Tangkwa

Gikan sa Bikol Sentral na Wikipedia, an talingkas na ensiklopedya
An tinanom na tangkwa

An Tangkwa (Benincasa hispida <Tsino, tong qwa (winter melon)[1]) (Ingles, winter melon, white gourd, ash gourd) sarong nagkakamang asin nagbabalagon na tinanom na nabungang darakulang prutas, kinakakan magsalang pandulse, gulay o panberdura o pansalak sa sopa. Ini an solo sanang myembro kan genus na Benicasa. An prutas kaini matilaba na bilogbilogon sa pagkahawak, buhokbuhokon kun potot pa asin kun hubal na, may patos nin maputing pulbos na iyo an nagpapahaloy na dai malapa. Alagad, sa ibang parte, sa Indonesia halimbawa, may tangkwang bilogon arog kan kalabasang pula sa porma. An laman kani kun hilaw kolor puti, mahibog asin manamisnamis sa namit. An prutas nalaba sagkod sa 80 sentimetro an laba.

An dulseng tangkwa usong gibohon sa Filipinas. Ini ini'iraid, inaasukaran, saka sinasalakan pwedeng pili, nata de coco, o lemonsitong kastila. An huri nataong harang sa kagat asin kolor sa timpladang kuta puti sana an hitsura. Kun minsan man, ngane mabaskog sa kagat, ini linuluto na may salak nin apog, an pinulbos na bingkay sa kalayo.

Dati ini nagtutubo sana sa Sur-subangan kan Asya alagad ngonyan lakop nang entero sa Subangan asin Solnopan kan Asyang kontinente.

Mga panluwas na takod[baguhon | baguhon an source]

  • [1]Paggibong tangkwang dulseng prinitos
  • [2] Mga ingrediente sa paglutong tangkwa

Toltolan[baguhon | baguhon an source]