Tecla Ziga
| The Honourable Tecla San Andres Ziga | |
|---|---|
| Senator of the Philippines | |
| Termino Desyembre 30, 1963 – Desyembre 30, 1969 | |
| Member of the House of Representatives from Albay's First District | |
| Termino Desyembre 30, 1955 – Desyembre 30, 1961 | |
| Suminunod ki | Lorenzo P. Ziga |
| Sinundan ni | Venacio Ziga |
| Personal na mga detalye | |
| Kamundagan | Agosto 23, 1906 Nueva Caceres, Commonwealth of the Philippines |
| Kagadanan | Agosto 17, 1992 (edad 85) Manila, Philippines |
| Nasyunalidad | Filipino |
| Partido politikal | Partido Liberal (Filipinas) |
| Agom | Venancio Ziga |
| Alma mater | Unibersidad kan Filipinas |
| Kasibotan | Abogado |
Si Tecla San Andres Ziga [1](Agosto 28, 1906 - Agosto 17, 1992) sarong abogada asin pulitiko. Siya nagin kongresista (1955-1961) asin Senador (1963-1969)[2] kan Filipinas. Siya an pinakaenot na babaeng nakamit an pinakahalangkaw na grado sa Bar kan kinua niya an eksamen na ini. Siya man an pinakaenot na babaeng duwang beses nagtukaw sa Kongreso asin pinakaenot na babaeng abogada na nagtukaw sa Senado kan Filipinas.[3]
Pamilya asin edukasyon
[baguhon | baguhon an source]Namundag sa siyudad nin Naga, Bicol, sa pamilya San Andres kun saen an saiyang tugang si Ramon San Andres nangagin konsehal sa nasabing siyudad. Napangagom niya si Venancio Ziga, saro man na pulitiko na nagin gobernador kan Albay dangan kongresista sa enot na distrito kan probinsyang ini. Solong aki ninda si Victor, na nagin man sarong senador. Sobrino niya si Msgr. Jaime San Andres, aki kan saiyang matuang tugang na si Abogado Juan San Andres.
Siya nagklase kan elementarya sa Colegio de Santa Isabel (ngonyan, Universidad de Santa Isabel) asin kan haiskul sa Naga Central School. Natapos niya an Bachiller en Artes asin abogasya sa Unibersidad kan Filipinas, College of Law, kan taon 1930 asin sa parehong taon kinua niya an eksamen sa Bar asin nasikwit an pinakahalangkaw na grado mala ta sa remedial law may marka siyang 99%.
Karera
[baguhon | baguhon an source]Pakapasar sana sa Bar, nagtrabaho sa DeWitt Law Office kun saen nagpitong taon siya. Kan 1937 kuminua siya kan civil service exam asin nakua niya an halangkaw na grado man. Naempleo siya sa Departamento nin Hustisya nin pirang taon bilang sarong abogada asin an eksperensiya niyang halawig igdi nagsirbeng gayo kan nagin na siyang lehislador. Kan 1955 naelehir siya sa Kongreso. Igdi nangengenot na gayo siya sa pagtolod asin pagsurog kan mga interes nin kababaehan asin kaakian. Pakatapos kan katongdan niya bilang kongresista sa duwang termino, siya nanombrahan na Administrador kan Social Welfare Administration(SWA) sa gabinete kan administrasyon ni Presidente Diosdado Macapagal manta na an agom niyang si Venancio Ziga kongresista man kan panahon na iyan. Kan 1963, siya nabotohan na senador asin sa senado nagin siyang myembro kan iba-ibang komite arog kan sa agrikultura, rekursos naturales, edukasyon, asbp.
Saro siya sa kagmukna kan Partido Liberal sa probinsya nin Albay.
Mga organisasyon na kaapil siya
[baguhon | baguhon an source]- Women Lawyers Association of the Philippines (kagmukna)
- Social Welfare Board (SWA-UNICEF Assisted Social Services Project)
- Special Events Committee, Children's Museum and Library, Inc.
- Civic Assembly of Women
- Philippine Committee, Federacion Internacional de Abogadas
- League of Women Voters of the Philippines
- Board of Trustees, Nutrition Foundation of the Philippines
- Eye Research Foundation.
Mga pasib
[baguhon | baguhon an source]- Napili kan Free Press bilang saro sa "Outstanding Senators" kan taon 1968[4]
- Sa pagromdom ki Tecla Ziga, an tinampo poon sa pagdolonan kan Barangay Penafrancia sundo sa sentro kan Barangay Panicuason pinangaranan "Tecla San Andres Ziga Road" sa ri'gon kan Ord. Nu. 97-052 na pig'amaan ni Kgwd. Janet Soler asin aprobado kan Agosto 13, 1997.[5]
Panluwas na takod
[baguhon | baguhon an source]- [1][permanent dead link] Tecla Ziga bilang kongresista asin senador
- [2] Tecla Ziga nakamit pinakahalangkaw na grado sa Bar
- [3] Karera sa pulitika kan mga Ziga
Toltolan
[baguhon | baguhon an source]- ↑ http://www.senate.gov.ph/senators/former_senators/tecla_ziga.htm Kinua 27-08-14
- ↑ [ https://www.senate.gov.ph/senators/senlist.asp#fifth_congress]www.senate.gove.ph. Kinua 28-01-18
- ↑ http://www.zoominfo.com/p/Tecla-Ziga/408504639 Kinua 27-08-14
- ↑ http://mclaw08.wordpress.com/2011/03/02/tecla-san-andres-ziga-first-woman-bar-topnotcher/salonga-in-congress-and-senate-photo-8_18aff94013-2/ Kinua 27-08-14
- ↑ http://naga.gov.ph/wp-content/uploads/2011/01/ord1997-052.pdf Archived 2019-07-28 at the Wayback Machine. Kinua 27-08-14
