Maximo Heguera
Si Maximo Heguera CM. ( ? - Oktubre 17, 1955) sarong Espanyol na padi na kaapil sa Congregacion de la Mision. Siya nagin rektor kan Seminario Conciliar de Nueva Caceres (1927-1931)[1] asin rektor man kan Colegio de San Carlos sa Cebu (1934-1936). Dangan kaini nadestino siya komo rektor sa Seminario de San Carlos sa Mandaluyong hanggan duman na siya nagadan.
Sinasabing tolong taon siya (1931-1934) nag'estar sa Australia ngane mapakarhay sana an pagtaram asin pagsurat sa Ingles.
Siya man nagin direktor nasyunal kan Children of Mary of the Philippines. Kan an dioceses kan Caceres nagbungsod kan 1924 nin sarong padinaogan kun saen mapili kan pinakamagayon na himno na idodolot sa koronasyon ni Nuestra Senora de Penafrancia, si Reberendo Maximo Heguera nag'ayon igdi asin an saiyang sumitidong kanta na tituladong Resuene Vibrante iyo an nagkamit kan primer premyo. Huli kaini, napremyohan siya nin Php 1,000.
Inu'osipon niya na an nagtaong pasabong saiya sa pagtokda' kan awit kan siya daa nagbabakasyon sa Lanot, Mercedes, Camarines Norte asin kan nagpapahingalo, nadangog niya an sagawsaw kan bulos kan tubig sa sapa asin an mga huni na nadadangog niya duman sa haraning bukid, na sa saiyang tataramon , " ...los rios murmuran su nombre el correr... los montes proclaman su nombre y poder."
Huli kan awit niya, nata'wan an mga deboto ki Ina, orog na an mga Bikolano, nin pusog na simbolo kan saindang pag'aarang asin pagkamoot ki Ina, an Nuestra Senora de Penafrancia.
Ginunoan[baguhon | baguhon an source]
Manaog, Antonio M. Siisay an Nagsurat kan Himno Para sa Virgin de Penafrancia. Bikolana. Vol. II, No. 1. Septyembre 16, 1979., p. 12.
Toltolan[baguhon | baguhon an source]
- ↑ Unbroken Line of Rectors. 200 Years Later, 1793-1993. Holy Rosary Minor Seminary.
