John McCain

Gikan sa Bikol Sentral na Wikipedia, an talingkas na ensiklopedya
Si John McCain

Si John McCain III (namundag, Agosto 29, 1936 - Agosto 25, 2018) iyo an senior na Senador nin Estados Unidos kan estado nin Arizona. Siya si nominado kan Partido Republikano para sa pagkapresidente sa 2008ng eleksyon presidensyal kan Amerika.

Si McCain nagsunod sa batay kan saiyang ama saka lolohon, na pareho mga apat-na-bitoon na almirante ta siya nag'entra man sa Hokbong Pandagat kan Estados Unidos, asin naggradwar igdi kan taon 1958. Nagin siyang sarong naval aviator, nagpapalayog nin ground-attack aircraft gikan sa mga aircraft carrier. Kan Gerang Biyetnam, oro-ilaga pang mautas an buhay niya duman sa kasulo sa USS Forrestal. Sa sarong misyon nin pagbobomba sa Hanoi narata an saiyang eroplano, labilabing na'erido asin nasikop kan mga byetnamitang pwersa. Nagin siyang preso de gera abot 1973. Sabihon pa, si MacCain nag'agi nin makuring pangkakadog sa kamot kan mga byetnamita. An mga naagihan niyang mga pagka'erido dara kan gera nagwalat sa hawak niya nin kabiyadian na sinasapo niya sagkod ngonyan.

Nagretiro siya sa Pwersang Pandagat komo kapitan kan taon 1981 asin naghubo sa Arizona kun saen nagtapsok sa pulitika. Naelihir sa Kongreso nin mga Representante kan Estados Unidos kan 1982, siya nagsirbe nin duwang termino, dangan naelihir sa Senado kan 1986, asin madalion sanang na re-elihir nin apat na beses sa pwestong ini, an pinakahuri kan taon 2010.

Siya bistado sa pakikisuwayan sa panindogan kan saiyang partido kun minamate niya dai dapat an siring na pagtubod. Nabantog man si McCain sa mga ibang mga iskandalo, arog kan sinasabing "influence peddling" kan mga 1980 bilang kaapil sa "Keating Five" pero dai man nahagop. Ginibo niyang ataman na gayo an pagkampanya sa pagreporma sa pinansya, an higos niya igdi nagbunga kan inaapod na "McCain-Feingold Act" kan 2002. Kan mga 1990, nabisto man siyang maray sa paghingoa niya na mabalik sa normal an relasyon diplomatiko kan Amerika sa Biyetnam. Pero may pagtubod siyang dapat nanggad an gera sa Irak matapos nin matriumpo. Siya nagin man Chairman kan Senate Commerce Committee kun saen binangga nya an mga paggasto na mga hinuhuna niya mga "pork barrel" . mansana. Madugang pa, si McCain nangawat na husto sa pagpili kan mga matukaw sa hudikatura.

Siya nagdalagan para sa nominasyon presidensyal kan Partido Republikano kan 2000 alagad nalangtoban siya asin nadaog sa gitgitan na laban sa primarya ni George W. Bush. Nasikwit niya man kuta an nominasyon na siring man giraray kan 2008, alagad sa eleksyon heneral, nadaog siya kan kandidatong si Barack Obama kan Partido Demokrata.

Mga sinurat ni McCain[baguhon | baguhon an source]

Mga libro[baguhon | baguhon an source]

Mga panluwas na takod[baguhon | baguhon an source]