga kalaban. Iyo na ini an pinakahayag na tinaram kan sarong opisyal sa gobyerno kan Israel gibo kan nagluluya na an pagtubod kani na may magigibo an UN sa pag-alok sa Iran na pondohon na an paghaman nin bomba nuklear. [43]


Mga Linya Nin Eroplano Nagagabatan Na[liwaton an gikanan]

Sa pagparalangkaw kan presyo nin asayti, na nagabot nang $130 an bareles, nagagabatan nang maray sa pagnenegosyo an mga linya kan eroplano. Inoosip na kun ano-ano na lang an ginibong remedyo dai sana malubog sa pagkalugi alagad sinasabi na kun dai pa mag-ontok an paglangkaw, dakul an mga masangat nin pagkabangkarote sa korte komo proteksyon.

Nagtaas nin pamasahe, nag-ina nin empleyado, dinikitan an mga serbisyo makalaban sana sa grabing gasto sa asayti alagad an mga lakdang na ini kulang pa ngani makaligtas sa pagkalugi. Pito na sa Estados Unidos an nagpaaram sa korte nin pagkabangkarote o pirang bulan nang dai nagooperar, y linalaoman na madakul pa ini kun dai pa humuros an presyo pag-abot kan autumn. [44]


An Dating Yugoslavia Sinangatan kasong Genocide[liwaton an gikanan]

An Croatia (na naglitik na sa Serbia asin Montenegro na an kabiyoan kan tolo inaapod na Yugoslavia) nagsangat nin kasong genocide (tuyong pagpuho sa grupong kultural o pulitikal) kontra sa Serbia asin Montenegro ngonyan na Mayo huli ta rinibong Croats an ginaradan soboot kan duwang grupong nasambit. An kaso nakasangat sa The Hague, sarong korte internasyonal na binibisto kan United Nations. Alagad, sinabi kan Serbia na mayong legal na base ta an Croatia soboot bako pang sarong independienteng nasyon kan nangyari an mga bagay na sakop kan kasong sinangat. [45]


Sarong Babae Nabuhay Giraray Pakalihis 17 Oras na Pighuna Gadan Na[liwaton an gikanan]

Sabi kan mga doctor niya, sarong milagro an nangyari ta si Val Thomas , 59, kan West Virginia, USA, pigdalagan kan Sabado (Mayo 18) sa ospital huli sa duwang grabing sunod-sunod na atake sa puso asin an monitor tinakod sa hutok niya nagpahiling na mayo nang nagrerehistrong kuritkurit na alon na iyo an tandaan kuta na may buhay pa siya.

Pighiribian na an pasyenteng si Thomas asin pigulayan na kun pano idodonar an saiyang mga organ alagad bigla sanang napamata asin nagtaram.[46]