Jumbo Kingdom
An Jumbo Kingdom (Sa Bikol may boot sabihon na Tandayagon na Kahadean; tradisyonal na Intsik: 珍寶王國) binibilog kan Jumbo Floating Restaurant (珍寶海鮮舫) asin kan kataid na Tai Pak Floating Restaurant (太白海鮮舫), mga bantogan na panturistang atraksyon namomogtak sa Aberdeen South Typhoon Shelter (Pailihan sa Bagyo kan Aberdeen), sa laog kan Aberdeen Harbour (Doongan nin Aberdeen) sa Hong Kong. Sobra na sa 30 milyon na bisita an nagsungko sa Jumbo Kingdom, y kairiba na diyan si Reyna Elizabeth II, John Wayne, Tom Cruise, Chow Yun-fat asin si Gong Li.[1] Igwa man kuta nin Jumbo Kingdom Manila sa Sola nin Manila, Filipinas, alagad isinara pakalihis nin walong taon. An Jumbo Kingdom yaon sa lindong kan Melco International Developpment, Limited, sarong kompaniya na nakalista sa Hong Kong Stock Exchange.
Uusipon
[baguhon | baguhon an source]An mga naglalataw na restoran nagtunga sa pailihan-sa-bagyo pakalihis sana kan ika-2ng Gerang Pangkinaban. An Sea Palace Floating Restaurant ipinabakal asin ginoyod pasiring Australya.
An Tai Pak Floating Restaurant tinogdas kan 1952.
Kan Oktobre 30, 1971, kan ini pigtotogdok pa sana, may nangyaring kasulo sa Jumbo Floating Restaurant, bago siya binuksan sa publiko, asin 34 trabahador an nagkagaradan.
An Jumbo Kingdom tinogdas ni Dr. Stanley Ho kan Oktobre 1976, asin ta apat na taon, sobra sa HK$30 milyon, an nakonsumo sa pagdesensyo asin pagtogdok kaini. Dati an dekorasyon kaini garo sarong antigong Intsik na palasyo.
Kan 2000, duwang panggoyod na bapor an nagdara kan saro sa naglalataw na restoran haleng Aberdeen Harbor pasiring sa Sola kan Manila asin pigngaranan na "Jumbo Kingdom Manila" pero hinale man giraray ini duman asin ibinalik sa Hong Kong.
An Jumbo Kingdom nag'agi nin multi-milyon na paghirahay kan 2003 na ginibo na ining sarong theme park kun saen an lugar igwa nang kakanan, saodan, dalandalanan asin mga atraksyon kultural.
Kan 1 Marso 2020, an restoran nag'anunsyo magpipinto na ngona asin gabos na empleyado pinahingalo huli sa pandemyang COVID.[1]
Kan 30 Mayo 2022, an amang kompanya kaini, an Aberdeen Restaurant Enterprises nagpaanunsyo na an restoran mahale sa Hong Kong sa Hunyo 2022. An Aberdeen Restaurant Enterprises Limited itinangro an restoran na ipanao sa kun siisay gusto kaini alagad mayong interesado sa rason na dakulaon an gastos sa operasyon kan restoran.[2] Kan mga alas onse nin hapon 31 Mayo, an kusinang barko nagtagilid. Ini nangyari kan pigsisibotan nang guyodon an restoran pasiring dagat.[3] An Jumbo Kingdom nabutong pahaleng Hong Kong kan 14 Hunyo alagad idtong kusina winalat.[4]
Kan 19 Hunyo 2022, manta na ini pigbubutong pasiring Dagat Habagatang Tsina, naabotan nin maraot na panahon asin nalunod harani sa Kapuluang Paracel sa bandang an tubig sobra 1000 metro an rarom. Mayo man nin napyerdeng buhay sa pangyayari.[5][6]
Mga panluwas na takod
[baguhon | baguhon an source]Toltolan
[baguhon | baguhon an source]- ↑ Standard, The. "Virus shutters Jumbo Kingdom". The Standard (in English). Retrieved 2020-03-02.
- ↑ Interactive, Marketing. "Jumbo floating restaurant exits Hong Kong due to cost crunch". Marketing Interactive (in English). Retrieved 2022-05-31.
- ↑ "Jumbo Floating Restaurant's kitchen boat listing into waters of Aberdeen Typhoon Shelter". The Standard (in English). Retrieved 2022-06-01.
- ↑ "Hong Kong's famed floating restaurant Jumbo towed away after half a century". The Straits Times. 14 June 2022. https://www.straitstimes.com/asia/east-asia/hong-kong-famed-floating-restaurant-jumbo-towed-away-after-half-a-century.
- ↑ Grundy, Tom. "BREAKING: Iconic Jumbo Restaurant sinks in South China Sea". Hong Kong Free Press. Retrieved 20 June 2022.
- ↑ Jumbo Restaurant capsizes near Xisha Islands, RTHK, 20 June 2022
