Kalaratri

Sarong estatwa ni Kalaratri

Si Kalaratri (kun minsan sinasayod na Kaalratri) iyo an ikapito sa siyam na mga porma kan Navadurga kan ina na si diosa Mahadevi. Enot siyang nasambitan sa Devi Mahatmya. Si Kalaratri saro sa mga makatakot na porma kan Inang Dios.

Bakong pambihira na hanapon an mga ngaran, na Kali asin Kalaratri, minsan ngani an duwang dios na ini pinagdiskutiran nin nagkapira. Si Kali enot na nasambit sa Hinduismo bilang sarong naiibang diyosa kan mga 300 BCE, sa Mahabharata na pinaghuhunang sinurat sa pag-oltan kan ika-5 asin ika-2ng siglo BCE (na may oral na transmisyon na posible dae mapetsahan sa mas amay na peryodo nin panahon, alagad imposibleng mapatotoohan).

Si Kaalratri parateng sinasamba durante kan siyam na banggi nin selebrasyon kan Navratri. An ikapitong aldaw kan Navaratri pooja (Hindu para sa ritwal nin pamibi) partikularmenteng idinusay sa saiya asin siya ibinibilang na pinakamaringis na porma kan Inang Dios, an saiyang paglataw na naghahagad nin takot. An pormang ini nin diosa iyo an pinaniniwalaan na paralaglag kan gabos na entidad nin demonyo, kalag, maraot na espiritu asin negatibong enerhiya, na nagdulag kan maaraman an saiyang pagdatong.

An Saudhikagama, sarong suanoy na Tantrikong teksto gikan sa Orissa nagtutukoy sa Silpa Prakasha, naglaladawan ki diosa Kalaratri bilang sarong personang diosa na namamayo sa kabanggihon kabtang kan lambang aldaw asin banggi.Asosyado man siya sa korona chakra (bisto man bilang sahasrara chakra), sa siring tinatawan an invoker, siddhis asin niddhis (partikularmente, kaaraman, kapangyarihan asin kayamanan).

Si Kaalratri bisto man sa apod na Shubankari ( ⁇ ) - boot sabihon paggibo nin marahay sa Sanskrito, huli sa pagtubod na pirme siyang nagtatao nin marhay na mga resulta sa saiyang mga deboto. Huli kaini, tinutubod na ginigibo niyang daing takot an saiyang mga deboto.

Iba pang bakong gayong bistong pangaran ni diosa Kaalratri kaiba an Raudri asin Dhumorna.