Tinagba Festival

An Tinagba Festival sarong taon-taon na selebrasyon sa Syudad nin Iriga, Camarines Sur na ginigibo lambang bulan nin Pebrero kadungan kan kapyestahan ni Nuestra Señora de Lourdes.

Pinopoonan an pagrukyaw sa pagparada nin mga karetela na guyod kan mga damulag. An mga karetela nagkakamàgal sa mga bunga arog kan tapayas, niyog asin mangga sagkod sari-saring gulay siring kan kalabasa, talong asin kun ano-ano pang duma halì sa pagtanom sa dagâ. An mga ini dinadara sa atubangan kan Emerald Grotto na nakabugtak sa alitoktok nin bulod na inaapod na Calvario Hill. Kan mga inot na selebrasyon, pakamisa asin pagbendita kan mga atang, ipinapanao an mga ini sa mga daing sukat, sarong akto nin pagmakulog asin pakisumarò sa mga tios.

Siring man, an pag-atang kan inot na mga inani asin ginunò kan mga paratanom sa pagpa-Dios mabalos kan dagyâ na gusi sa uma asin sa mga tanoman, sarong pagmidbid asin pag-onra sa Kagurangnan. Alagad sa paglihis nin panahon, an pagrokyaw kan Festival nangagin nang sarong makolor na parada nin mga kaakian na nagsasayaw sa tinampo siring kan mardi gras duman sa Brasil.

Ginikanan

Gikan nanggad sa hararom asin suanoy na kaugalian nin mga Bikolano an pagdulot nin biyayà sa Gugurang. Dai pa minaabot an mga Kastila, igwa nang binibistong Kagurangnan an mga Bikolano na kaipohan pagtànawan nin utang na boot asin pasalamat sa paagi nin pag-atang nin mga balaog asin biyayà.

An katagng "tinagbâ" gikan sa terminong "tagbâ" o an ginunò o inani kan paroy o inot na bunga nin mga tinanom. Sa Vocabulario de la Lengua Bicol na sinaligsig ni Marcos de Lisboa, kaamayi nin taon 1600, dati nang tataramon ini kan mga suanoy na Bikolnon:

tagba, coger las primicias del arroz

Kagpoon kan Tinagba Festival iyo an abogadong si Jose Calleja Reyes bilang pagpahayag kan saiyang pagtubod asin pagpasalamat sa Diyos asin padagos pagtaong doon sa kultura asin turismo.

Sa pagkaKristiyano, an gawe na ini natatandaan sa pagdara kan sinasabing tinagba sa kura o ki "mamò" sa simbahan komo iyo an pagromdom kan pagkamasuripot nin Diyos. Sagkod ngunyan, ginigibo pa an siring na gawe sa mga baro-banwaan.

Turismo

Sarô sa mga katuyohan kan selebrasyon iyo an pagtulod kan turismo sa syudad kun sain manunumpongan na manlainlain na tànawon. Midbid bilang City of Springs huli sa labi 30ng mga natural na bukal nin tubig, mahihiling digdi an Bukid Asog asin manlainlain na bulod.

Siring man, digdi mahihiling an Philtranco Transport Heritage Museum.

Mga panluwas na takod

• Tinagba Archived 2008-07-11 at the Wayback Machine. sa Official Website kan Iriga