Grace Poe

Gikan sa Bikol Sentral na Wikipedia, an talingkas na ensiklopedya
Jump to navigation Jump to search

Si Mary Grace Sonora Poe-Llamanzares (namundag Septyembre 3, 1968), bisto man sa apod na Grace Poe sarong pulitiko asin iyo-iyong aki kan aktor na si Fernando Poe, Jr. asin kan agom niyang aktres na si Susan Roces. Siya namundag sa Iloilo alagad kan omboy pa ibinaya siya sa simbahan kan saiyang tunay na ina asin pinag'ampon legal kan mag'agom na artista.

An napangagom ni Grace Poe iyo si Teodoro Daniel Misael "Neil" V. Llamanzares, sarong namamanwaan Amerikano asin sinda igwang tolong aki- si Brian, Hannah asin Nikka. Kan siya yaon sa Estados Unidos, nagtrabaho siya bilang sarong maestra sa preschool dangan sa sarong kompanya sa estado nin Virginia naggigibo nin mga instrumento asin kasangkapan siyantepiko.[1]

Si Grace Poe haros duman sa Estados Unidos nag'estar, nag'adal asin naghanapbuhay. Buminalik siya sa Filipinas kan maaraman niyang an saiyang ama, na nagdalagan sa eleksyon presidensyal kan 2004, nagadan dai lamang naghaloy paka'eleksyon. Pagbalik pinagmarhay niyang igdi na mag'erok mala ta siya kan 2010 nanombrahan ni Presidente Benigno Aquino III bilang pamayo kan Movie and Television Review and Classification Board (MTRCB).


Edukasyon[liwaton | liwaton an gikanan]

Siya nagtapos haiskul sa Assumption-Makati, kun saen siya nagpahiling tibay sa mga kompetisyon oratorikal asin natokahan na Pamayo kan Assumption Debating Team. Nag'adal siya sa Unibersidad kan Pilipinas asin nagmajor sa Development Studies, dangan sa Boston College of Massachusetts, kun saen nakua niya an Batsilyer en Artes, major sa Political Science.

Nagguhit siya nin pambihirang rekord sa historya nin pulitika sa Filipinas kan nakamit niya an pinakahalangkaw na boto nin sobra sa 20 milyon sa eleksyon kan 2013[2]. An pangyaring ini dai pa naarog sa mga enot asin nagtalikod na mga eleksyon nasyunal.

Kahamanan sa Senado[liwaton | liwaton an gikanan]

Saro sa kahamanan niya sa Senado iyo an pagpalusot kan Freedom of Information (FOI) Act sa ikatolong pagbasa sa Senado kan Marso 10, kan siya iyo an chairperson kan Committee on Public Information and Mass Media na magtatao nin mahiwas, silag, asin daing ulang na pagbulos nin impormasyon manongod sa mga transaksyon sa gobyerno.

Siya nagtukaw man na pamayo kan Committee on Public Order and Dangerous Drugs, kaenot-enoteng babaeng senador nakatukaw nin siring.

Sa lawig kan karera niya, nanindogan siya sa deretso kan mga namamanwaan Filipino asin sa tunay na pagmakulog sa mga tios, na matawan nin toltol na edukasyon asin nutrisyon, saro sa pigpangenot na isangat niyang bill sa Senado iyo an magmukna nin Programa nin libreng Pangodtohan sa mga kaakian sa mga eskwelahan publiko, orog na idtong dai natama sa timbang nin marhay na nutrisyon.

Siring man nagsangat siya nin bill na mabusol kan inaapod na Turismo sa Pelikula na tinotonggo na magin an Filipinas saro sa tinutuyong lugar na papaggibohan kan mga pelikulang internasyunal.

Bilang man chairperson kan Movie and Television Regulatory and Classification Board (MTRCB), siya nag'aandoyog kan sinasabing "intellegent media viewership" imbes na "censorship" asin naghaman nin bagong naangay-sa-edad na sistema nin pagranggo kan mga pelikula ngane matawan kakayahan an mga magurang sa pagreparong maingat asin maigot kan mga pagdadalan kan saindang mga aki.

Kan Septyembre 16, 2015, si Poe pighayag asin pigbalangibog niya sa atubangan kan tiripon na dakula kan saiyang kapamilya, mga suportador asin mga katood duman sa Bahay ng Alumni, Unibersidad kan Pilipinas, Diliman, Quezon City, na siya madalagan sa eleksyon presidensyal 2016. Alagad, an kampo ni Roxas asin ni Binay pigtuyaw tolos siya sa duwang bagay: Siya dai pwede ta yaon sa kwestyon an saiyang pagkanamamanwaan Filipino, siya hilaw pang gayo asin mayong hararom na eksperensya [3]

Hinale sa lista nin mga kandidato[liwaton | liwaton an gikanan]

Kan Desyembre 23, 2015, an Commission on Elections en banc (COMELEC) pigtangkas si Poe sa lista kan mga opisyal na kandidato para sa presidente sa eleksyon 2016. Sinabi kan COMELEC na siya kulang sa duwang karaipohan: kulang siya sa bilang nin taon nin pag'erok sa Filipinas na dapat dai magbaba sa sampolong taon. Kan siya daa nagsumitir kan Certificate of Candidacy kan nagkandidato siya para senador, dineklara niyang 6 na taon may 6 na bulan na siyang nag'eestar sa Filipinas. Saro pang rason, siya bakong natural-born Filipino ta mayo siyang dokumentong maipahiling kun siisay talaga an tunay niyang ama asin ina na dapat anas mga dugong Filipino. An kampo ni Poe nagsabi na saindang isasakat sa Korte Suprema an isyu.[4]

Mga panluwas na takod[liwaton | liwaton an gikanan]

  • [1] Opisyal na websayt ni Grace Poe. Kinua 26-09-15
  • [2]Entri sa Wikipedia Ingles. Kinua 26-09-15.
  • [3] Inq.net:Sen. Grace Poe is the great uniter. Kinua 26-09-15.
  • [4]Rappler. Mga 15ng bagay na dai nindo aram manongod ki Grace Poe. Kinua 26-02-16.

Toltolan[liwaton | liwaton an gikanan]