Plaza de Nueva Caceres

Gikan sa Bikol Sentral na Wikipedia, an talingkas na ensiklopedya
Maglukso sa: paglibotlibot, hanapon
An Plaza de Nueva Caceres

An Plaza de Nueva Caceres sarong plasa sa Syudad nin Naga, Camarines Sur, Filipinas na itinugdas sa tuyong pagromdom kan paglaog kan hukbong Espanyol sa Naga asin kun pàno sinabat sa maísog na paglaban kan mga katutubò an pwersang dayuhan. Namumugtak ini sa puro kan pagsabatan kan Kalye Padian (ngunyan Kalye Caceres) asin kan Kalye General Luna, abay sa merkado publiko asin harani sa salog Naga.

An plasa nalaklák sa 225.5 metro kwadradong kahiwasan, matilabà an hitsura. An lakbang kaini minaabot 6.05 na metro asin an labà minaabot 37.27 metro.

Detalye kan monumento[liwaton | liwaton an gikanan]

Sa tangâ kan plasa pinatindog an monumentong inapod na "Oragon," binibilog nin 13 pigura na binabangâ sa duwang grupo kan sarong pigurang kalayo sa pag-ultan kaini. An nag-aatubang sa kalye Caceres (klaye Dinaga kaidtó) igwáng anóm na pigura nin mga Espanyol; an sarô nakahorantáy na soldados, an sarô prayleng nakatúkaw, saróng soldados na garó napapasukámang, duwáng soldados tisong nakatindóg na an sarô kainí may kapót na espada asín badil asín an ikaanóm nasa aktong makikilában. Sa gilid kan mga pigura igwáng halas na pinamamálas an mga peligro sa ebangelisasyon.

An monumentong Oragon kun tanawon sa itaas kan merkado publiko

Sa ibóng an monumentong "Oragon" na nakaatubáng sa tulay nin Tabuk, pinapahilíng an duwang grupo. An sarong grupo mga Espanyol; an sarô nagmamansay sa harayô alagad nakatukaw, an duwang Espanyol an sarô kainí sarong misyonero may buklát na libro asín an kataid sarong soldados may espada. An kaaratúbang nindá iyó an mga taga-Naga, pinamoonán nin saróng Pamayo may hokbít nin minasbád, saróng babaeng nagtutukdô sa Pamayo asin kataid niya an saróng akì, nakatukaw man. Sa gilid asin tungod kan pamitisán kan Pamayo igwang sarong baul, simbolo kan yaman kan Kabikolan.

An monumento kun tanawon sa bandang Kalye Padian

Sa mga rebultong nag-aatubang sa Kalye Caceres garó iminumustra an mga paghihingóa asín paglalapígot kan mga Espanyol sa pagpalakóp kan Kristianismo sa banwang Camarines asin an sa ibóng iyo an pagdatóng kan mga Espanyol na ipigpapaháyag an bàgong Katinubdan alagad dinadará sa paaging doon kan pwersang kolonyal; asín an pagsabát saindá kan mga tinúbong taga-Naga na dawà nganì nagtúmang asín naglában sa mga kolonyang pwersa, katapostapósi kinúgos an bàgong pagtubód.

An monumentong Oragon kun tanawon sa poro kan kalye General Luna
An marker sa monumentong Oragon, matatanaw sa bandang poro kan General Luna atubang sa Kalye Padian

An monumento sinasábi sa marker na inukit asín hinamán kan iskultor na si Jose "Jojo" Barcena, Jr., makuapò ni Federico Barcena na an huri iyó man an kaggíbo kan monumentong Quince Martires, asin kan imahen ni Santa Maria nakataplak sa surungan kan Universidad de Sta. Isabel. Iní pig-inaguraran kan Hunyo 18, 2010 aldáw kan ika-62 na anibersaryo kan pagkamundág kan ciudad nin Naga komo saróng modernong syudad.

Mga panluwas na takod[liwaton | liwaton an gikanan]