Nuri al-Maliki

Gikan sa Bikol Sentral na Wikipedia, an talingkas na ensiklopedya
Jump to navigation Jump to search
Si Nouri al-Maliki


Si Nouri Kamil Mohammed Hasan al-Maliki (Arabo: نوري كامل محمد حسن المالكي‎; namundag Hunyo 20, 1950), na bisto man sa apod Jawad al-Maliki (جواد المالكي) o Abu Esraa (أبو إسراء), iyo an dating Primer Ministro kan Irak asin Sekretaryo-Heneral kan Partidong Dawa Islamiko. Al-Maliki asin an saiyang gobyerno nagsangle sa gobyernong transisyonal nin Irak. An enot niyang gabinete inoyonan kan Asamblea Nasyunal asin siya nagsumpa kan Mayo 20, 2006. An ikaduwa niyang gabinete kun saen siya pa an nagkapot kan katongdan na Ministro Interior temporaryo, Ministro sa Depensa temporaryo, asin Ministro temporaryo kan Seguridad Nasyunal, pinag'oyonan kan Desyembre 21, 2010.

Si Al-Maliki nagpoon kan saiyang karera komo sarong Shia'ng dissident sa irarom kan rehimen ni Saddam Hussein kan mga huri na kan 1970 asin naglataw na gayo kan siya duminulag sa sentensyang kagadanan asin nagluwas sa Irak na uminabot 24 taon. Kan yaon siya sa luwas, nagin siyang senior na lider kan Dawa, asin siya an nagkoordinar kan mga aktibidad kan mga gerilyang tumang ki Saddam asin siring man nakipagtrato nin husto sa mga Irano asin Siryang mga opisyal na saiyang hinagad an tabang sa pagpatalsik ki Saddam sa poder. Si Al-Maliki nakipagtrato man sa Estados Unidos asin sa mga pwersang koalisyon sa Irak hanggan 2011 kan pahale na ini.

Alagad kan panahon niya bilang lider sinasabing dai niya makua an pakikibunyog sa saiyang gobyerno kan ibang mga grupo arog kan mga Sunni asin mga Kurd ta sobrang pinapaorog niya an saiyang grupong Shia. Kaya an Irak parasâ asin daing toltol na unidad kan magbutwa an islamikong pwersa na inapod na Estado Islamiko asin an huri nagdakula na gayo asin nasakop kan pwersa kaini an mahiwas na parte man sa Sirya asin Irak. Sa nagdadangadang na homâ sa gobyernong Irak haros mayong pusog na pag'atubang asin pagsabat sa pwersang nagdadakula kan Estado Islamiko huli ta siriblag na an Irak asin kulang na an pagtubod sa liderato ni Al-Maliki. Mala ta an Estados Unidos asin Iran pareho na nagboses patin mismo mga kaapil sa saiyang partido na magbabâ na sa pwesto si Al-Maliki tangani makaporma na nin bagong gobyernong buronyog. Habo pa man kuta magbutas alagad kahuri-hurihi, kan Agosto 14, 2014, siya nagdemitir na.[1][2] An napupusoan na masangle saiya iyo si Haider Al-Abadi.[3]

Mga panluwas na takod[liwaton | liwaton an gikanan]

Toltolan[liwaton | liwaton an gikanan]