Rufo Tuy, Jr.
Si Rufo Ocampo Tuy, Jr. (9 Enero 1936 – 26 Septyembre 2021) sarong Bikolanong parabareta sa radyo, peryodista asin brodkaster.[1] Namundag sa Tinambac, Camarines Sur, siya aki kaidtong Rufo, Sr. na nagin sarong District Supervisor kan Departamento nin Edukasyon.
Edukasyon[baguhon | baguhon an source]
Graduado sa sekundarya sa Ateneo de Naga High School kan 1954, siya nag'adal man sa University of Nueva Caceres kun saen nagkua man siya kan kurso nin Bachelor of Arts asin nagin editor siya igdi kan publikasyon kan kolehiyo. Nagkua man nin Law alagad dai tinapos.
Karera[baguhon | baguhon an source]
An karera niya sa media halawig nanggad. Nagpoon siyang magtrabaho sa DZDR na an istasyon namumugtak sa Kalye Barlin, Syudad nin Naga bilang parabareta kan Insular Life News. Dangan nakabalyo siya sa DZRB na nakapwesto sa Dinaga, Canaman. Alagad, siya nagin man peryodista sa Bicol Mail kan buhay pa idtong si dipuntong Leon Aureus. Nagtrabaho pa man siyang dikit na oras sa Naga Times na pagsasadiri ni Ramon Tolaram. Kan taon 1965, si Rufo Tuy kinua kan DZGE, sarong istasyon nin radio sa Haring, Canaman na ini pagrorogaring ni Senador Edmundo Cea. Igdi siya naglabing 30 anyos na serbisyo sa pagdarang bareta sa komunidad. Mala ta nagretiro siya sa media kan taon nang 2000, pero kinua pa ngani siyang consultant ni Manubay sa pag’asikaso kan mga tubohan kaini.
Bilang parabareta, agang amay na alas 7 an boses niyang garo baga pighahapag nangalatikat sa ayri kan an radyo iyo pa an dominanteng dalaydayan nin bareta asin dai pang gayo uso sa Kabikolan an mga istasyon nin telebisyon. Parati tinatapos niya an pagbabareta sa siring na pagboses, "Iyan an mga bareta ngonyan na aldaw, iyo man ini si Rufo Tuy, Jr."
Pagpipilang[baguhon | baguhon an source]
Kan Desyembre 14, 2018 si Rufo Tuy, Jr. pig'onra kan Sumaro Bikolnon sa sarong pagtiripon sa kaogmahan nin Pasko asin ginawadan siya kan Gawad Hiyangta sa halawig na serbisyo niya sa komunidad bilang parabareta sa radyo asin pagtulod sa lenggwaheng Bikol sa mahiwas na paggamit kaini.
Si Rufo Tuy, Jr. saro man sa kagresibi nin pag'onra sa Ika-11 Taboan National Writers Festival ginibo sa Central Bicol State University of Agriculture (CBSUA) sa banwaan nin Pili, Camarines Sur kan Oktubre 7-8, 2019 komo saro sa tagatulod kan tataramon na Bikol sa saiyang karera.[2]
