UFO

Bareta sa Roswell Daily Record kan Hulyo 8, 1947 nag'uusip kan kaso nin UFO

An UFO (hale sa Ingles: unidentified flying object, "daing midbiran na bagay na naglalayog") iyo an bistong pangaran para sa anoman na pangyayari o penomeno sa kalangitan na dai nanggad maisihan kun ano ini kan tawong nagmamasid. An mga opisyales kan Estados Unidos binago an apod ninda kaini na UAP (unidentified aerial phenomenom) o penomeno sa kalangitan na dai mamidbiran. Sa pagsiyasat nin maingat, kadakulan daa kan UFO nadidiskubre na mga bagay mansanang natural na kawsa nin teknolohiya nin tawo, penomena atmosperiko, mga pekeng pangyayari pinababantog kan mga nanloloko, o pangyayaring pighuna totoo pero kawsa nin delusion. Totoo, inaako kan mga awtoridad na may dikit na porsyento kaini dai nanggad mata'wan nin toltol na paliwanag asin daing pagmidbiran.

May mga grupo na makukusog magboses na nataong paliwanag na an mga UFO ebidensya nin ekstraterestyal na intelehensya. An mga pagtubod sa UFO nagresulta man sa pagtugdas nin mga bagong relihiyon.

An UFO enot na ilinaladawan na anoman na bagay sa ayre na sa hiro-hiro, sa aerodinamikong karakter, asin sa pambihirang kamugtakan, dai naayog sa anoman na tipo nin aircraft o misile, o dai positibo mabisto na sarong bagay na pamilyar.

Opisyal na report hale sa mga ahensya nin Estados Unidos

Sa report na tinipon kan Opisina kan Direktor nin National Intelligence kan Estados Unidos, sinasabi na may mga obserbasyon na an mga hiro sa paglayog o paglayaw-layaw kan UFO naiiba sa ordinaryong aircraft o jet ta nagpapahiling nin superior na teknolohiya na mayo pa an mga modernong nasyon. Sa report, ipinahayag na an namasdan na mga UFO, ini pwedeng daing hiro-hiro sa kalangitan, pwedeng biglang maghiro sonsong sa anoman na duros, magmaniobra na padali na kantohan an pagsiko, maglayog sa makuring rikas na dai nahihiling an gamit na pwersa nin propulsion asin daing init na binubuga, asin sobrang gayo an sigkat mala ta sa langkaw na 80,000 na metro nahuros bigla paibaba nin 30,000 sa laog sana nin apat na segundo. An epekto kan haraning naglalayaw-layaw na UFO, sabi kan mga piloto na nakamasid kaini, biglang nawawara an operasyon kan radyo asin radar asin ibang kasangkapan kan jet ninda. Alagad, sabi sa report, kaipohan an higot na pag'uugid kan penomena ta posible pa ngani na lambang bagay na UFO may iba-iba man na characteristic.^[1]^[2]

Paglakop kan mga nahihiling sa kalangitan nin UFO

Manta daa na dakul namamaanan na mga UFO sa kalangitan maski poon pa kan suanoy na panahon, ini uminurog pakaagi kan Ikaduwang Gerang Pankinaban asin lalo nang parati naanyapan ngonyan na yaon na sa Space Age. An ika-20ng siglo may mga adal asin pormal na imbestigasyon sa mga nagburutwa na mga report dapit sa UFO, arog kan Project Grudge, Project Sign sa Estados Unidos, asin an Project Condign sa Reyno Unido. Sa mga pribadong grupo, saro diyan iyo an SETI (Search for Extraterrestial Intelligence) asin man an MUFON (Mutual UFO Netrwork).

Historya

Historyang amay bago magtongtong sa ika-20ng siglo

. An mga tawo parati nagtitingag nagmamasid sa kalangitan sa lawig nin panahon, asin minsan nakakahiling nin mga pambihirang dadalanon, siring kan kometa, masilyab na bulalakaw o meteor o nasasalimbadan saro o duwang planeta, o an pagsakniban nin mga planeta, asin mga simpleng penomeno atmosperiko arog kan mga naiibang porma nin panganoron o parhelia. Saro diyan iyo an pagbubutwa kan inapod na Halley's Comet: ini enot na narekord kan mga Intsik na astronomo kan 240 BC o mas amay pa kan 467 BC. Ta ini nalaog sa sistema solar lambang 76 na taon, ini hinuhuna na sarong pangyayaring pambihira na nagtatalinghaga nin sarong paligsok o supernatural na tanda' alagad an mga antigong parasurat dai pa naaaraman na ini nagbabalikbalilk sana man.^[3] Manta an mga toriyok sa UFO nagkokomento na may pagkaagidan sa mga simbolo relihiyoso nakukua sa mga pintang medieval sa mga report dapit sa UFO,^[4] an simbolikong karakter kan mga imahe malinaw na dokumentado kan mga historyador na may interpretasyon na toltol kaini.^[5]

Mga kasong nauunabihan asin mga insidente

Britanya

An Insidente sa Rendlesham Forest seryeng mga pinaguusip asin pinabalangibog na mga sinasabing mga pagkakita nin "dai mamidbiran na mga ilaw" sa tungod kan Kadlagan Rendlesham sa Suffolk, Englaterra kan pahinapos an Desyembre 1980 na itinatakod sa mga hingako' nin soboot mga paghugpa nin mga UFO.

Pransya

An pinakamauunabihan na mga kaso nin mga namasdan na mga UFO sa Pransya iyo idtong:

an Insidente nin UFO sa Valensole kan 1965.
an Kaso sa Trans-en-Provence kan 1981.

An *Daily Record* may bareta dapit sa report kan Hulyo 8, 1947 nahiling na may nagbagsak na UFO sa Roswell

Estados Unidos

Sa Insidenteng Kecksburg UFO, sa Pennsylvania (1965), an mga residente nagurusip na may nahiling sindang dai mamidbiran na bagay nagbagsak sa lugar na idto.
Kan 1975, si Travis Walton naghihingako na siya dinukot nin mga "aliens". An pelikulang Fire in the Sky (1993) basado sa insidenteing inistorya ni Walton, alagad sobrang binangotan na an orihinal na istorya.
An "Mga Ilaw sa Phoenix" kan Marso 13, 1997

Mga bidyo na nagpapahayag kan mga naglalayog na UFO

Hilnga man

UFO Bidyo nin Pentagon

Toltolan

↑ https://www.dni.gov/files/ODNI/documents/assessments/Prelimary-Assessment-UAP-20210625.pdf. Kinua 2022-11-19.
↑ https://nymag.com/intelligencer/article/pentagon-ufo-report-what-we-know.html. Kinua 2011-11-19.
↑ Rev. Ed. Ezekiel 1:4: Extraterrestrial Encounter? Unity Accessed 4 June 2021.
↑ Giordano, Daniela (November 13, 2006). "Do UFOs Exist in the History of Arts?". American Chronicle. Ultio, LLC. Archived from the original on 2012-08-19. Retrieved 2013-09-06.
↑ Cuoghi, Diego (2004). "The Art of Imagining UFOs". Skeptic (The Skeptics Society) 11 (1). http://www.skeptic.com/the_magazine/archives/vol11n01.html. Retrieved on 2013-09-06.

Pinopoonan an artikulong ini. Makakatabang ka sa Bikol Wikipedia sa pagparambong kaining pahina.

[1] ttps://www.dni.gov/files/ODNI/documents/assessments/Prelimary-Assessment-UAP-20210625.pdf. Kinua 2022-11-19.

[2] ttps://nymag.com/intelligencer/article/pentagon-ufo-report-what-we-know.html. Kinua 2011-11-19.

[3] Rev. Ed. Ezekiel 1:4: Extraterrestrial Encounter? Unity Accessed 4 June 2021.

[4] Giordano, Daniela (November 13, 2006). "Do UFOs Exist in the History of Arts?". American Chronicle. Ultio, LLC. Archived from the original on 2012-08-19. Retrieved 2013-09-06.

[5] Cuoghi, Diego (2004). "The Art of Imagining UFOs". Skeptic (The Skeptics Society) 11 (1). http://www.skeptic.com/the_magazine/archives/vol11n01.html. Retrieved on 2013-09-06.

[1]

[2]

[3]

[4]

[5]