Emily Bichara
Si Doña Emily Panayotti Bichara namundag sa Bethlehem, Palestina kan Oktobre 13, 1902. Siya sarong pilantropo, lider sa komunidad asin sarô sa nagin pamayo kan magkapirang organisasyon katoliko.[1] Nagadan siya kan Hunyo 6, 2000 sa Syudad nin Naga, Filipinas.
Pamilya
[baguhon | baguhon an source]Namundag sa Bethlehem, Palestina, an ama niya iyo si Miguel Panayotti, sarong Libano na nagin alkalde kan Bethlehem, asin an inâ niya iyo si Catalina "Katrina" Simeon na tubong Cairo, Ehipto. May walong tugang siya alagad duwa sana an nagkaburuhay na iyo sinda Julia asin Alex.[2]
Sinasabing an pamilya Panayotti maykaya asin igwa nganing binayaan sa Bethlehem na mansion na an bilang kan kwarto nag'aabot 30.[3]
Kun napa'no ta napadpad an pamilya ni Emily igdi sa Naga, halawig na istorya. An saiyang ama si Miguel kan mabalo na ki Katrina, nagdesidir na maghubo sa Amerika asin duman nakapundar nin harong sa Colorado, alagad an saiyang rogaring binawe kan gobyerno ta sa irarom kaini, bulawan pala an pwedeng minahon. Huli kaini, asin pakadangog na an Filipinas saro nang teritoryo kan Amerika, tolos nakaisip na magpasiring igdi sa Filipinas asin saka na lang pinasunod an tolo niyang aki na nawalat sa Bethlehem.
Enot nag'estar sinda sa Sorsogon kun saen igwang tindahan an ama' niya, dangan naghubo sa Iriga (igdi nabisto kan pamilya an magtugang na Miguel asin Victor Bichara ta duman nag'eerestar) asin, katapostaposi, naglipat na sa banwaan kan Naga. Apat na taon sinda sa Sorsogon asin si Emily saka an duwa niyang tugang, nag'aradal duman sa eskwelahan publika kun saen siya nakanood nin toltol pagtaram Ingles palibhasa mga Amerikanong maestro an mga paratokdo.
An matuang tugang ni Victor Bichara, si Miguel, maaagom an saiyang tugang na si Julia asin si Victor mismo nagkagusto saiya alagad hubinon pa siyang maray kaidto, edad pa sana 15, asin si Victor nag'eedad nang 30. Hinalat ni Victor na mag'edad siyang 18, pakatapos pagklase sa Manila saka siya inagom. Kan Desyembre 5, 1920, napangagom niya si Victor Masoud Bichara, Sr., sarong Libanes na namundag sa Beirut, Lebanon. An saindang pagsasaro nagbunga nin doseng aki: Alfredo, Alfonso, Susana, Jaimito, Benjamin, Miguel, Milagros, Julia, Emily, Esther, Victor, Jr., asin si Alex.
Kaya, duwang magtugang si Julia asin Emily naagom kan duwa man magtugang, si Miguel asin Victor Bichara, na an siring na relasyon inaapod na mag'idas [4] sa Bikol.
Ginikanan kan mga Bichara
[baguhon | baguhon an source]An mga Bichara'ng magturugang na iyo si Miguel, Victor asin Juan sinasabing naggikan sa Maaaser II Chouf, sarong baryo sa rona nin Mount Lebanon, 57 kilometro an rayo sa Beirut. Alagad, naenot si Miguel maghubo sa Filipinas kan mga 1900 asin saiyang inagda an saiyang tugang na si Victor asin Juan na magsurunod saiya.[5]
Karera
[baguhon | baguhon an source]Tolong taon pakakasal sainda (1923), si Victor an saiyang agom, nagpundar kan Cine Bichara kabakas an matuang tugang si Miguel Bichara. An Cine Bichara, na nakapwesto sa tongod kan presenteng Bichara Commercial Complex, na an lote kaini dati sadiri ni abogado Robert E. Manly, sarong Amerikanong pilantropo asin negosyante, iyo an pinaka-enot na sinehan sa Bicol asin ini idtong dai pang boses. An negosyong ini iyo an pino'nan kan mag'agom sa labis na pagyaman ninda asta an pamilya ninda dominado nanggad an negosyo sa sine sa bilog na rona, mala ta sa kagasgasan kan saindang negosyo nakapundar an pamilya nin 32 na sinehan sa laog kan Naga asin sa iba-ibang banwaan kan Camarines Sur, Camarines Norte asin Albay.[6]. Mala ta an Bichara and Sons kaidtong panahon kan administrasyon Sibulo asin Felipe, iyo an pinakadakulang parabuhis sa Naga, alagad, kan 2013 ika-18 an korporasyon kan mga Bichara sa langkaw nin buhis na pigbabayad. [7] . Manta, an buhay ni Emily asin Victor nakasentro sa negosyo nindang mag'agom asin igdi sa laog kan syudad nin Naga lima an saindang minamato: an Bichara, Alex, Vic, Emily asin Advent. Alagad, huli ta siya sarong Katolikong serrado, nagin siyang maigot na myembro sa mga organisasyon kan Simbahan arog kan Penafrancia Association asin kan Catholic Women's League kun saen pareho siya igdi nagin presidente.
Bilang sarong pilantropo, dakul siyang tinostosan na mga seminaristang magpapadi' asin dakulang gastos an saiyang pinaluwas sa pagtogdas nin pailihan sa mga gurang na mayo nang madagosan.
Mga panluwas na takod
[baguhon | baguhon an source]- Al Francis Bichara Kinua 25-05-14
- Mga sinehan kan Bichara
- Mga kapipinsanan kan mga Bichara Kinua 25-05-14
- Video kan pagtiripon kan mga Bichara Kinua 25-05-14
Basaha man
[baguhon | baguhon an source]Toltolan
[baguhon | baguhon an source]- ↑ Aureus Teresa, O. Emily: a Biography of Dona Emily Panayotti Bichara
- ↑ Aureus, Op. cit. p. 8,9.
- ↑ Aureus, Op. cit. p. 8,9.
- ↑ ydas Vocabulario de la lengua bicol
- ↑ http://archives.newsbreak-knowledge.ph/2006/08/01/who-is-al-francis-bichara/ Kinua 25-05-14
- ↑ http://www.bicolmail.com/issue/2008/oct23/sabi.html
- ↑ http://naga.gov.ph/naga-smiles-2/naga-city%E2%80%99s-top-taxpayers-in-2013/ Archived 2016-03-22 at the Wayback Machine. Kinua 24-05-14
Sarong saringsing an artikulong ini. Makakatabang ka sa Bikol Wikipedia sa pagparambong kaining pahina.